WAHATALUKWE LUNGUKA!
Okuliipaela Mopulitika — Oityi Ombimbiliya Ipopia?
Tyokuliipaela mopulitika, tyina nokuhukaisa ouye.
Ovanthu 39 vopulitika ankho vahanda okutumina vaipawa ko México, novivi ovikwavo vali viokulinthintha mopulitika, viamoneka vali unene pomuvo wokumanga mo 2023-2024.
Potyakati apa, ko Europa kwakala-kala ovanthu ovanyingi velilwisila mopulitika, atee umwe nomutumini umwe woko Eslováquia (Primeiro-Ministro) monthiki 15 ya Kapepo yo 2024, himaa vemwiipaa.
Motyilongo tyo Estados Unidos ovanthu vatumphulukile unene etyi monthiki 13 ya Kakwenye yo 2024, Donald Trump (Ex-presidente), himaa aipawa.
Omokonda yatyi tyakakela tyovanthu veliipaela opulitika? Okuti kumbi haa matyipu? Oityi Ombimbiliya Ipopia?
Tyovanthu veliipaela opulitika tyapopiwale
Ombimbiliya yapopia okuti ononthiki mbuno, “ononthiki mbahulilila,” ovanthu ovanyingi mavakakala vononthumbaungo, vonondyaya, vehelivili na vakwavo.
“Ononthiki mbahulilila mambukalinga ononthiki mbalema, ononthiki mbepwiya okukala. Ovanthu mavakalinga . . . vokwahapandula, vemphinia, . . . vokwahatehela ku vakwavo, . . . ovinyama, . . . vokweenda vakwavo konyima, vonkhango, vepwila melungavi.” — 2 Timotiu 3:1-4.
Ombimbiliya tupu yapopia-le okuti okulitutumbisa, nomalwei, nonondyaya mbopulitika, matyikakaka unene mononthiki mbuno. (Luka 21:9, okatoi) Mahi otyo, tyovanthu veliipaa, veliiyapauka vala mokonda yopulitika, kamatyikala-ko apeho.
Okuliipaela mopulitika matyipu
Ombimbiliya ipopia umwe nawa okuti Huku povatumuni aveho makapingiya-po outumini wae mwene, uli keulu.
“Huku keulu, makapaka-ko ouhamba. . . maukatyopa-tyopa omauhamba oo aeho, maukeehanya-ko, ngao vala ukatumaina apeho.” — Ndaniyele 2:44
Ouhamba wa Huku maukahonyeka ovanthu vatyo aveho, aukapaka ombembwa mouye ikakala-ko apeho.
Ohamba Sesusi Kilisitu watiwa “Omutumini Wombembwa,” makalinga umwe atyiho opo ‘Ombembwa yahakapwe’ moutummini wae. — Isaiya 9:6, 7.
No pehepano umwe ovanthu vana vahula kwee venale nokulilongesa okukala vombembwa. Otyo Ombimbiliya yapopila okuti: “Omitunga viavo, mavekevinthila omatemo, omaonga avo, mavekeenthila onotisola mbokulombolola omiti. Otyilongo kamatyikakatukila vali otyilongo otyikwavo nomutunga, nii kamavakalongeswa vali okulwa.” — Isaiya 2:3, 4.
Opo unoñgonoke vali tanga onthele yati: “O que é que o Reino de Deus realizará?” tupu tala ovindiu Ouhamba wa Huku Oityi?