Ovatumini vo ko Ucrania vahanyapo otyilalo tyili pokati ko Crimea no Russia. Pahe ovatumini vo Russia vetyiyala umwe unene, monthiki 10 ya Outubro yo 2022, avayumbu onombomba mbahanya omapunda-umbo omanyingi oko Ucrania. Otyipuka otyo tyatilisa owoma, ovatumini vamwe vati mokutala o Alumangendom yahimbika-le.

•   “Nkhele vala tyo pononthiki mbomutumini John Kennedy, no pwetyi ovatumini vo ko Kumba vayumbile onombomba, kuno kakuneka-le ovilwa atusoko okuti o Alumangendom yeya. . . . Mahi movilwa evi, ine vatutanesa umwe onombomba onene mbatyo, matuti umwe Alumangendom yeya-le.” — Tyapopiwa nomutumini woko Estados Unidos Joe Biden, monthiki 6 ya Outubro yo 2022.

•   Omutumini woko Ucrania Volodymyr Zelensky wati: “Otyipuka etyi tyina nokulingwa, o Alumangendom yehimbika umwe. Ine katulunguka ouye auho mauhanywa-po.” — Wetyipopia monthiki 8 ya Outubro yo 2022, etyi eiva okuti ko Ucrania makuyumbwa onombomba ononene.

 Ine movilwa ovio vyo Russia no Ucrania ovanthu veliyumba onombomba ononene, okuti ngotyo o Alumangendom maihimbika? Oityi Ombimbiliya ipopia?

 Au. Ondaka oyo “Alumangendom” yapopiwa vala like mo Mbimbiliya, momukanda Eholololo 16:16. Mahi kaipopi ovilwa evi tweete, otyilongo okulwisa otyilongo otyikwavo. Ipopia onthiki Huku makalwisa “onohamba mbo kombanda yohi aiho,” embuhanyeko ambuho. — Eholololo 16:14; Daniel 2:44.

 Opo ungonoñgonoke oñgeni ohi maikala tyina o Alumangendom yamalambe, tanga onthele yati: Ovilwa Vyo Alumagedom, Oityi?

 Au. Ovatumini vapondola umwe okulwa nomauta omanene, mahi Huku nii kamayeke ahanyepo ouye auho, mokonda Ombimbiliya yati:

•   “Ohi maikala-kala-ko apeho.” — Eclesiastes 1:4.

•   “Ovaviuki mavakakala kombanda yeheke, avakakalako apeho-apeho.” — Salmo 37:29.

 Mahi tupu Ombimbiliya ipopia umwe okuti, ovipuka vili nokumoneka mouye vilekesa umwe nawa okuti tuli konthyulilo. (Mateusi 24:3-7; 2 Timotiu 3:1-5) Lilongesa Ombimbiliya no onthwe unoñgonoke etyi matyikamoneka komutwe wandyila.