OVIAWA ULINGA VIENDA NAPI
Omukanda Umwe Wokulilongesa Ombimbiliya Welikalela Unene
1 ya ABRIL yo 2022
Mu Janeiro yo 2021, Ononkhalamutwe mbo Nombangi vapopile okuti pahe kuna omukanda omupe wokulongesa ovanthu Ombimbiliya, omukanda Kalako Nomwenyo Apeho! a Oñgeni tyekukalesile etyi wetyiiva? Umwe utiwa o Matthew ukala ko Canadá wati: “Tyanthyambukisilwe unene! Andyihambukwa vali unene etyi natehela omalongomona no novindiu mbupopia oityi omukanda oo walingilwa, neetyi tyalingwa-lingwa utalwe ine maukwatesako umwe ovanthu. Ankho nahanda uye liwa ndyihimbike okulongesa nao.”
Okulongesa nomukanda Kalako Nomwenyo Apeho! tyelikalela, ha ngeetyi ankho tulinga-linga. Mahi pena ovipuka ovinyingi vielikalela nomukanda oo nomikanda omikwavo ankho tulongesa navio. Ine omukanda watyo unao umwe peke, tyipondola no peke vala utyiivite umwe okuti omukanda oo welikalela. Opo utyinoñgonoke nawa, matutale oñgeni omukanda Kalako Nomwenyo Apeho! walingwa.
Omukanda Omupe Welikalela
Omafo atyo alema vali. Omokonda yatyi walingilwa ngootyo? Omukanda Kalako Nomwenyo Apeho! una omalutalatu alamba po 600, omanyingi vali unene ko omukanda Oityi Ombimbiliya Itulongesa? Omukanda ou omupe tupu una vali popanyingi pahahonekelwe, tupu pehena omalutalatu. Ngwe tyina omafo omukanda ahalemene, amonekela, tyili nthele ina utyimona. Pala otyipuka otyo tyahamoneke-po, voseketa yokulinga omikanda (Departamento Internacional de Impressão) ko Wallkill, Nova York, mo Estados Unidos, nkhele valolele omafo ekwana elikalela vatale olipi likahi vali nawa. Voseketa yokuhoneka Yononkhalamutwe mbo Nombangi, aveetale umwe nawa, avakoyo-po eli lialema vali liahamonekela. Namphila omafo oo alanda vali okalu komafo tulinga-le nao omikanda vietu, mahi oo umwe akwatesako omunthu ulilongesa Ombimbiliya atie tyina atanga omukanda Kalako Nomwenyo Apeho! ahatalukwa neetyi tyili nthele ina.
Efo lyo kokulio lilekesa opapeli yokwalinga omukanda Kalako Nomwenyo Apeho!
Okapa katyo kakola vali. Okapa komukanda ou omupe kelikalela no komikanda omikwavo twalinga-linga-le. Okapa katyo kakalaima ngeetyi tyikahi komikanda omikwavo, kana kasesa nawa opo omalutalatu atyo amoneke nawa! Okapa okusesa ngootyo, tyikwatesako omukanda aukala vali ehimbwe mokonda yokukwatwa-kwatwa unene. Mahi okapa katyo ngooko kalanda vali okalu tyipona okapa kokulaima. Pala tuvase okapa ngooko kasesa mahi kahalande unene okalu, twapopile novo Nombetele ononyingi.
Omakina yokupaka okapuka kokusesa kokapa
Oityi twakoyela-po ovipuka ovio vilanda okalu pokulina omukanda oo? Umwe wokuundapa moseketa yokulinga omikanda wati: “Onthwe tutyii okuti omukanda ou maukwatwa-kwatwa unene, pahe twahanda wehelionye-onye vala, aukala omapita.” Umwe utiwa o Eduardo uundapa Moseketa Yokulinga Omikanda mombetele yo ko Brasil wati: “Onthwe tupandula unene eongano lya Siovaa liaovola umwe ovipuka vikahi vali nawa pala okuhiwiswa omukanda ou, aukolo umwe nawa, natyina uukwata ñgaa uwiivite ukahi umwe nawa, mahi tupu apahanyingila onombongo ononyingi ovanthu vaava.”
