•   “Vo kotyilongo tyo China vapopia okuti enima lino pokwenye omutenya watokotele vali unene tyipona omanima omakwavo, otyo ombila yatyo kayalokele-ale.” — Omukanda The Guardian, 7 ya Setembro yo 2022.

•   “Eli enima lya tano ovanthu kovilongo vimwe vyo Afrika valiwa umwe unene nomutenya.” — Omukanda UN News, 26 ya Agosto yo 2022.

•   “Mokutala enima lino, ovilongo vimwe vyo ko Europa mavikondyo nomutenya watokota unene. Otyipuka otyo apa twetyihula pena omanima 500.” — BBC News, 23 ya Agosto yo 2022.

 Ovanongo ovanyingi vokwatanga vapopia okuti otyipuka otyo tyomutenya okutokota unene, ombila ayahaloko, matyitwalako vala, tyipondola atyivilipo vali. Okuti hamwe kumbi ovipuka mavikala-vo nawa? Oityi Ombimbiliya ipopia?

 Ombimbiliya yapopia-le okuti kononthiki mbetu:

•   “Ponomphangu ononyingi mapakakala ondyala.” — Luka 21:11.

 Pana pehena ombila, pena ondyala. Pana pena ondyala, pena ononkhumbi nononkhia. Otyo Ombimbiliya yetyipopia-le okuti otyo matyimoneka mononthiki mbetu. — Eholololo 6:6, 8.

 Ombimbiliya ipopia umwe nawa omokonda yatyi omutenya uli nokutokotela unene. Yati:

•   “Omunthu weenda nonomphai mbae vala hae-ko umbululika.” — Jeremias 10:23.

 Onondaka ombu mbahanda vala okupopia okuti omunthu ketyivili okutumina ahanyono tyimwe. Ovipuka ovinyingi valinga, ovio vili nokulingisisa pahe omutenya uli nokutokota unene, nombila okwahalo.

•   Ovanongo ovanyingi vokwatanga vehole okupopia okuti ovanthu ovo mwene veli nokunyona eheke, pahe ombila kailoko vali.

•   Ovanthu vena elungavi. Vati umwe ovo vatyoka vala tyawina omiti, ovo vasilisa omphepo, kavesukile-ale. Otyo onondongi mbuli vala nokukukutila, omaande aahamoneka.

 Ombimbiliya ipopia okuti ovipuka haa mavikakala nawa.

 Ombimbiliya ipopia okuti otyipuka otyo tyomaande okwahamoneka matyilambe, Huku meketyiviukisa. Mahi makalinga ñgeni?

1.  1. Huku ‘makahanya-ko vana vahanya ohi.’ (Eholololo 11:18) Makapola-ko etyi tyili nokweeta ovitateka evi vyo maande tuli nokumona: ovanthu vahanda vala onombongo veli nokunyona eheke. — 2 Timotiu 3:1, 2.

2.  2. “Ohika yokwakukuta, maikakala eiva lieyula omanyenga.” (Isaías 35:1, 6, 7) Ombila okwahaloko yeeta ovitateka ovinyingi. Huku pahe wati makamanako ovitateka ovio aviho, ohi eiviukisa aikala nawa, aikala umwe nomaande omanyingi.

3.  3. “Ove uyunga nawa ohi, wiivovesa nawa aiyele ovikuna ovinyingi.” (Salmo 65:9) Huku meketukwatesako atukala nokulia okunyingi, nomaande asukuka nawa.