Okukala tyehena ovilinga katyikuhepesa vala onombongo, mahi tupu tyikalesa omapita ombunga yove, tyikusoyesa vala, tupu tyikutokotesa omutwe. Tala ovipuka matupopi kombwelo oku viapolwa Mombimbiliya vipondola okukukwatesako.

•   Popila vakwenyi oñgeni tyikukalesa.

   Ombimbiliya yati: “Epanga liotyotyili, oyou ukuhole umwe apeho.” — Provérbios 17:17.

   Okupolwa movilinga tyipondola okukusoyesa, pamwe atyikunumanesa, olitombo umwe vala, pamwe ohulilwa umwe neetyi ulinga ohetyii-ale vali. Okupopila ombunga yove, nomapanga ove oñgeni tyikukalesa, vapondola umwe okukukwatesako otulu omutima. Pamwe vapondola umwe okukupopila otyipuka matyikukwatesako uvase ovilinga ovikwavo.

•   Wahalinge unene otyiho.

   Ombimbiliya yati: “Muhakalei notyiho nonthiki yamuhuka, mokonda onthiki yamuhuka maikala notyiho tyayo.” — Mateusi 6:34.

   Ombimbiliya itupopila okuti otyiwa okupanga nawa evi matulingi. (Provérbios 21:5) Mahi tupu itulondola twahalinge unene otyiho nonthiki yamuhuka. Pamwe twakala-kala-le notyiho novipuka vimwe, mahi ngwe nii vala aviahamoneka-le. Nanyo, otyiwa okuti nga kwatya, ohambukilwa umwe vala etyi una-tyo.

   Ine pehepano una otyiho, Ombimbiliya ipopia onondunge mbumwe mbukahi nawa mbupondola okukukwatesako. Tanga onthele yati “Oñgeni Molambela Motyitateka Tyokusoya?” opo unoñgonoke vali etyi tyayemba ku otyo.

•   Kovipuka uhole okulanda tepulula-ko.

   Ombimbiliya yati: “Ame ndyityii oñgeni tyikalwa . . . novipuka ovinyingi nokuhena natyike.” — Ova Filipu 4:12.

   Omu wakalela, omo umwe vala nkhele utyiliyila. Otyo tyilekesa okuti kovipuka ulanda-landa pahe una okutepulula-ko, opo wahalande vala ovipuka ovinyingi otyo wehena onombongo. Soka umwe nawa, ohalevala vala naapa tyehesukisile. — Provérbios 22:7.

   Opo unoñgonoke vali etyi una okulinga opo wahanyane nonombongo una-mbo, tala onthele yati “Oñgeni Tyikalwa Netyi Tyehehi.”

•   Wahanyane nomuvo.

   Ombimbiliya yati: “Tualeiko okueenda nounongo . . ., mokuundapesa nawa omuvo wenyi.” — Ova Kolosu 4:5.

   Namphila nkhele wehena ovilinga vivalulwa umwe okutiwa ovievi, otyiwa okutala nawa etyi ulinga momuvo unao. Otyo matyikukwatesako otyivili okwonganeka umwe nawa ovipuka, mwene noove atyikukalesa nawa.

•   Kese vilinga uvasa undapa vala.

   Ombimbiliya yati: “Kovilinga aviho omunthu atutumba navio kutunda oviwa.” — Provérbios 14:23.

   Kala nomutima wapepuka utyivile okulinga ovilinga viatyo aviho, neevi vielikalela novilinga wetyiliyile. Upondola okuundapa no movilinga ngoti vitombesisa vala, neevi vifeta vala katutu, viahafete ngeetyi wafetailwe movilinga wali.

•   Wahaponwe.

   Ombimbiliya yati: “Kuna ombuto yove komuhuka, wahapululukiswe omavoko ove atee kongulohi; mokonda ei maikayela-po ove kuyii.” — Eclesiastes 11:6.

   Wahaponwe twalako nokutaindya ovilinga. Popia movanthu okuti uli nokutaindya ovilinga. Popila venyi, nomapanga ove, naava mwaundapaile navo, naava mwelitungaila navo. Otyo ukapula pu ava vaundapelwa, naava vaikula pahe ovilinga vesuka novanthu. Apa weiva pena ava vapula evi ovanthu vevila, enda-po, tupu honeka omikanda ominyingi vipopia okuti wesuka novilinga.