Mohanyi ya Março yo 2022, Ononkhalamutwe mbo Nombangi mba Siovaa vatile: “Movilongo aviho omu ovatumini vayeka ovanthu vakale mphagwa ike, mupondola okuliongiyila Monondyuo Mbomaliongiyo okuhimbikila monthiki 1 ya Abril.” Mahi ankho nkhele omukihi kaunepwe. a Oityi tyalingwa-po ovanthu vahayambule omukihi?

 Hamwe kamutyii, mahi opo tuhimbike okuliongiyila Monondyuo Mbomaliongiyo pena ovilinga ovinyingi vialingwa-po.

 Etyi tyatiwa kamatuliongiyila vali Monondyuo Mbomaliongiyo, vokuayemba kotyilinga tyokutunga vo kombala, avasoko etyi tyina okulingwa opo haa tyitavele okuliongiyila Monondyuo Mbomaliongiyo atuahayambula omukihi.

 Evi ankho viesukisa kotyilongo tyimwe havio-ko ankho viesukisa kotyilongo otyikwavo. Omukulu umwe wo kombala utiwa o Matthew De Sanctis, nae uli motyilinga tyokutunga, wati: “Kovilongo vimwe, Ponondyuo Mbomaliongiyo ankho petupu apa vakoha pomaoko mokonda kutupu omaande. Omaande okulanda umwe, okuti hatyo, amukatapa konondongi no kononyombo. Movilongo ovikwavo ovatumini vapopia umwe nawa etyi tyilingwa netyi tyahalingwa.”

 Oityi tyalingwa-po ovipuka ovio viehetutyike okuliongiyila Monondyuo Mbomaliongiyo? Omukulu oo Matthew wati: “Atusoko okulinga ovipuka vimwe vikahi nawa, vihepuiya, oku tupu viahamane onombongo ononyingi.” Kotyilongo tyo Papua Nova Guine, atulandela-ko onombaliti mbuna onotulunela, atumbupake Ponondyuo Mbomaliongiyo. No komaumbo umwe ngotyo vala tulinga otyo, atyihamane-ale onombongo ononyingi, apanyingila vala onondolale mbuna 40. Ko Africa atulande ovipuka viokulikohela pomaoko, atulande umwe evi vina 6.000.

 Monondyuo mbumwe Mbomaliongiyo twapola-mo ovipuka vimwe, atupake-mo ovikwavo opo mufile nawa omphempo. Omawaneno amwe alanda otyipuka tyimwe oku vatentheka omikolo opo ovanthu pokukumbulula veheikwate vali. Ovanthu vamwe ankho vati vala, avakala avasekuna pomapito, avakala avasekuna pomapito. Ankho valinga ngotyo opo ovanthu vahayambule ouvela. Monondyuo mbumwe Mbomaliongiyo amupakwa oumakina umwe, ufwenaika-po vala okuoko kuove amutundu o álcool-gel.

 Twaundapele umwe opo Onondyuo Mbomaliongiyo mbukale nawa, mahi tupu ankho katuhande okumanena-mo onombongo ononyingi. Kovilongo vimwe ovatumini avati vana mavalande ovipuka viokulikohela pomaoko, no viokupaka onomikolo, kamavafete onombongo ononyingi. Etyi twetyiiva, onthwe atulande umwe ovinyingi. Vo mono Mbetele no vo kombala, ankho valanda umwe vala kovanthu vatyo vevilinga. Twetyimona okuti okulanda kovanthu vatyo vevilinga, tyati umwe otyo tyaneñgena vali, tupu kavisete okuhika.

 Ovanthu vakala umwe nawa novilinga ovio Eongano lialinga. Omuhikwena umwe utiwa o Dulcine ukala ko Perú wati: ‘Etyi netyiiva okuti pahe matuliongiyila Monondyuo Mbomaliongiyo, anehetyihande nawa mokonda etyi omukihi wahimbika na ame nayambulile. Ankho ndyisoka okuti okueenda Kondyuo Yomaliongiyo mandyiyambula ñgo vali omukihi. Etyi nehika-ko andyimono okuti ikahi nawa, vapaka-mo ovipuka ovinyingi opo ovanthu veheliyambulise omukihi. Ankho pena apa tulikohela pomaoko, omikole katuikwate pokukumbulula, tyina eliongiyo lihenehimbike nkhele mukombwa nawa, tyina liamapu amukombwa vali. Etyi namona umwe ovipuka ovio aviho, anahalingi vali otyiho, andyitulu omutima.’ b

 Sara ukala kotyilongo tyo Zambia wati: “Omulume wange wanyima nomukihi. Tyina ankho ndyisoka umwe okwenda keliongiyo andyike, ndyiponwa umwe.” Mahi etyi pahe aya keliongiyo akala ñgeni? Wati: “Etyi twahimbika okuliongiyila Monondyuo Mbomaliongiyo, andyityimono umwe okuti Siovaa una onthwe mononthiki mbuno mbonthyulilo. Vakwetu mewaneno novakulu vewaneno vamphamekele unene, andyityimono umwe okuti hikahi andyike.”

 Aveho mouye auho vapandula unene etyi pahe twakondoka Monondyuo Mbomaliongiyo. No onthwe twapandula unene etyi muhole okwaava onombongo mbenyi, vamwe vaavela vala mo donate.pr418.com. Aluho tuna ñgaa Onondyuo Mbomaliongiyo mbukahi nawa, onombongo muhole okwaava.