Monthiki 24 yohanyi ya Maio yo 2022, mepunda-umbo lyo Uvalde, ko Texas, mo Estados Unidos, mwamonekele otyipuka tyimwe otyivi unene. Omukanda umwe utiwa The New York Times wati: ‘Mosikola yokulongehila ovana mo Robb, omunthu umwe weya-mo nouta, aipaa ovana 19 novalongesi vevali ovamee.’

 Ovipuka viatyo ngoovio ovivi viakaka unene hono mouye. Omukanda umwe utiwa USA Today wati, mo Estados Unidos vala, menima likwalamba ‘monosikola mwaloyailwa unene ovanthu, tyalingwa-lingwa umwe ehimbwe tyekehika po 249. Otyipuka ngootyo nkhele twahimbikile mo 1970 katyinelingwe.’

 Oityi ovipuka viatyo ngoovi ovivi vimonekela? Oityi tyipondola okutukwatesako tyina twatumbukilwa novipuka ngoovi ovivi? Okuti nthiki imwe ovipuka viatyo ovio mavikapwa-ko? Ombimbiliya ikumbulula omapulo oo.

•    Ononthiki mbuno tuli, Ombimbiliya yembuti “ononthiki mbahulila,” omuvo umwe ovanthu ovanyingi mavakala ovanthu “vehena olwembia na vakwavo,” “ovakalavi,” otyo tyilekesa okuti ankho mavalingi ovipuka vimwe ovivi unene. Ombimbiliya tupu yati: “Ovanthu mavekevilapo okulinga ovivi.” (2 Timotiu 3:1-5, 13) Opo unoñgonoke vali, tanga onthele yati: “Okuti Ombimbiliya Yapopile-ale Oñgeni Ovanthu Mavasoko Hono, Neevi Mavalingi?”

 Ovanyingi velipula okuti: ‘Omokonda yatyi Huku ahatyilikila ovipuka ovivi ngoovio vili nokulingwa monosikola?’ Opo unoñgonoke oñgeni Ombimbiliya ikumbulula epulo olio tala onthele yati: “Ovanthu Ovawa Navo Vamonekelwa Novivi — Omokonda Yatyi?”

•    “Ovipuka aviho viokwahonekwa kohale viahonekwa opo vitulongesa na tukale nekevelelo . . . nepameko litunda Movihonekwa.” — Ova Loma 15:4.

 Onondunge mbuli Mombimbiliya mbupondola okukukwatesako mouye uno mweyula ovivi. Tala mo Despertai!, onthele yati: “A Violência Vai Acabar Algum Dia?”

 Opo utale ovipuka vimwe vokuna ovana vapondola okulinga vakwateseko ovana vavo vatule omutima tyina veiva mo televisau no molaliu ovipuka ngoovio vitilisa owoma, tanga onthele yati: “Oñgeni Evi Vipopiwa mo Televisau no Molaliu Vikalesa Ovana Vove.”

•    “Mekeveyovola ko vokuvelinga onya no vokuveveta.” — Salmo 72:14.

•    “Omitunga viavo, mavekevinthila omatemo, omaonga avo, mavekeenthila onotisola mbokulombolola omiti. Otyilongo kamatyikakatukila vali otyilongo otyikwavo nomutunga, nii kamavakalongeswa vali okulwa.” — Miquéias 4:3.

 Huku malingi otyipuka tyimwe tyehevilwa-le na munthu. Ouhamba wae, outumini wo keulu, maukamano-ko omauta aeho, ovivi aviho aviahakamonaika-ko vali. Opo unoñongonoke vali etyi Ouhamba wa Huku maukalinga, tanga onthele yati: “Ouhamba wa Huku ‘Maukaeta Ombembwa.’”