WAHATALUKWE LUNGUKA!
Ombila Ikahi Nokunyona Ovipuka — Oityi Ombimbiliya Ipopia?
Mouye auho, ombila ina nokuloka unene, ina nokuhanya ovipuka. Nkhele tala:
‘Okupolelela motyasapalo atee mukwana, ombila yaloka unene mepunda-umbo enene vali lyo China. Apa ombila yahula okuloka umwe ngootyo ko China, pena-le omanima 140.” — AP News, 2 ya Agosto yo 2023.
‘Ko Japau kwaloka ombila imwe onene yeya nomphepo aipaa ovanthu vevali. Otyipuka yaloka ko Japau, mokutala noko Taiwan mailoko umwe unene tyokuhanya ovipuka.’ — Deutsche Welle, 3 ya Agosto yo 2023.
“Omaande aa tweete apa mepunda-umbo lyo Nova Escôcia, atuka umwe kweetyi ombila yaloka unene kononthele mbelunga lyo Canada. Apa o Canada yahula ombila ngooyo pena-le omanima 50.”—BBC News, 24 ya Julho yo 2023.
Oityi Ombimbiliya ipopia?
Ovipuka mavimoneka ‘mononthiki mbahulilila’
Ombimbiliya yati tuli ‘mononthiki mbahulilila.’ (2 Timotiu 3:1) Sesusi watile mononthiki mbetu ankho makukamoneka “ovipuka vitilisa owoma.” (Luka 21:11) Otyo hono tumonena vala ovihuna twehenemone-ale, vitilisa vala owoma.
Apa katutu ovipuka mavikala nawa
Sesusi watile: “Tyina mwamamono ovipuka ovio, noñgonokei okuti Ouhamba wa Huku uli popepi.” Naina ovihuna evi tweete hono, vilekesa okuti apa katutu ovipuka mavikala nawa. — Luka 21:31; Mateusi 24:3.
Apa katutu Ouhamba wa Huku mauya okuviukisa ovipuka pano ohi, ovipuka aviundapa umwe nawa, ombila ailoko umwe nawa aihilingi vali ngeetyi ina nokulinga hono. — Sombe 36:27, 28; Oviimbo 107:29.
Opo unoñgonoke etyi Ouhamba wa Huku maukalinga uviukise eheke, tanga onthele yati: “Quem Vai Salvar a Terra?”