Ononthiki ombu ovatumini veliongiyile vatale etyi vapondola okulinga vamaneko ovihuna vili nokutumbuka mouye. Eliongiyo olio litiwa Conferência das Nações Unidas sobre Mudanças Climáticas (COP27) liapwa mo Tyalumingu 20 ya Novembro yo 2022. Vapopia okuti mavaongiya onombongo na vakwateseko vokuli movilongo aviho muli nokutumbuka unene ovihuna. Mahi ovanthu ovanyingi kavetavela okuti mavetyivili umwe okumanako ovitateka ovio.

•   ‘Otyipuka otyo twasoka tyokutaindya onombongo tukwateseko vakwetu vokuli nokutumbukilwa novihuna tyikahi nawa. Mahi nii vala kamatyituuka mokonda ohi ikahi vala ngomuvei wavela unene uli mosipitali.’ — Tyapopiwa monthiki 19 ya Novembro yo 2022, na António Guterres, wakalela komutwe o Nações Unidas.

•   “Otyipuka ohi ikahi, apa katutu kamamutavela vali okukala.” — Tyapopia monthiki 20 ya Novembro yo 2022 na Mary Robinson, wali omutumini woko Irlanda, aundapa vali ko Nações Unidas.

 Ovakwendye novahikwena ovo valinga vali unene otyiho, vasoka okuti apa katutu mouye kamamutavela vali okukala. Okuti ovatumini mavaundapela umwe kumwe avetyivili okumanako ovihuna? Oityi Ombimbiliya ipopia?

 Ombimbiliya ipopia okuti ovanthu vapondola umwe okututumba opo vamaneko ovihuna, mahi nii vala kamavetyivili-ale. Tala omokonda yatyi vahametyivilila:

•   “Tyapenga katyivilwa okuviukiswa.” — Eclesiastes 1:15.

   Onondaka ombo mbuhanda okutiwi? Ovatumini kavetyivili okumanako ovitateka vili mouye mokonda ovanthu kavatungilwe opo velitumine. (Jeremias 10:23) Vapondola umwe okulikwata-po avatutumba umwe, mahi nii vala kavetyivili-ale okumanako ovitateka vikahi mouye omu.

•   “Ovanthu mavakakala vokulihole ovo muene, vokuhole onombongo, . . . vehetavela okulipakaila-mo.” — 2 Timotiu 3:2, 3.

   Onondaka ombo mbuhanda okutiwi? Ombimbiliya yapopia-le okuti ovanthu mononthiki mbetu kamavesukwa-le na vakwavo.

 Ouye maukala umwe nawa, mahi havanthu-ko maveuviukisa. Huku una ou akoya atumine meya okuviukisa ouye. Wakoya Sesusi Kilisitu. Ombimbiliya yati:

•   “Matumina atiwa Omulongesi Uhuvisa, Huku Yepondolo, Tate ya Apeho, Ohamba Yombembwa.” — Isaías 9:6.

 Sesusi na ava atumina navo veli keulu. (Mateusi 6:10) Sesusi omunongo natyike tyimupona. Utuhole, uhanda ñgeno tukala umwe nawa. (Salmo 72:12, 16) Meya okumanako aveho “vana vahanya ohi,” aviukisa ovipuka ovanthu vanyona-nyona. — Eholololo 11:18; Isaías 35:1, 7.

 Opo unoñgonoke umwe nawa etyi matyilingwa opo ovipuka mouye viviuke tanga onthele yati: “Mudanças climáticas e o futuro da humanidade — O que a Bíblia diz?”