Ovatumini ovanyingi mouye vekahi nokupopila ovanthu okuti hatyiwa okulikalela popepi tupu vekahi nokutyilika ovanthu veheliongiye. Onombangi mba Siovaa vatokola okutavela kovatumini mahi otyo vatualako okufenda kumwe. Opo vetyilinge, omawaneno alingila omaliongiyo mo notelefone nono kombutador otyo veliete, valinga notyiti tyimwe tyitiwa Zoom.

 Opo tutualeko okulinga omaliongiyo etu, Ononkhalamutwe mbo Nombangi vetavela okufetela Zoom opo omawaneno atualeko okulinga omaliongiyo. Otyo tyakuatesako ovanthu vomawaneno amwe, ankho vehetyivili okufetela o internet (video conferencia) konombongo mbavo muene, mokonda ifetelwa onombongo ononyingi onondolale 15-20, pamwe mbulamba-po. Mokonda yotyo, omawaneno ankho alinga omaliongiyo noviti ovikuavo viotyali ankho muhanyingila-le ovanthu ovanyingi, tupu viahayumbwa nawa onthumbi. Mahi pahe, omawaneno aeho alingila omaliongiyo mo Zoom apolapo ouwa mokonda katyalemene okulingila-mo omaliongiyo iya tyitavela vali okuongiya ovanthu ovanyingi. Alo pahetyino, omawaneno alamba po 65.000 movilongo vilamba po 170 ekahi nokulingila omaliongiyo mo Zoom.

 Mo Indonésia, kokulio kwo Sulawesi, mo Manado, kuna ewaneno Kairagi, liayeka-po o Zoom yotyali pahe lilingila omaliongiyo mo Zoom yafetelwa neongano. Omukuatate Hadi Santoso wahangununa okuti: “Alo umwe ovakuatate nonomphange ankho vehetyivili okuundapesa nawa onotelefone ine ono kombutador, pahe vetyivila okunyingila meliongiyo, mokonda tuna o Zoom yomuvo omunyingi, kavesukisa vali okukondauka meliongiyo.”

 Lester Jijón, Jr., omukulu wewaneno Guayacanes ko Guayaquil, mo Equador, wati: “Mokonda ovakuatate nonomphange ovanyingi vetupu onombongo, kavetyivili okufetela o Zoom ityivila okuongiya ovanthu aveho mewaneno opo valinge eliongiyo. Pahe, ovakuatate vapandula unene mokonda tuapewa o Zoom itukuatesako okukonga ovanthu ovakuavo vanyingile otyali tyihena vali otyinkhe tyokuti kamatyitavela okupaka-mo ovanthu aveho.”

 Johnson Mwanza, omukulu wewaneno Ngwerere ko Lusaka, mo Zambia, wahoneka okuti: “Ovakuatate nonomphange ovanyingi apeho vapopia okuti, ‘okulingila omaliongiyo mo Zoom katyitukuatesako vala okutala okuti tukahi kumwe novakuatate vetu, mahi tupu tutyimona nawa okuti Siovaa utuhole iya ukahi nokututekula.’”

 Okonda oyo yeongano itavela okulingila omaliongiyo mo Zoom yalandwa nonombongo mbokukuatesako ovanthu kuna kuaenda oviponga. Onombongo ombo mbutunda koviawa viovanthu votyali vehole okuava mbukuatesako ovilinga mouye auho. Oviawa ovio, ovinyingi vilingilwa mo site donate.pr418.com. Tuapandula unene otyali tyove, onombongo wava mbukahi nokukuatesako ovanthu mouye auho. — 2 Ova Kolindu 8:14.