OVIAWA ULINGA VIENDA NAPI?
Omikanda Ominyingi-nyingi Vifwa Peke
1 YA SETEMBRO YO 2021
“Momanima ehehi konyima oku, nawike ankho upondola okutyisoka okuti matutambula okulia kuopaspilitu kupakwa monotelefone nono kombutador.” Okuti noove ongotyo usoka? Ondaka ombo mbapopiwa na Geoffrey Jackson melongomona liae etyi alinga ovidiu 2020 Ononkhalamutwe mbo Nombangi mba Siovaa — Ovipe 6. Atwalako okupopia okuti: “Mahi pahe tupondola okupula okuti, oñgeni ñgeno tualinga inkha katwali noviti ngetyi o JW Library tyina tukahi momukihi ou. Siovaa wetufuiika-le omanima omanyingi tyina ankho matuya okulambela momuwo uno wepuiya.”
Oñgeni Siovaa etukwatesako opo tulifwiike? Oityi ankho tyesukisa opo tulinge JW Library? Oityi tyesukisa opo tutwaleko okuilinga vali nawa naitwaleko?
Otyiti Tyimwe Otyipe Otyiwa Unene
Mu Maio yo 2013, Ononkhalamutwe mbo Nombangi vaita kovakwatate vo seketa Yokuonganeka o MEPS kombala, opo valinge otyiti tyimwe mamupakwa Ombimbiliya Tradução do Novo Mundo yatalwa nawa. Paul Willies umwe po vokuonganeka o MEPS wati: “Etyi twapopilwa otyipuka otyo, nkhele nalumwe twalingile otyiti natyike tyipakwa movenda app stores. Mahi atuonganeka otyikundyi tyimwe, nkhele atuyeke-po ovilinga vimwe, atuundapa no noseketa ononkhwavo okulinga otyiti otyo. Atulikwambela ovikando ovinyingi okuita Siovaa etukwatesako, atutyivili iya otyiti otyo atyileswa meliongiyo lilingwa like menima etyi palamba onohanyi ononthano!”
Otyilinga otyikwavo otyinene twakala natyo okupaka omikanda omikwavo motyiti otyo, ngwe ankho tyesukisa okupaka-mo omikanda ominyingi no viomalaka omakwavo. Alo mu Janeiro yo 2015, ankho muna-le omikanda ominyingi melaka lyo Ingelesi, mahi etyi palamba vala onohanyi epandu ankho ovanthu vahanda vapondola-le okupola-mo omikanda momalaka omanyingi.
Tunde opo, ovakwatate vetu vekahi nokulinga nawa otyiti otyo, vapaka-mo omikanda ominyingi, no novidiu, vikahi nokukwatesa unene momaliongiyo iya vana vanyingila-mo vetyivila okuvasa Omukanda Wokuovolola wo nombangi tyina vaikula ovelesikulu imwe Yombimbiliya.
Okuonganeka Nawa Omikanda
O JW Library ikahi nokuikulwa novanthu kese nthiki mo notelefone nomo no kombutador onomiliau 8, kese hanyi nomo nomiliau 15! Oñgeni tyivilwa okuonganeka nawa JW Library aitavela okuikula nawa mo notelefone ngoombo ambuho? Omukwatate Willies wati: “Otyiti ngotyo katyipu okutyilinga. Apeho tuundapa opo tuiviukise vali nawa nokuyawisako ovipuka ovipe opo ovanthu vetyivile okuundapa nayo nawa mo notelefone mbavo. Mokonda oviti ngovio vipakwa mo notelefone viovanthu vokulinga ononiñgoso apeho mupakwa ovipuka ovipe, nonthwe apeho tuna okulinga vali nawa JW Library opo itavele okuundapa mo notelefone ambuho. Tupu tuna okuviukisa vali nawa apeho o software yetu tyina twamapake omikanda omipe no novidiu mo JW Library.” Okuvalula omalaka ekahi mo JW Library, pahe tyino muna omikanda vikahi momalaka alamba po 200.000 na vina viatangwa no novidiu mbulamba po 600.000!
Opo tutyivile okutwaleko okulinga vali nawa otyiti otyo, etyi tyesukisa hano-kombutador vala. Tyesukisa okulanda ono software mbelikalaila. O software ike vala ilanda onondolale 1.500 mbo ko América (tyituuka 855.305,75KZ) menima. Tyihe-otyo vala, oseketa yokuviukisa o MEPS isukisa omanima aeho onombongo mbuhungi po nondolale 10.000 (tyituuka 5.689,94KZ) omanima aeho opo valande oviti ovikwavo viesukisa opo o JW Library itavele okuikuka mono kombutador no notelefone ambuho haunene onomphe.
