WAHATALUKWE LUNGUKA!
Tyikukutisa Omutwe, Tyovanthu Valoya Vala Vakwavo — Oityi Ombimbiliya Ipopia?
Mohanyi ya Julho yo 2022, ovanthu ovanyingi vaipawa nomauta mouye auho:
‘Etyi omulume umwe wiiwe unene [Shinzo Abe] wali wo pulitika aipawa mo Japão, otyilongo atyiho atyitumphuluka, ovanthu mouye auho atyivekukutisa omutwe, haunene umwe mokonda katyakakale-mo unene tyovanthu okuliloya motyilongo omo, novitumino viatyo vityiilika umwe unene tyokulikwatela omauta.’ — 10 ya Julho yo 2022, The Japan Times.
“Vo mo Dinamarca tyevekukutisa omutwe etyi omulume umwe aloya ovanthu vetatu movenda imwe onene mo Copenhague.” — 4 ya Julho yo 2022, Reuters.
“Mo África do Sul: Ovalume vamwe veya vala mombale avahimbika okuloya mu vakwavo nonopisitola, avaipaa ovanthu 15.” — 10 ya Julho yo 2022, The Guardian.
‘Mo Estados Unidos ovanthu ovanyingi valoya-loya mu vakwavo atyikalamba po 220, tupu mwaipawa ovanthu valamba po 220 nonopisitola, mahi aveho o mononthiki mbo tete vala mbohanyi ya Julho atee monthiki 4, ononthiki mo Estados Unidos muna ofeliyatu.’ — 5 ya Julho yo 2022, CBS News.
Okuti nthiki imwe ovipuka viatyo ngoovio mavikapwa-ko-vo? Oityi Ombimbiliya ipopia?
Ovipuka Ngoovio Ovivi Mavikapwa-ko
Omuvo uno tuli Ombimbiliya yeuti, “ononthiki mbahulilila,” omuvo umwe ovanthu vakala vala ovinyama, ovakalavi, vatyituka. (2 Timotiu 3:1, 3) Ovanthu okwiiva ovipuka viatyo ngoovio ovivi vilingwa, pahe apa veli vatila vala owoma. (Luka 21:11) Mahi Ombimbiliya yapopia okuti ovipuka viatyo ngoovio ovivi nthiki imwe vikapwa-ko, “ovanthu mavakakala momphangu yapama ina ombembwa, momaumbo apama, monomphangu mbapoleya.” (Isaías 32:18) Oñgeni ovipuka ngoovio mavikapwa-ko?
Huku makanyima-ko onondingavivi, nomauta atyo aeho.
“Onondingavivi kombanda yohi mavakanyimwa-ko.” — Provérbios 2:22.
“[Huku] ukahi nokumana-ko ovilwa kombanda yohi aiho. Uteya onkhondyi, ateya-teya eonga; uyoka omatemba ovakwa-vita notupia.” — Salmo 46:9.
Huku makanyima-ko umwe omwii watyo wovivi mokulongesa ovanthu vakale nombembwa na vakwavo.
“[Kamavekelilinga] otyivi natyike, nii [kamavakanyona] natyike komphunda yange aiho ikola, mokonda, tyotyili ohi maikeyula enoñgonoko lya Siovaa, ngeetyi omeva eyula melunga.” — Isaías 11:9.
Pehepano Huku uli-ale nokulongesa ovanthu mouye auho vayeke-po ovivi, nokulikwatela omauta, opo ‘omitunga viavo vevinthile omatemo, omaonga avo, veelinge onotisola mbokulombolola omiti.’ — Miquéias 4:3.
Opo unoñgonoke etyi Ombimbiliya ipopia tyayemba komuvo oo ovanthu mavakakala-ko tyehena vali owoma, tanga onthele yati, “Okuti Tyitavela Umwe Okukala Tyehena Owoma?”
Opo unoñgonoke oñgeni ovivi mavikanyimwa-ko aviahakala-kala-ko umwe vali, tanga onthele yati, “Paz na Terra enfim!” (Ombembwa Mouye).