O Nações Unidas (Omalongo Aongana) yapopia okuti:

•   Monthiki 7 atee 23 ya Kulindi yo 2023, mepunda-umbo litiwa Gaza ko Isilayeli mwankhinduka ovilwa amwipawa ovanthu valamba 6.400, vena 15.200 vesala veliveta-veta vamwe vesala ovilema. Aveho ovo ngootyo, vavasiwa vala momaumbo avo. Tupu ovanthu ovanyingi ovityita novityita, vataulila kovilongo ovikwavo.

•   Tyina twati monthiki 24 ya Tungonkhe yo 2023, ovilwa vyo Rússia no Ucrânia, viaipaa ovanthu 9.701, vena 17.748 vesala veliveta-veta vamwe vesala ovilema mo Ucrânia.

 Oityi Ombimbiliya ipopia tyipameka ovanthu vamonena emone movilwa?

 Ombimbiliya ipopia okuti Huku makamanako “ovilwa kombanda yohi aiho.” (Oviimbo 46:9) Ouhamba wae, oo mauya okupinga-ko omautumini aeho ovanthu. (Ndaniyele 2:44) Outumini wa Huku, maweetela ombembwa ovanthu aveho.

 Tala etyi Sesusi Kilisitu, Ohamba Youhamba wa Huku, makalinga:

•   “Makayovola omuhepi uulula onkhwo, wahanda okukwateswako, no wokwamona emone na una wehena ou umukwatesako. Makaetehila-mo onkhenda wokumona emone nomuhepi, akayovola omienyo viovahepi. Mekeveyovola ko vokuvelinga onya no vokuveveta.” — Oviimbo 72:12-14.

 Huku matumu ohamba youtumini wae, aikamana-ko ononkhumbi ambuho mbutuka kovilwa, no koungangala.

•   “Ngwe makasekuna ononkhuka momaiho avo, kakukankhiwa vali, kakukalilwa vali, kakukaululwa vali onkhwo, nii onongembia kambukakala-ko vali. Ovipuka vyo kohale vialamba-le.” — Eholololo 21:4.

 Apa katutu Ouhamba wa Huku, nao maulipake povipuka vili nokulingwa kombanda yohi. Ombimbiliya yetyipopia-le yati: “Mamukeiva ovilwa, nomatompho ovilwa,” ya hono otyo tweete umwe otyo. (Mateusi 24:6) Ovipuka ovio novikwavo vali, vilekesa umwe nawa okuti tuli ‘kononthiki mbahulilila,’ apa katutu tyokutuminwa novanthu kamatyikala-ko vali. — 2 Timotiu 3:1.