Mononthiki mbuno mbonthyulilo tuli matwiivi umwe “ovilwa nomahipululo ovilwa.” (Mateusi 24:6) Mahi, tyina vakwetu vamatumbukilwa novitateka viatyo ngoovio viovilwa, vakwateswako umwe lwa-liwa movipuka vesukisa. Tyetupameka unene etyi twatala movindiu 2022 Ononkhalamutwe Mbo Nombangi Mba Siovaa, Ovipe — 3 etyi twanonoñgonoka etyi vokovilongo vyo Europa veli nokulinga vakwateseko vakwetu veli mo Ucrânia muna ovilwa. Oñgeni vakwetu veli nokukwatesiwako ngwe ovilwa viatokota mo Ucrânia? Oñgeni vokuli nokukwateswako tyevekalesa?

 Monthiki 24 ya Fevereiro yo 2022, onthiki ovilwa viahimbika mo Ucrânia, Vokomisau Yononkhalamutwe avetavela eongano liyeke onombongo mambukakwatesako vakwetu vakala motyilongo omo. Monthiki yatyo umwe omo Ombetele yoko Ucrânia ayonganeka ovikwindyi 27 viokukwatesako ava vatumbukilwa novihuna, avahimbika okulanda ovikulia otyo vevitwaila umwe ovanthu.

 Pala okukwatesako Vombetele yoko Ucrânia, Vomombala Yonombangi mba Siovaa avahimbikila kovipuka vapondola okulinga mavivekwatesako. Vokomisau Yononkhalamutwe no Vokomisau Yomikanda Yononkhalamutwe Mbonombangi avapopi no voseketa yokulanda ovipuka mouye auho vaundapele kumwe no Vombetele yoko Ucrânia no yoko Polónia vetyivile okukwatesako liwa-liwa vakwetu veli mo Ucrânia. Voseketa yokulanda ovipuka Mombetele yoko Ucrânia no yoko Polónia, no vokuundapa nomikanda no vokupopia nonombonge, novakulu vokwakalela komutwe Ombetele yo Ucrânia, no voseketa yokulanda ovipuka mouye auho, avahimbika okulinga omaliongiyo ononthiki mbatyo ambuho vetyivile okwonganeka nawa ovipuka.

 Jay Swinney wokuundapa moseketa yokulanda ovipuka mouye auho wati: “Otyipuka tyo tete ankho twesuka natyo, okunoñgonoka oityi matyisukisa-po. Ankho twahanda tuvetwaile ovikulia nonondyapau novipuka vikwavo vali. Mahi ankho twahanda tuvetwaile ovipuka mwene vetyiliya-le. Okunoñgonoka oityi ankho matyisukisa-po otyimwe vala, mahi tupu, ankho tuna okunoñgonoka oñgeni matutwala ovipuka ovio atuheliyumbuhi vala mahi atutyilingi liwa, ngwe mo Ucrânia ovilwa viatokota.”

 Tyina tyiti monthiki 9 ya Março yo 2022, avetyimono umwe etyi tyesukisa. Ankho omakasa ena ovikulia, ohitu yomouneka, nombisi, no seleyale nolwoso notyipoke novipuka ovikwavo vali viokulisukula, ngeetyi osambunete nonopapeli isiyeniku. Pahe avahimbika okutala otyiñgapi ñgeno matyinyingila-po pokulandela ovanthu ovipuka ñgeno mavakala navio onosimanu ononkhwana. Ovipuka ñgeno vilandelwa omunthu wike panyingila onondolale mbukehika po 65 (konokwandya tyikalamba ponomili 27). Mokonda ankho ovanyingi mavesukisa okukwatesiwako, Vokomisau Yononkhalamutwe avetavela eongano liyeke umwe onombongo mbutiwa ombombu. Mahi pahe oñgeni ankho ovanthu mavatwaila vakwavo ovipuka ovio aveheliyumbuhi vala?

 Tyina tyiti monthiki 13 ya Março, ovakwatate vevali voko Polónia avakalola-ko avatyindi ovipuka mombetele yoko Polónia avekevitwala mondywo imwe onene yokupakwa ovipuka konthele ko Lviv, mo Ucrânia. Tyina nkhele ovakwatete ovo vehenekatuke vo Mombetele yomo Polónia no yomo Ucrânia avevekwatesako vaende umwe nawa atee vehika. Vombetele aveveovolela onondukumendu ambuho mbesukisa vetyivile okukanyingila motyilongo otyikwavo mo Ucrânia, tupu omatukutuka aveepake ovipuka vilekesa okuti ava venda vakakwatesako vala vakwavo. Vomo Ucrânia avevepopila ondyila iteta vena okukwata tyina pahe vamanyingila mo Ucrânia. Otyipuka otyo valinga tyokulifwiika umwe nawa, pahe na Siovaa apake-po okuvoko kwae kapakale-ale onoola 24 vehikiya-le ovipuka ku vakwetu mo Lviv, ngwe tupu ovakwatate vetu avakondoka umwe nawa ko Polónia.

