Momukanda umwe walingwa mu Junho yo 2022, wokwakalela komutwe o Grupo Banco Mundial (vombango yokuyunga onombongo mbovilongo novilongo) wapopia okuti: ‘Onombongo mbuli vali nokuhepa mouye. Ovipuka vili vala nokutena, ngwe onombongo ovanthu vetupu!’

 Vokupaka onombongo movilongo aviho (Fundo Monetário Internacional) vati: “Onopelesu mbomilela vyo momatuku-tuku, novikulia mbuli vala nokwenda liwa-liwa no peulu, pahe movilongo viokwehena-tyo-ale atyivelemena umwe.”

 Ombimbiliya itukwatesako okunoñgonoka omokonda yatyi twakalela novitateka viatyo ngoovio vialema, neetyi tuna okulinga tyina tuna ovitateka viatyo ovio, neetyi matyikevimana-ko aviahakala-kala-ko umwe vali.

•   Omuvo uno tuli Ombimbiliya yeuti “ononthiki mbahulilila.” — 2 Timotiu 3:1.

•   Sesusi watile mononthiki mbatyo mbuno makumoneka “ovipuka vitilisa owoma.” (Luka 21:11) Tyina ovipuka vivilapo vala okutena, ovanthu tyivetilisa owoma. Ovanthu tyivepa umwe vala otyiho oñgeni mavakakala komutwe, pamwe velipula ine mavetyivili umwe okutekula omaumbo avo.

•   Omukanda Eholololo wetyipopile-ale okuti okulia momuvo wonthyulilo makukatena unene, wati: “Neiva otyipuka tyilinga ngondaka . . . Ondaka oyo aiti, ‘Okilu ike yotiliku ilanda etyi omunthu afetwa monthiki; onokilu ononthatu mbosevata mbulanda etyi omunthu afetwa monthiki.’” — Eholololo 6:6, Bíblia Fácil de Ler.

 Opo unoñgonoke vali etyi tyayemba “kononthiki mbahulilila,” neetyi tyapopiwa momukanda Eholololo, tala ovindiu yati, Ouye Wapiluluka Unene Tunde mo 1914, tupu tanga onthele yati, “Ovalie Vavelama Kononkhambe Ononkhuana?”

•   “Mavakatunga omaumbo, avakakala-mo. Mavakalima omapia omiti vionouva, avakalia ovinyango viatyo. Kavakatunga, amukakala vakwavo, nii kavakatwika omiti, avikaliwa na vakwavo.” — Isaiya 65:21, 22.

•   “Kombanda yeheke makukakala ovilia ovinyingi, nokulia okunyingi-nyingi atee pokatanga-tanga konomphunda.” — Salmo 72:16.

•   “‘Mokonda vokwehulilwa valingwa onya, mokonda vokwahepa vekahi nokukema, ame mandyikatuka andyilingi etyi ndyilinga,’ o Siovaa watola.” — Salmo 12:5. a

 Apa katutu Huku mamane-ko oluhepo, hamotyilongo tyike vala, mahi o mouye watyo umwe auho. Opo utale oñgeni metyilingi, tanga onthele yati, “Okuti Tyitavela Umwe Okumana-ko Etyi Tyokuti Ava Vena-tyo Ava Vahepa?”

 No pahetyino umwe, Ombimbiliya ipondola okukukwatesako umone etyi molingi tyina ovipuka vili vala nokutena. Oñgeni ipondola okukukwatesako? Ombimbiliya ipopia oñgeni tupondola okukwata nawa onombongo mbetu. (Provérbios 23:4, 5; Eclesiastes 7:12) Opo utyinoñgonoke vali, tanga onthele yati, “Wahanyane Novipuka Viove”, no yokwati, “Oñgeni Tyikalwa Netyi Tyehehi.”