Menima lino lyo 2024 monohanyi mbuno, mokutala otyipito ty’Olimbiku tyatalwa novanthu vehungi po 5.000.000.000, vatala ovayumbi vatunda kovilongo vina 206. Thomas Bach omunene watyo w’Ovaluliki Votyipito Ty’Olimbiku wati: “Tweya potyipito tyimwe tyiwaneka ovanthu mouye vakale nombembwa. Tunyanei otyipito nehambu nombembwa tyelikwata-po ngatyina tulii, tuvanthu veke, namphila twelikalaila.”

 Otyili otyipito otyo tyieta umwe ombembwa? Okuti kuna apa patuka ombembwa?

 Menima lino otyipito ty’Olimbiku katyayembele vali ko kokuyumba vala onombola. Otyinyano tyatyo hono, tyayemba vala ko viokwehelivili, kopulitika, no kovipuka viyapula vala ovanthu. Movipuka ovio mwati umwe novitumino viyakulila ovanthu, nokapungulula, nokulitoya mokonda yovikapela, nokaame, nokatongo-tongo.

 Okuyumba ombola novinyano ovikwavo vali, ngeevi vi’Olimbiku vimana ovanthu ounye. Mahi tupu povipito viovinyano ngoovio, ovipuka ovanthu valinga-po viyapaula ovanthu, ngwe otyo tyityopola ombembwa.

 Ombimbiliya yapopiale kohale okuti ovanthu mavakakala novituhiwa ovivi, okulikwatapo na vakwavo atyileme. (2 Timotiu 3:1-5) Opo unoñgonoke vali omaulo omakwavo Ombimbiliya, tanga onthele ei: “Será que a Bíblia já falava como as pessoas iriam pensar e agir hoje?”

 Ombimbiliya ipopia okuti mouye auho mamukakala ombembwa ovanthu avelikwatepo. Yapopiale okuti ovanthu vatyo aveho kombanda yeheke mavekelikwatapo, moutumini wo keulu utiwa, “Ouhamba wa Huku.” — Luka 4:43; Mateusi 6:10.

 Ohamba Youhamba wa Huku, Sesusi Kilisitu, maikaeta ombembwa mouye auho. Ombimbiliya yati:

•   “Omuviuki makayova, makukakala ombembwa onene apeho.” — Oviimbo 72:7.

•   “Makayovola omuhepi uulula onkhwo, wahanda okukwateswako. . . Mekeveyovola ko vokuvelinga onya no vokuveveta.” — Oviimbo 72:12, 14.

 No hono umwe, Sesusi unale nokulongesa ovanthu ovanyingi-nyingi velikwatepo veli movilongo 239. Onthwe onombangi mba Siovaa mouye auho twelilongesa-le okukala ovana-mbembwa. Opo utyitale tyaenda ñgeni, tanga Omutala Womulavi una osapi yati: “Lityilika Okuyala Vakuenyi.”