 Otyipuka otyo tyo tete vahetekela-ko avetyivili umwe okutwaila vakwavo okulia, mahi kavatwaile-ale okulia okunyingi. Mokwatala ovanthu mavesukisa okukwatesiwako ankho tyisukisa okutwala-ko ovipuka vikehika pomalila 200.000! Pahe ankho oñgeni ovipuka ovio aviho mavityindwa avipewa umwe liwa-lwa ovanthu?

 Etyi ovanthu mouye auho vatanga mo jw.org ononkhumbi mbuli nokumona vakwetu ko Ucrânia, navo avesuku nokuvekwatesako. Vamwe veli kokule avaave onombongo mbukwatesako ovilinga Vionombangi mba Siovaa mouye, mokonda vetyii okuti eongano onombongo ombo malityivili okukwatesako nambo vakwetu. Vamwe vokukala movilongo vielihula notyilongo tyo Ucrânia avapolo umwe komuvo wavo tupu avelikwatehila avelipolo tyavo vakwateseko vakwavo. Tala vala etyi tyalinga-linga vamwe.

 Ko Polónia vamwe vokweliava velipolele umwe ovipuka viavo ovinyingi vatume ku vakwavo vekevekwateseko, ovana vamwe avevehonekela omikanda. Bartosz Kościelniak uundapa moseketa yokulanda ovipuka yoko Polónia wati: “O Salmo 110:3 neitanga-tanga-ale ehimbwe, otesitu oyo yati ‘ovanthu va Siovaa maveliave nomutima watyo auho,’ mahi pahe nelimonenako umwe nomaiho ange otyipuka vakwetu valinga opo velikwateseko. Namona ovanthu ovanyingi-nyingi veliava liwa-liwa tupu vafwapo vetukwateseko movilinga ankho tuli nokulinga, otyo tyankhwatesako umwe okunoñgonoka vali nawa o Salmo 110:3.”

 Umwe Ombangi ya Siovaa una o impresa ina omakamiyau atwala ovikulia kovilongo ovikwavo, aundika eongano omakamiyau ae, mwene eepake ongasolina, wapopia wati: “Ame tyina ndyityitala etyi tyampha vala omphitilo ndyilekese okuti ndyihole vakwetu, tupu ndyihole Siovaa. Tyanthyambukiswa unene etyi nakwatesako vakwetu.” Ongasolina yaawa-po ikalamba ponolitulu mbukehika 7.700, tupu vokutaha omakamiyau vaenda onokilometulu mbukehika po 48.000, vamanenapo umwe omuvo wavo nononkhono mbavo opo vakwateseko vakwetu!

 Vakwetu vomovilongo omo veliava umwe vakwateseko vakwavo mokonda yolwembia, tyina tyiti monthiki 28 ya Março etyi palamba vala ononthiki 15 okutuka apa vahimbika okutwala okulia mo Ucrânia novipuka ovikwavo, okuvieleka vikehika pomalila ena 100.000! Tupandula unene vokuna otyali vaava ovipuka viavo no vokwetukwatesako tutwaile vakwetu mo Ucrânia ovipuka vesukisa, tyetukwatesako atuhamenena-po unene onombongo. Atee pahatyino ñgaa ovipuka onombangi mba Siovaa vatuma ku vakwetu veli mo Ucrânia vilamba pomalila ena 190.000. Oñgeni ovipuka ovio viakwatesako vakwetu mo Ucrânia?

 Etyi ovipuka twatuma viehika mo Lviv, vo nokomisau mbokukwatesako ava vatumbukilwa novihuna mo Ucrânia aiho avahimbika okuviava-ava. Ovipuka ovio vimwe avitumwa komapunda-umbo omakwavo, omapunda-umbo amwe apa akala okutunda mo Lviv paendwa onokilometulu mbulamba 1.300. Namphila ovanthu vatutumbile umwe pala vehikiye liwa ovipuka, mahi nongootyo tyasetele. a

 Umwe povokwakalela komutwe Ombetele yoko Ucrânia utiwa Markus Reinhardt wati: “Momuvo wepwiya ovakwatate ovanyingi velimonenako umwe okuti tyotyili Siovaa utuhole, tupu otyiwa okulandula apeho etyi eongano litupopila namphila pamwe apa tukala nkhele tuhenetumbukilwe novihuna, novitateka ovikwavo vali. Tyimwe otyetyi eongano litupopila okuti atuho meumbo tuna okukala nomaande, nokulia tulia umwe nkhele onosimanu. Omukulu umwe wewaneno utiwa Anton ukala mo Kyiv wapopia etyi eongano litupopila wati: ‘Eongano lya Siovaa litufwiika umwe nawa tumone etyi tuna okulinga movitateka ngoovio viepwiya iya onthwe tutyipandula unene otyipuka otyo. Okupaka okulia nokukala nomaande, nolaliu, onthwe tyetuhupisa umwe.’ Otyiwa okutala okuti ovakwatate valandula umwe nawa etyi eongano litupopila, otyo tyakwatesako ombetele okwonganeka nawa ovipuka atutyivili umwe okuvekwatesako.”