Walingwa Momukihi Omu wo COVID-19
Omukanda Kalako Nomwenyo Apeho! twahimbika okuulinga mu Março yo 2021. Tyetupwilisile unene mokonda o momukihi wo COVID-19. Opo ankho tyati vala ono Mbetele mbaikwa, vokuundapa-mo vakala kondye kaveya-mo, tupu ankho katyitavela okwiihana vali ovanthu veye Mombetele. Pahe ankho onondywo mbumwe tulingila omikanda, vaundapa-mo kavehi, mbumwe ankho mbaikwa umwe mokonda otyo vatumini vapopia.
Oñgeni twetyivila okuulinga ngwe twali novitateka ovinyingi ngoovio? Etyi pahe twatala tyitavela okuundapa monondywo mbokulingila omikanda, vo Mombetele vokuundapa konoseketa ononkhwavo, nkhele avahulu kokukwatesako okulinga omukanda oo. Joel uundapa moseketa yokulinga omikanda ko Wallkill wati: “Valingile ovo vokweliavele, vakala umwe tyafwapo valongeswe otyilinga ankho vehenelinge-ale.”
Namphila tyepwiyile, mahi twetyivila umwe okulinga omikanda ominyingi-nyingi. Pokuulinga pesukisa ovipuka ovinyingi, pesukisa omakapa atyo, novipuka vipakwa kokapa kakale nawa, nonopapeli, notinda, nokola. Monohanyi vala ononthano twakala nokulinga omukanda oo, panyingila onondolale mbulamba ponomiliau 2,3. Opo twahamane unene onombongo, twalinga vala omikanda ovanthu momawaneno mavesukisa umwe.
“Palingwa Otyilinga Tyimwe Tyehiwa Nawa”
Oñgeni vokulongesa vakwavo Ombimbiliya, no vokulongeswa vakala etyi vatala omukanda ou omupe? Umwe Ombangi ukala ko Austrália utiwa o Paul wati: “Omukanda Kalako Nomwenyo Apeho! ukahi nawa, unthyiwilwa-po unene tyina ndyilongesa nao. Ovipuka viatyo vili-mo viaonganekwa nawa, netompho lieenda vala nawa. Onondaka mbatyo mbelikwata umwe nawa nomapulo atyo ehika komutima, no novindiu mbatyo, nomalutalatu atyo, noukasa watyo, neetyi omulongwa ena okulinga. Palingwa otyilinga tyimwe tyehiwa nawa tyimpha umwe ondundo ndyityivile okulongesa vali nawa.”
Umwe ulongeswa Ombimbiliya ukala ko Estados Unidos wati: “Omukanda ou omupe tyotyili neupanda umwe unene. Omalutalatu atyo ankhwatesako okunoñgonoka nawa etyi elongeso likahi nokupopia. O novindiu mbatyo mbunthyika umwe komutima, mbumpha umwe ondundo ndyilinge etyi nalongeswa.” Oo wokwapopia ngootyo uli nokulongesiwa Ombimbiliya tuvali mosimanu, tupu uli nokwenda komaliongiyo onosimanu mbatyo ambuho.
Nkhele omalaka omanyingi akamba-ko ehenelingilwe omukanda Kalako Nomwenyo Apeho! Atee pehepano, Ononkhalamutwe mbo Nombangi vetavela omukanda oo ulingwe momalaka alamba po 710, okutyeeleka nomalaka etavelelwe apitiye omukanda Oityi Ombimbiliya Itulongesa? kwayawisa omalaka alamba po 340.
Opi tuli nokupola onombongo mbokulinga omukanda oo? Tuli umwe nokupola ponombongo mbaawa mbukwateseko ovilinga vya Huku ouye auho, ovanyingi veli nokwavela mo donate.pr418.com. Tupandula umwe unene otyali una-tyo, tyili nokutukwatesako tulinge omikanda vikwatesako vana vahanda okunoñgonoka Siovaa, ‘vakale-ko nomwenyo apeho.’ — Salmo 22:26.
a Omukanda oo walekeswa mo JW Broadcasting yalekesile eliongiyo liokulingwa like menima.