“Omuhoneki wo Nações Unidas utiwa António Guterres, pokwatala etyi tyapopia ovatumini vovilongo novilongo monthiki 4 ya Abril yo 2022 tyiyemba komphepo youye ili nokutokota unene, wati: ‘Ovanthu veli nokulinga ovipuka vimwe apa katutu mavinyono umwe ouye. Omapunda-umbo omanene maepwila momeva. Ouye uli nokutokota unene. Kuya nokuya ovinimawe vimwe vitilisa owoma. Omeva eli nokuhepa. Kouye omiti ominyingi vili nokuvomba-ko, novinyama. Otyo hakuti tuli nokufwanyeka, hamwe atuti okuhuta vala ovipuka. Otyo tulwete mokonda yonomakina mbutokota unene ovanthu veli nokuundapa nambo.’

 Omukanda umwe utiwa The New York Times, monthiki 15 ya Junho yo 2022, wapopia okuti: ‘Ovanongo vokwatanga veli nokulondola ovanthu vati komanima oku tuhungi katuli-ale kokule otyipuka omphepo youye ili nokutokota haa matyinyono umwe onohika ambuho mbokuna omiti novinyama mbuna 423 [mo Estados Unidos], mokonda, ouye okutokota vala unene nambo kamambusilivila vali. Ovipuka ovivi vipondola okumoneka uti umwe vala ovihuna viapopiwa Mombimbiliya: otupia, omeva omanene, omeva okwelikwata asenguluka, elunga litutumba, nomphepo itokota unene.’ — ‘Kuna Nokuya Onombila Ononene Mbunyona.’

 Okuti tyitavela umwe okutyimana-ko otyo tyomphepo youye ili vala nokutokota? Ine tyitavela, olie metyimane-ko? Tala etyi Ombimbiliya yapopia:

 Ombimbiliya yati Huku ‘makahanya-ko vana veli nokuhanya ohi.’ (Eholololo 11:18) Ovelesikulu oyo Yombimbiliya itulongesa ovipuka vitatu:

1.  1. Ovanthu mavalingi umwe ovipuka mavinyono unene ohi.

2.  2. Otyo yatyo tyokunyona ohi matyikapwa-ko.

3.  3. O Huku meketyimana-ko tyomphepo youye itokota, havanthu-ko.

 Ombimbiliya yapopia okuti “ohi ikalako apeho.” (Eclesiastes 1:4) Kombanda yohi apeho vala makukala ovanthu.

•   “Vokulinga evi viaviuka mavakapiñgana ohi, avakakala-ko apeho.” — Salmo 37:29.

 Ohi maikaviukiswa aikala umwe nawa-nawa.

•   “Oluhandya, notyilongo tyokwakukuta, mavikahambukwa, oluhandya malukahambukwa, alukamena ononthemo ononyingi.” — Isaías 35:1.