Okupola-mo Omikanda Tyikwatesako Okuhamane Onombongo
O JW Library ikahi nokukwatesako okutepulula onombongo mbuhole okufetwa pokulinga omikanda viopeke nokuvituma. Mongeleka, nkhele soka vala komukanda Tanga Ovihonekwa Ononthiki Ambuho. Mo 2013, twalingile omukanda Tanga Ovihonekwa Ononthiki Ambuho vihungi po nomiliau 12 wenima olio. Mahi, mo 2020 viopeke twalingile vala vihungi po nomiliau 5 — ngwe mouye auho muna ovaivisi vehungi po 700.000. Oityi tyapiluluka? Omokonda ovakwatate nonomphange ovanyingi vatangela omukanda oo monotelefone mo JW Library. a
“Otyo Otyiwa Unene”
O JW Library ikwatesako ovanthu mononkhalelo ononyingi. Geneviève, ukala ko Canadá, wapopia okuti o JW Library yemukwatesako okulilongesa apeho. Tupu wati: “Ankho nesukisile okukongolola apeho omikanda mokutala ñgeno hetyivilile okulilongesa apeho komihuka”. “Mahi mokonda yo JW Library okukwata vala o tablet yange, atyiho nesukisa omo tyikahi. Okulilongesa apeho tyikahi nokupameka ekolelo liange nokupameka oupanga wange na Huku.”
Geneviève
O JW Library ikahi nokukwatesako unene haunene momuwo uno womukihi COVID-19. Charlyn, ukala ko Estados Unidos wati: “Mokonda yomukihi COVID-19 palamba-le enima nehenemone vali omukanda omupe walekeswa. Mahi o JW Library ikahi nokunthekula nawa moupanga wange na Siovaa, ndyipandula Siovaa mokonda yotyiwa otyo.”
Faye, ukala no Filipinas, wapopia nawa etyi ovanthu ovanyingi velitehelela. Wati: “Omwenyo wange auho noupanga wange na Siovaa ukahi nokuhongolelwa notyiti tyimwe otyiwa. Tyina ndyipinduka-po otyo tete ndyitanga. Otyo ndyihikisa tyina ndyikahi nokulinga ovilinga viange. Otyo ndyifuika natyo omaliongiyo. Otyo ndyiundapesa tyina ndyililongesa Ombimbiliya. Otyo tyinkhwatesako okutala onovidiu. Otyo ndyiundapesa opo ndyitange omikanda ine Ombimbiliya tyina ndyina etyi ndyikevela. Otyo otyiwa unene.”
Otyiti otyo tupu tyikwatesako unene movilinga viokuivisa. Mongeleka, nthiki imwe etyi omphange umwe ukala ko Camarões ekahi movilinga viokuivisa ankho uhanda okutanga otesitu amwene omphange umwe atanga mosimanu yokwalamba. Mahi, ankho otesitu weilimbwa. Ngwe wahangununa okuti: Andyihambukwa mokonda ankho ndyihinangela onondaka mbumwe motesitu oyo. Andyikula o JW Library, andyimange po Ombimbiliya, andyiovola onondaka mbuna. Liwa-liwa, otesitu andyiivasi. Okuundapesa otyiti otyo tyinkhwatesako unene okuvasa onotesitu ankho nalimbwa.”
Oviwa uhole okulingila mononkhalelo mbelikalaila mbapopiwa mo donate.pr418.com vikahi nokukwatesako okulinga nawa, nokuonganeka JW Library ikahi nokukwatesako ovakwatate mouye auho. Twapandula unene oviawa vienyi.
Ovipuka Viakolela Unene Vialingwa mo JW Library
Outubro 2013 — Otyo tyalekeswa otyiti otyo kumwe Nombimbiliya yatalwa nawa
Janeiro 2015 — Mwapakwa omikanda omikwavo mo Ingelesi nomalaka omakwavo
Novembro 2015 — Yalinga itavela okunthinda onondaka
Maio 2016 — Mwapakwa onthele yomaliongiyo
Maio 2017 — Yalingwa opo tyitavela okuhoneka-mo
Dezembro 2017 — Mwapakwa Ombimbiliya Yokulilongesa
Março 2019 — Yalingwa opo tyitavela okupola-mo omikanda viatangwa no novidiu, nomukanda wokuovolola
Janeiro 2021 — Yalingwa nawa opo tyitavele okulilongesa nawa omukanda Kalako Nomwenyo Apeho!
a Tyina upola omukanda ine ovidiu mo JW Library tyifetelwa katutu. Mongeleka menima liokwalamba twafeta onondolale mbutuuka onomilau 1,5 pala okuhikisa nokufetela vina viapolwa mo jw.org no JW Library. No ngotyo hahe vali, tyina ovanthu vapola omo omikanda, tyipona okulinga omikanda viopeke nono CD nono DVD.