OVIAWA ULINGA VIENDA NAPI?
Onomisionaliu “alo kononthele mbokokule-kule mbohi”
1 YA JUNHO YO 2021
Sesusi wapopilile ovalongwa okuti: “Mamukala onombangi mbange . . . alo kononthele mbokokule-kule mbohi.” (Ovilinga 1:8) Hono, Onombangi mba Siovaa valinga nombili onene otyilinga otyo. Mahi, kovilongo vimwe alo umwe ku vina kuna ovanthu ovanyingi, nkhele ondaka ya Huku kainehike-ko. Ya nkhele kovilongo vimwe Onombangi mba Siovaa kavehi. (Mateusi 9:37, 38) Oityi tyikahi nokulingwa opo ovanthu ovanyingi vapopilwe ondaka ya Huku?
Onomisionaliu vakwatesako okuivisa kuna kwesukisa vali Onombangi. Onomisionaliu vakuatesako okupameka omawaneno
Opo vakuatesako okufuisapo otyilinga Sesusi atuma, Okomisau Yovilinga yo Nonkhalamutwe mbo Nombangi mba Siovaa ituma onomisionaliu kuna kovilongo kwesukisa unene ovaivisi mouye auho. Hono, mouye auho muna onomisionaliu vatuuka 3.090 vatumwa kovilongo opo vakaivise. a Ya ovanyingi puvo vakwata Mosikola Yovaivisi Vouhamba wa Huku. Onomisionaliu vetyihole unene tyina vatunda movilongo viavo otyo venda kuna kwesukisa unene ovaivisi. Tupandula unene ounongo wavo, nokulongesa nawa, nokuna onongeleka onongwa mbukwatesako ovalongwa ovape.
Okukwatesako Onomisionaliu opo Vakwateseko ovakwavo
Mono mbetele, Oseketa yokukwatesako ovaivisi moseketa yovilinga yundapela kumwe nokomisau yo Filiyale opo vakwateseko onomisionaliu mu tyina vesukisa, ngetyi okuvetaindyila onondyuo, nekongoko liavo, nokuveavela onombongo mbuvekuatesako okulanda etyi vesukisa. Menima liovilinga lyo 2020, Onombangi mba Siovaa vamana onondolale mbuhungi po nomiliau 27 mbo América (tyituuka 16.211,42 00KZ) opo vakwateseko onomisionaliu. Tupandula unene oviawa ovio vikuatesako onomisionaliu opo vetyivile okutualako novilinga viavo viokuivisa nokupameka omawaneno movilongo vekahi nokuundapa.
Onomisionaliu vakuatesako okupameka omawaneno
Oñgeni onomisionaliu vetyivila okukwatesako nawa ovilinga viokuivisa? Frank Madsen, Wokomisau yo Filiyale ko Malawi, wati: “Mokonda yokwakola omutima nokuna ounongo, onomisionaliu vekahi nokukwatesako omawaneno okukaivisa motelitoliu auho yewaneno na kuna umwe kwepuiya okuendako. Tupu tyina valinga ononkhono mbokunoñgonoka ovituwa viotyilongo nokulilongesa elaka, tyikahi nokuavela ongeleka ongwa kovakwendye novahikuena okunyingila movilinga viomuwo auho. Tupandula unene Siovaa watuma onomisionaliu vekahi nokuivisa.”
Omukulu omukwavo Wokomisau yo Filiyale ukakala kotyilongo otyikwavo, wati: “Onomisionaliu vaava ongeleka ilekesa nawa okuti Onombangi mba Siovaa velikwata okapandi ouye auho. Alo umwe vena vehe Nombangi mba Siovaa vetyimona okuti onthwe katuyapulwa novivala, mahi etyi Ombimbiliya ilongesa tyetukwatesako okulikwata okapandi ouye auho.”
Oñgeni onomisionaliu vakwatesako ovaivisi momawaneno vekahi? Paulo, ukala ko Timor-Leste, upandula unene onomisionaliu vekahi mewaneno liavo. Wati: “Kuno kotyilongo tyetu kutokota unene. Mahi alo umwe onomisionaliu vatunda kovilongo viokutenda kavayeke-po okuivisa mokonda youtokotwe. Komihuka aviho vakala potyikundyi tyovilinga viokuivisa. Apeho ndyivemona vakatalepo ovanthu alo komutenya tyina kwatokota unene, tupu no komakumbi. Vakwatesako ovanthu ovanyingi okunoñgonoka otyili, alo umwe na ame. Vena ombili onene, nokuundapesa nawa omwenyo wavo movilinga vya Siovaa, otyo tyilunda ewaneno okulingila vali nawa Huku.”
Ketti, omukokoli-ndyila umwe ukala Malawi, wapopia oñgeni ovalinepi vamwe onomisionaliu vakwatesako ombunga yae: “Etyi ovalinepi vamwe onomisionaliu vatumwa mewaneno lietu, mombunga yetu ankho ame vala Mbangi ya Siovaa. Mahi ovalinepi ovo vakwatesako unene ombunga yetu etyi twakala omapanga. Ongeleka yavo ongwa yakwatesako omona wange okutala okuti okulingila Siovaa tyihambukiswa, nokweta omwenyo omuwa. Ndyipandula unene onomisionaliu, mokonda yavo ovana vange vetatu pahe ovakokoli-ndyila vomuvo auho iya omulume wange wahimbika okuenda komaliongiyo.”
Oñgeni onomisionaliu vakwateswako opo vatualeko novilinga viavo? Vakwateswako nonombongo mbwawa pala ovilinga viokuivisa viouye auho, mbukahi nokwawa mononkhalelo mbapopiwa mo donate.pr418.com. Tupandula unene oviwa ovio.
a Onomisionaliu ava vatumwa komawaneno kuna ankho kwesukisa vali ovaivisi. Onomisionaliu ovakwavo vatuuka 1.001 vekahi nokutalelapo omawaneno.