Konyima oku, ovanthu pahe ankho vasoka umwe okuti ouye ukahi nawa, ovatumini ovanyingi velivila, pahe ankho ouye maukala umwe nombembwa. Mahi pahe nevi vili nokumoneka pehepano, ovanthu velipula vala ovinyingi.

•   “Otyilongo tyo Israel novo Hesbola vahimbika nokulilwisa kononthele oku mbo Libano. Ovanthu pahe valinga otyiho tyokuti ovilwa vyo ko Gaza mavilityandyana aviya no kovilongo ovikwavo.” — Reuters, January 6, 2024.

•   “Ovatumini voko Irão vekahi nokuhongiliya ovanthu vakalwise ovilongo ovikwavo, otyo ngwe vahimbika vali nokupangiya omauta omanene. Ovilongo vili popepi no Irão vialinga unene otyiho, haunene umwe mokonda o Irão ikahi nokuundapela kumwe no Russia no China.” — The New York Times, 7 ya Kupupu yo 2024.

•   “O Russia na hono itwalako vala okulwisa o Ucrânia tyokuhanda umwe okwiinyima-ko.” — UN News, 11 ya Kupupu yo 2024.

•   “O China yati umwe oyo yamona unene, oyo ili nokuyawisa vala komafwalali no komauta omanene. Otyilongo tyo Taiwan katyihande okutuminwa no China. Ovatumini voko China novatumini voko Estados Unidos ngoti pahe tyokwehelivili tyina nokuvilapo. Omu tutyeetele, pohika opo papondola okunkhinduka ovilwa.” — The Japan Times, 9 ya Kupupu yo 2024.

 Okuti hamwe Ombimbiliya ina-vo tyimwe yapopia tyiyemba kweetyi tweete hono tyovilongo okwehelivili? Okuti hamwe otyo matyinkhindula ovilwa vya tatu viouye auho?

 Ombimbiliya kayapopile okuti makukakala ovilwa kotyilongo tyongandi no tyongandi, mahi yapopia okuti mononthiki mbetu makukaenda ovilwa mavipolo “ombembwa kombanda yohi.” — Eholololo 6:4.

 Omukanda wa Ndaniyele wapopia okuti “komuvo wonthyulilo,” ovilongo vimwe ‘mavikelitahaula’ vitale otyipi otyinene vali matyitumina ouye auho. Ombimbiliya tupu yapopia okuti opo vetyivile, mavamanena onombongo ononyingi mokupangiya omauta omanene nokutaindya omafwalali. — Ndaniyele 11:40, 42, 43.

 Ombimbiliya yapopia okuti ovipuka mouye ha maviviuku umwe, mahi nkhele tete mavivili-po okukala omapita. Sesusi wati: “Makukeya ononkhumbi mbumwe ononene, mbehenomoneke-ko nkhele tya nthyimbi youye atee hono.” (Mateusi 24:21) ‘Ononkhumbi ononene’ mambukapwa vala ‘movilwa vionthiki onene ya Huku, Omuvili wa Atyiho.’ Ovilwa ovio, mʹOmbimbiliya viatiwa o Alumangendom. — Eholololo 16:14, 16.

 Movilwa vyo Alumangendom, Huku makahanya-ko ovatumini aveho mokonda veli nokukondyesa ovanthu novilwa viavo. Naina ovilwa vyo Alumangendom, kamaviya okuhanyako ovanthu, maviya okuveyovola kononkhumbi vakondya nambo. Mahi oñgeni o Alumangendom mayeetela ombembwa ovanthu? Tanga ononthele ombu mbuli kombwelo utyinoñgonoke.

•   “Ovilwa Vyo Alumagedom, Oityi?”

•   “O Alumagedom Otyipuka Otyiwa!”