WAHATALUKWE LUNGUKA!
Ovatumini Mouye Auho Vamanena Onombongo Ononyingi-nyingi Momafwalali — Oityi Ombimbiliya Ipopia?
Mo 2022, ovatumini mouye auho vamanena onombongo ononyingi-nyingi (onondolale mbakatuuka 2.24 trilhões) mokulanda omauta novipuka ovikwavo vali omafwalali esukisa movilwa. Otyipuka otyo tyatuka umwe etyi vamona okuti o Rússia ikahi nokulwisa o Ucrânia. Mohanyi ya Abril yo 2023, o Stockholm International Peace Research Institute (SIPRI), yati okuti mo 2022:
Ovatumini voko Europa ‘vayawisa unene konombongo vamanena momafwalali. Otyipuka otyo twetyihula umwe mo 1991.’
‘O Rússia yayawisa unene konombongo imanena momafwalali no momauta. Pana ankho mouye auho, o Rússia otyilongo tya tano tyimanena vali onombongo momauta, mahi pahe pehepano, otyilongo otyo otyilongo tya tatu.’
O Estados Unidos na hono nkhele otyo otyilongo tyimanena vali onombongo mokulinga omauta no momafwalali. Tupopia ngootyo mokonda ‘ine tuhonyeka onombongo ambuho ovilongo aviho vimanena momauta no momafwalali, o Estados Unidos oyo imana vali onombongo ononyingi.’
“Okusoka umwe nawa konombongo ononyingi ovatumini veli nokumanena momauta no momafwalali, tutyimona umwe okuti ouye ou pahe kawapamene-ale vali.” — Tyapopiwa na Dr. Nan Tian, umwe po wokwahoneka o Stockholm International Peace Research Institute.
Ombimbiliya yetyipopia-le kohale okuti mononthiki mbetu ovatumini kamavekelivila. Mahi tupu yapopia etyi matyeeta ombembwa mouye.
Ombimbiliya yapopia-le okuti ovilwa mavikeliyawisa unene
Omuvo uno tukahi Ombimbiliya yeuti “ononthiki mbonthyulilo.” — Daniel 8:19.
Omukanda wa Daniel wapopia okuti mononthiki mbonthyulilo, ovatumini mavekelinana-nana vatale olie omunene vali atumine ouye. Mokulinana-nana omo, Ombimbiliya yati ankho mapapesekela “olumono” olunyingi. — Daniel 11:40, 42, 43.
Opo unoñgonoke vali nawa otyipuka otyo, tala ovindiu yati: Eulo Liafuisuapo — Daniel Okapitulu 11.
Oityi matyilingwa opo kukale ombembwa
Ombimbiliya yati: “[Huku] makapaka-ko ouhamba wahakahanywa-ko vali. Ouhamba oo, kamaukalinga vali wovanthu ovakwavo. Ouhamba oo, oo maukahanyako omauhamba oo aeho, maukeehanya-ko, ngao vala ukatumina apeho.” Naina Huku makapola-ko ovatumini aveho, ngae vala utumina ouye auho. — Daniel 2:44.
Apa katutu Siovaa a Huku makalinga otyipuka tyimwe ovanthu vehevili okulinga. Makaeta ombembwa yahapu. Otyo meketyilinga ñgeni? Tyina Ouhamba wae wameya okutumina pano pohi, kamakukakala vali omauta novanthu valwa. — Salmo 46:8, 9.
Opo unoñgonoke etyi Ouhamba wa Huku maukalinga tanga onthele yati: “Ouhamba wa Huku ‘Maukaeta Ombembwa.’”
a Siovaa enyina lya Huku. — Salmo 83:18.