Menima 2020 otyonge tyononthiki ononthatu tyehiwilwe unene. Otyo otyonge tyotete twangalavala atyitumwa kononthele ambuho mbouye no internet! Mahi, ko Maláui no Moçambique, ovakwatate vetu no nomphange vatalele otyonge otyo tyihena o Internet. Oñgeni otyo vetyivila?

 Okomisau Yononkhalamutwe no Okomisau Yokulongesa mbo Nononkhalamutwe mbo Nombangi mba Siovaa avetavela otyonge tyilekeswe mo Televisau no Laliu mo Maláui no Moçambique. Omokonda yatyi vetavelela? Osaludu yonodadu opo vanyingile mo interne mo Malawi yatena vali tyipona ouye auho, iya ngotyo Onombangi ñgeno kavetyivilile okunyingila mo Internet. Omukwatate William Chumbi, omukulu wo komisau yo Filiyale mo Maláui wahangununa okuti: “O Laliu no Televisau ovio vala tuna vipondola okukwatesako okutwala okulia oko kovakwatate nonomphange.” Omukwatate Luka Sibeko, nae tupu omukulu wo Filiyale ko Maláui ayawisako okuti: “Inkha otyonge katyapitile mo Laliu no mo Televisau motyilongo tyetu ñgeno ovakwatate vamwe vala vetyitehelela.” Ko Moçambique nako tupu kavehi ovakwatate vena onotelefone nonokoputador otyo ñgeno tyevepuiya okunyingila mo Internet vapole-mo otyonge.

 Mokonda yomukihi COVID-19, movilongo ovio ono Laliu mbumwe nono Televisau ankho mbukahi-ale nokuhikisa omaliongiyo etu. a Ngotyo, etyi otyonge tyeya-po ovakwatate avaende vala kono Laliu noko Televisau okukapopia navo opo valekese otyonge.

 Mahi ko Maláui, ankho kuna otyitateka otyikwavo. Motyilongo otyo omunthu okufetela o Laliu opo apopile-mo etyi ahanda, upewa vala oola ike. Haunene valinga ngotyo mokonda vasoka okuti etyi omunthu apopia ankho tyikala omuwo omunyingi hamwe ovanthu kamavahande vali okutehelela. Mahi ovakwatate avevepopila okuti ovilinga vietu tuvilingila umwe ovanthu aveho alo umwe tyina tukahi momaumbo momuwo uno womukihi, tukahi nokupopila ovanthu ovipuka oviwa vikahi Mombimbiliya, vikwatesako ovanthu aveho okukala ovanthu vekahi nawa motyilongo, nokutekula nawa ombunga. Etyi ovanthu vo Laliu vetyiiva aveveavela omuwo omunyingi opo vahikise otyonge.

 Mo Maláui, otyonge tyahikiswa mo Laliu no nokulekeswa mo Televisau. Mokonda tyilinge o Laliu ine o Televisau ihika motyilongo atyiho, ovanthu aveho motyilongo otyo vetyivilile okutehelela otyonge. Mo Moçambique, otyonge tyalekesilwe mo Televisau nokuhikiswa mo Laliu mbekehika po 85.

 Movilongo ovio vivali, opo otyonge tyilekeswe mo Televisau mwafetelwa onondolale 28.227 b (tyituuka 1.626.312,39KZ). Opo tyihikiswe mo Laiu mwafetelwa onondolale 20.000, (tyituuka 11.522,14KZ). Konthele yono Laliu oko onombongo mbufetwa mbelikalaila okupolela po nondolale 15 kononthutu alo 2.777, (tyituuka 159.943,56KZ). Kumbuna mbuhika motyilongo atyiho.

 Ovakwatate valinga ononkhono mbokuundapesa nawa onombongo mbwawa. Mongeleka, vetyivila okupopia novanthu vo Laliu avetavela okutepulula-ko 30%. Onombongo vetyivilile okuhupisa onondolale 1.711 (tyituuka 985.763,96KZ ). Ko Moçambique, nako vamwe avetavela okutepululako avati omokonda katuvake, tupu katusete okufeta.

 Ovakwatate vetu vapandula unene mokonda yakwatala otyonge mo Televisau nokuatehelela mo Laliu. Mongeleka Patrick, omukulu umwe wewaneno ko Maláui, wati: “Twapandula unene Ononkhalamutwe mbo Nombangi etyi vetulingila momuwo uno womukihi.” Isaac, tupu ukala ko Maláui, wati: “Etyi onthwe tuna-tyo vala o Laliu. Mokonda yotyo tupandula unene eongano lya Siovaa etyi lialinga epongiyo olio opo tutehelele otyonge mo Laliu. Mokonda yotyo, ombunga yange aiho yatehelela otyonge. Otyo tyetulekesa nawa okuti Siovaa uhole ovanthu vae.”

 Otyonge tyo 2020, otyo otyonge tyotete omuivisi umwe ko Moçambique atehelela. Ngwe wati: “Epongiyo liokwalingwa opo tutalele otyonge mo Televisau lianthinangelesa okuti Siovaa o Huku wepondolo aliho. Nii omukihi ou kawetyivilile okutalameka Siovaa opo etwavele okulia kuopamphepo, tupu wetwavelela vala atuho mondyuo ike. Nomona nawa oluembia lwovanthu va Siovaa, ndyina onthumbi yokuti eli elilongeso liotyotyili.”

 Omukulu umwe wewaneno itiwa o Wyson, wati: “Nahanda okupandula unene onkhalelo omupika omukwatyili etutekula omuwo no womukihi. Onkhalelo ei valinga yokulekesa otyonge mo Televisau no Laliu otyipuka otyiwa unene. Tyakwatesako atuho onthwe twesala noluhepo olunene mokonda yomukihi ou atutyivili okutala otyonge tyetupameka unene.”

 Motyonge tyo 2021, Okomisau Yononkhalamutwe no Yokulongesa tupu natyo vetavelele tyilekeswe mo Televisau no Laliu movilongo ovinyingi. Oñgeni tupondola okumona onombongo mbokulekesa otyonge mononkhalelo ombo? Tutyivila vala mokonda yonombongo mbuhole okuwa novanthu votyali vekahi nokukwatesako ovilinga vya Huku ouye auho, vekahi nokwava ngetyi tyapopiwa mo donate.pr418.com. Twapandula unene otyali tyenyi moviawa mukahi nokulinga.