 Oñgeni vakwetu vomo Ucrânia vakala etyi vakwatesiwako? Mykola na Zinaida, vakala mo Kharkiv, vapopia oñgeni tyevekalesa vati: “Otyipuka mwesuka umwe noonthwe tyituhambukiswa unene. Twapandula umwe unene okulia mwetwavela novihemba. Twelimonenako umwe nawa okuti okuvoko kwa Siovaa opokuli.” Valentyna nae ukala kotyilongo tyatyo oko wapopia okuti: “Opo ulande okulia tyipwiya unene mokonda peyula ovanthu ovanyingi, ha apeho tutyivila okulanda okulia twesukisa. Mahi Siovaa wamona otyitateka tyetu, atumu ovakwatate opo vetwetele etyi twesukisa pomaumbo etu, opovitateka umwe ngeevi vipwiya tyina tweete okuti natyike-ale tuvila, tumona okuti Siovaa neongano liae vetutekula . . . Tyituhambukiswa okutala oñgeni Siovaa etukwatesako umwe pomuvo twesukisa okukwatesiwako.”

 Yevhen, na Iryna, na Mykyta, vokwatilila ko Mariupol, vati: “Tupandula umwe unene onkhalelo ombunga yetu yakwatesiwako. Ovipuka viehika umwe mumovo inkha twesuka navio. Etyi twamona ovikasa atusoko okuti muna vala ovikulia, mahi tyina tuviyukula atumono umwe okuti muna nolwembia lwenyi!”

 Ove umona umwe oñgeni Siovaa atuma ovanthu vae pokati kononkhono mbae mbukola opo vetukwateseko mwetyi twesukisa, mouye muna ovilwa “nomahipululo ovilwa.” Ine ha viawa ulinga nomutima auho opo ukwateseko eongano otyo ñgeno katyevililwe, oviawa ovinyingi vilingilwa mo site yetu donate.pr418.com. Twapandula unene otyali tyove!

Okukwatesako Kuna Kwaenda Ovihuna Tyahasete Tupu Tyiheliyumbuhi

1. Monthiki 24 ya Fevereiro yo 2022: Okomisau Yononkhalamutwe yetavela opo kwaawe onombongo mbukwateseko vakwetu ko Ucrânia. Otyo tyakwatesako ombetele opo vetyivile okukwatesako vana vatumbukilwa novihuna.

2. Monthiki 24 ya Fevereiro atee – monthiki 8 ya Março 2022: Ombetele yoko Ucrânia ailande ovipuka mo Ucrânia yatyo mwene, aiviaevela vokomisau yokukwatesako ovanthu kuna kwatumbukila ovihuna iya vokomisau oyo aveviavaila ovanthu. Tupu ombetele ailifwiika itambule ovipuka vitunda ko Polónia nokuviava.

3. Monthiki 9 ya Março yo 2022: Okomisau Yononkhalamutwe aitavela kutumwe ovikulia opo vikakwateseko vakwetu ko Ucrânia.

4. Monthiki 10 – 12 ya Março yo 2022: Atyitalwa ine tyitavela okupola ovikulia ko Polónia pala okutwala ko Lviv, ko Ucrânia.

5. Monthiki 13 ya Março yo 2022: Avahetekela okupola ovikulia ko Polónia pala okutwala ko Lviv, mo Ucrânia.

6. Monthiki 14 – 16 ya Março yo 2022: Mondywo Yovionge ko Poznan ko Polónia vokweliava opo vakatunge avaongiywa opo vapake ovikulia momakasa nonondyapau novipuka ovikwavo vali opo vikakwateseko kuna kwaenda ovihuna.

7. Monthiki 17 ya Março yo 2022: Pakala vala ononthiki ononkhwana etyi tyetavela okutuma ovikulia, akutumwa omalila ekehika 13.000 konondimbu no Ucrânia.

8. Monthiki 21 – 27 ya Março yo 2022: Okulinga ngeetyi tyalingwa-le, ko Polónia akupolwa ovikulia avitwalwa ko Ucrânia, vomo Ucrânia avevitwala-twala kuna kuna vana vesukisa okukwatesiwako, avetyilingi vala monoola 24.

9. Monthiki 28 ya Março yo 2022: Pakala vala ononthiki 20 etyi tyetavela okutwala ovikulia akutumwa omalila 100.000 ovikulia nondyapau novipuka ovikwavo vali novihemba ko Ucrânia.

 Atee pahetyino onombangi mba Siovaa vatuma-le omalila alamba po 190.000 opo vakakwateseko vakwetu ko Ucrânia.