Tyokulipumwa-po otyipuka tyimwe tyakaka mouye auho kuvana vatumina mahi tyeeta ovitateka ovinyingi. a Momukihi omu wo COVID-19 ovatumini movilongo ovinyingi vahungwa okuti ovipuka ñgeno inkha vikwatesako ovanthu momunkhi ou vevipolako. Otyipuka otyo tyalingisisa ovanthu okuhahakulwa umwe nawa-nawa otyinyingi tyovanthu vankhia.

 Okulipumwa-po otyipuka tyakaka mouye auho. David Cameron o ministro yotete yoko Grã-Bretanha wati: “Tyokulipumwa-po tyafwa ongoi yeuvi —ovilongo aviho viankhia-mo.”

 Mahi onthwe tupondola okukala nonthumbi yokuti apa katutu outumini auho wokulipumwa-po kamaukakala-ko vali. Omokonda yatyi? Tala etyi tyapopia Ombimbiliya okuti Huku otyo makalinga.

 Huku Mombimbiliya wapopia okuti: “Mokonda ame Siovaa ndyihole ouviuki ndyiyele oumphulu nevi vihaviukile.” b (Isaías 61:8) Huku utyimona putyina ovanthu valingwa onya pokulipumwa-po. (Provérbios 14:31) Ngwe walaa okuti: “Mokonda vokwehulilwa valingwa onya, . . . Ame mandyikatuka.” — Salmo 12:5.

 Oityi Huku makalinga? Huku kamakapilulula vala ovatumini vatyo veliko mahi mekevepola-ko akapaka-ko outumini wae utiwa: “Ouhamba wa Huku.” (Maluku 1:14, 15; Mateusi 6:10) Ombimbiliya yati: “Huku yo keulu, makapaka-ko ouhamba wahakahanywa-ko vali. . . maukatyopa-tyopa omauhamba oo aeho, maukeehanya-ko, ngao vala ukatumaina apeho.” (Daniel 2:44) Ongootyo Huku makamana-ko etyi tyokulipumwa-po tweete hono.

 Oityi tutila Ouhamba wa Huku maukalinga outumini umwe wehemkelipumwa-po vali? Nkhele tala vala.

1.  1. Ononkhono. Onononkhono Mbouhamba oo mbutunda ku Huku wokuvila Atyiho. — Eholololo 11:15.

    Omokonda yatyi outumini oo welikalelela: Opo outumini wovanthu utwaleko utei konombongo ovanthu vaava. Otyo pamwe vokutumina vetavelela okulipumwa-po. Mahi, Ouhamba oo ukwateswako na Huku wokuvila Atyiho, otyo apeho mautyivilila okwaavela ovanthu atyiho vesukisa. — Salmo 145:16.

2.  2. Omutumini watyo. Huku wanaka Sesesu Kilisitu alinge Ohamba Youhamba oo. — Daniel 7:13, 14.

    Omokonda yatyi Ohamba oyo yelikalelela: Pamwe nomutumini umwe ukahi nawa kasete-ale okuhindilwa okulinga otyivi novanthu. (Eclesiastes 7:20) Mahi Sesusi wapopile otyipuka tyimwe tyilekesa okuti ngwe kelipumwa-po. (Mateusi 4:8-11) Ovipuka aviho alinga, uvilingila okuhole ovanthu vae, uhanda vakale nawa. — Salmo 72:12-14.

3.  3. Ovitumino. Ovitumino vipakwa-ko Nouhamba wa Huku viaviuka, vikalesa nawa ovanthu. — Salmo 19:7, 8.

    Omokonda yatyi ovitumino ovio vielikalelela: Ovitumino vihindwa novanthu pamwe vipwilisa, nokuvilandula vialema, pamwe viapakwa apa pehepo-ale otyo ovanthu vayembela vala kokulipama-po. Mahi ovitumino vya Huku vikahi nawa vikwatesako ovanthu aveho. (Isaías 48:17, 18) Ovitumino ovio kavipopi vala etyi omunthu ena okulinga, mahi vipopia umwe etyi tyina okukala komutima wae. (Mateusi 22:37, 39) Tyotyili, Huku utala etyi tyili komutima, utyii umwe okuti etyi tyapopia ovitumino viae ovanthu aveho vetyivila okutyilinga. — Jeremias 17:10.

 Tukwiita unoñgonoke vali etyi Ombimbiliya ipopia tyiyemba kokuyovoka koutumini oo wokulipumwa-po.

•   Tanga onthele yati: “GoOuhamba wa Huku​ — Outumini Umwe Muhena Ounkhembi” opo unoñgonoke vali ovipuka vitatu vipopia omokonda yatyi Ouhamba wa Huku wehelipuminwa-po.

•   Tala ovindiu yokwati: Ouhambwa wa Huku Oityi? opo unoñgonoke vali outumini oo neetyi maukalingila ohi.

•   Ita Kombangi ya Siovaa ekulongese Ombimbiliya otyali vala, ekukwateseko okunoñgonoka oñgeni evi Ombimbiliya yapopia mavikeya komutwe vipondola okukukwatesako.