OVIAWA ULINGA VIENDA NAPI?
Okanale ko JW Satelite Kehika Kuna Kuhena o Internet
1 YA ABRIL YO 2021
Onohanyi ambuho tukevelela nehambu enene omaliongiyo no novidiu mbo JW Broadcasting. Ovakwatate vetu ko África ovipuka ovio kavetyivili okuvipola mo Internet. Omokonda yatyi?
Monomphangu ononyingi movilongo vyo África mutupu o Internet. Alo pana ivasiwa kaisilivila, okuti hatyo ilanda onombongo ononyingi. Mongeleka, omutalelipo umwe womawaneno ko Madagáscar etyi apola o JW Broadcasting mo site no internet yo mondyuo imwe yokulandesa okafe, afete onondolale 16, (tyituuka 9.552 00KZ). Motyilongo otyo kavehi ovanthu vafetwa onombongo ombo mosimanu! a
Namphila vena ovitateka ovio, ovanthu ovanyingi pahe mo África, vapondola okutala o JW Broadcasting tyehesukisa o Internet. Ñgeni ngotyo?
Tunde mo 2017, ovanthu vakala movilongo vyo kombwelo vyo África vapondola okutala JW Broadcasting motelevisau mo kanale ko JW satelite. Okanale oko tyitenya na tyinthiki otyali vala ononthiki ambuho mosimanu mupakwa omalaka 16.
Ovakwatate voko Moçambique vekahi nokuviukisa o antena naikwate okanale JW satelite Mondyuo yavo Yomaliongiyo, 2018
Pala okulinga ngotyo, Onombangi mba Siovaa vafetela okanale kamwe ko Satelite onohanyi ambuho opo ovanthu vetyivile okutala o Broadcasting. O satelite yatyo oyo ihika movilongo 35 vyo África yo kombwelo. Onombongo mbufetwa mbulamba po nondolale 12.000 mohanyi. Pamwe na pamwe kufetwa vali onombongo ononkhwavo tyina pena tyimwe tyesukisa okulekeswa mokanale okakwavo. Otyo tyihole okukwatesako ovakwatate okutala ovionge nomaliongiyo omakwavo tyina ombetele imwe italeluapo.
Otyikundyi tyovakwatate vokutunga vo LDC ko Malawi vekahi nokutala okanale ko JW satelite, 2018
Ovanthu ovanyingi, alo umwe vana vehe Nombangi mba Siovaa, vatala JW Broadcasting motelevisau momaumbo avo. Mahi, ovakwatate vetu vamwe kavetyivili okuvasa onombongo mbokulanda ovitele viesukisa opo vetyivile okuitala. Mokonda yotyo, monondyuo mbomaliongiyo mbulamba po 3.670 muapakwa ovitele viokutambula okanale oko opo ovakwatate vetyivile okutala JW Broadcasting. Ovitele ovio aviho vilanda onondolale mbuhungi po 70, (tyituuka 41.790 00KZ) tyina mondyuo yatyo muna-le otelevisau ine o projetor. Mahi, ankho petupu ovitele viesukisa mapesukisa onombongo mbulamba po nondolale 530, (tyituuka 316.410 00KZ).
Ovakwatate vetu nonomphange vapandula unene okanale oko. Omukulu umwe womawaneno ko Camarões wati: “Tyikahi ngatyina ombunga yetu yapewa omanaa mokati koluhandya.” Odebode, omukwatate umwe ukala ko Nigeria, wati: “Onthwe ombunga yetu tutala atuho okanale oko tutatu mosimanu. Ovana vetu apeho vakevela nehambu enene omuwo oo. Alo umwe vaita okuti ha tuhanda okutala okanale ko JW.” Rose, nae ñgo ukala ko Nigeria, wati: “Ndyihambukwa unene mokonda pahe himanena vali omuwo mokutala vala otelevisau mokonda pahe ndyitala okanale JW satelite. Tyina ndyitala otelevisau ankho ndyimona vala ovipuka vindumanesa omutwe wange atokota otesau ailondo. Mahi JW Broadcasting imphameka nokunthulisa omutima! Okanale ndyihole unene. Otyipuka tyimwe otyiwa unene twapewa na Siovaa.”
Ombunga imwe ko Malawi vatala ovidiu yovana mokanale ko satelite
Omutalelipo umwe womawaneno ko Moçambique wahoneka okuti mo mawaneno atalelapo Monondyuo Mbomawaneno mwapakwa ovitele viokukwata okanale ko satelite JW. Monthiki yomaliongiyo ovakwatate vehika tyina nkhele kwakamba oola ine tyilamba-po, opo nkhele vatale JW Broadcasting.
Ewaneno limwe ko Etiópia vamana okutala JW Broadcasting tyihena o Internet, 2018
Motyonge tyovilongo ovinyingi tyalingilwe mo 2019 mo Johannesburg, ko África do Sul, omalongomona okwakolela vali okukutikinya-mo ana alingilwe nononkhalamutwe mbo Nombangi apakelwe mokanale oko amoneka monomphangu mbakatuuka etyive. Sphumelele, wo seketa yo Broadcasting mo mbetele yo ko África do Sul, wati: “Kohale ngotyo, ñgeno omalongomona oo ankho ena okulekesilwa mo Internet. Mahi otyo tyisukisa o Internet ikahi nawa tupu ifetelwa onombongo ononyingi. Okulingila mo JW satelite tyaenda vali nawa tupu katyetupolele onombongo ononyingi.”
Tupandula unene ovakwatate votyali vekahi nokulinga oviwa okukuatesako ovilinga vya Huku ouye auho, pahe ovakwatate vetu nonomphange ko África vekahi nokutala o JW Broadcasting mo satelite. Tupandula unene oviwa mukahi nokulinga mononkhalelo mbelikalaila mbukahi mo donate.pr418.com.
a Onondolale mbapopiwa monthele ei onombongo mbo ko América.