Siovaa Huku wahanda ovanthu vatyo aveho vemunoñgonoke, tupu vanoñgnoke Ouhamba wae wo keulu, tyilinge veiva-ko, vapopia, tyilinge kaveivi-ko hamwe tupu kavapopi. (1 Timotiu 2:3, 4) Otyo Onombangi mba Siovaa valingila Onombimbiliya nomikanda vikwatesako ovanthu aveho okunoñgonoka Ombimbiliya, na vana umwe veheivi-ko, novihita-mulungu. Eongano lya Siovaa lili nokulinga onovindiu a ononyingi momalaka alamba po 100 onompholo! Oñgeni tulinga onovindiu ombo, tupu oñgeni tumbwaava? Mokweenda kwomuvo ovipuka patyi twaviukaisa vali nawa?

 Onovindiu tulinga momalaka onompholo, mbulingwa novapitiyi mouye watyo auho. Ovapitiyi ovo tyina nkhele vehenehimbike okupitiya, vatala nawa etyi mavapitiya avetyinoñgonoka umwe nawa. Pahe avasoko oñgeni mavetyipitiya umwe nawa melaka lionompholo. Tyina vamalinga-linga ovipuka ovio, pahe avahimbika okungalavala ovindiu yatyo. Pehepano, kuna ovikundyi 60 vipitiya omikanda aviho viapolwa Mombimbiliya momalaka onompholo, tupu kuna ovikundyi 40 vipitaiya vala omikanda vimwe.

 Kohale ankho tyitumana unene onombongo pokulinga onovindiu momalaka onompholo. Onomakina mbatyo mbokupola onovindiu, nonomakina ononkhwavo vali, ankho mbatena unene ha ngopehepano. Tupu ankho onovindiu mbatyo mbungalavalelwa monondywo mbokungalavalela onthwe mwene twatunga, pamwe onondywo twaviukisa vala nawa. Pala okwovolela ovipuka aviho ovapitiyi velaka like vala lionompholo vesukisa, ankho papondola umwe okunyingila onondolale mbukalamba po 30.000. b

 Pala okwahamane unene oviawa vilingwa, eongano liasoka okuviukisa vali, nokupepukisa vali ovipuka vimwe pokupitiya. Pahe tuundapa nonomakina mbuli-ko pehepano, mbukahi vali nawa, tupu mbahalande onombongo ononyingi. Tupu pahe katungalavalela vali vala monondywo mbatyo mbokungalavalela, ovapitiyi pamwe vapaka vala otyinyanga otyingole (otyifwi) motyimato moseketa vaundapela, ngapo vangalavalela onovindiu. Tyina pamwe movindiu yatyo mamusukisa ovanthu ovanyingi, ava mavangalavala vapondola okungalavalela monoseketa mbavo, pamwe tupu o pomaumbo avo mwene; kavaende vali mondywo yatyo umwe vala yokungalavalela.

 Tupu monokombutandole twapaka-mo otyipuka tyimwe tyikwatesako vokupitiya momalaka onompholo. Otyipuka otyo twapaka monokombutandole, tyikwatesako umwe vokupitiya momalaka onompholo avapitiya vala mokamuvo kehehi-ale tyipona omuvo ankho vamanena-po kohale. Vokupitiya momalaka onompholo vapandula unene otyipuka otyo tyili nokuvekwatesako. Umwe utiwa o Alexander wati: “Pehepano melaka lionompholo muna vali onovindiu ononyingi tyipona kohale. Otyo tyinthyambukiswa unene. Ononthiki ambuho ndyitala onovindiu.”

 Mahi pehepano pala okwovola ovipuka visukisa pala vokupitiya elaka like vala lionompholo, panyingila onondolale mbahavasi po 5.000. Otyo tyetukwatesako pahe tuli nokulinga onovindiu ononyingi momalaka onompholo.

 Tyina vokupitiya vamamane, onovindiu mbalingwa mbuna okuhika kovanthu mbalingilwa. Kohale ankho onovindiu mbatyo tumbupaka movikasete pamwe omonondisiku, mahi otyo ankho tyati vala otyo tyimana onombongo, otyo tyiseta, otyo tyipwilisa vala. Tupu ankho tungalavala, onovindiu mbatyo atumbutumu ko vokuna onomakina mbatyo mbokulinga ovikasete nonondisiku. Pahe haa ovikasete nonondisiku mbatyo, avitumwa komawaneno. Menima lyo 2013, pala okulinga onondisiku mbatyo panyingilile onondolale mbulamba po 2.000.000.

 Onompholo novihita-mulungu vapandula unene ovipuka ovio veli nokulingilwa. Mahi ankho pamwe katyapepukile okuundapa nonovindiu mbatyo ombo, haunene umwe movikasete no monondisiku. Pamwe ankho omukanda wike vala Wombimbiliya upakwa monondisiku ononyingi. Umwe ukala ko Brasil utiwa o Gilnei utyihinangela wati: “Tyina ankho twahanda okutanga otesitu imwe Yombimbiliya, una okwovola atee uvasa ondisiku yatyo, pahe haa oovola atee uvasa otesitu yatyo wahanda okutanga. Otyo ankho tyipwilisa unene.” Omuhikwena umwe utiwa o Rafayane nae ankho uundapa nonondisiku ombo, wati: “Ankho tyiponeswa unene pokulilongesa awike Ombimbiliya. Pala okuvasa otesitu wesuka nayo, nokwovolo onovelesikulu ononkhwavo, ankho umanena-po vala omuvo omunyingi.” Tupu tyina ankho ovaivisi vakaivisa nonondisiku ombo, hamwe ovikasete viatyo, vati yee pomunthu wesuka, avapake motelevisau yae atale. Tupu vamwe ankho vatyinda onomakina mbavo mbokuhikisa. Kohale kwali oumakina umwe unyingila ondisiku aulekesa, ovaivisi ovanyingi ankho oo valekesa nao. Bobby ukala ko Estados Unidos wati: “Tyina ankho wamalekesa omunthu otesitu imwe, pahe wahanda umulekesa onkhwavo, ondisiku ili-mo wiipola-mo, opake-mo onkhwavo. Otyipuka otyo ankho tyiseta, natyo ankho katyitukwatesako-ale pokutomphola novanthu Ombimbiliya.”

 Mo 2013, eongano lya Siovaa lialinga o aplicativo JW Library Sign Language, ikwatesako vokupopia elaka lionompholo vetyivile okupaka monotelefone mbavo no mono tablete onovindiu momalaka onompholo. Po tete, mo JW Library Sign Language ankho mupakwa vala onovindiu mbelaka lionompholo lyo ko América. Mahi pahe okuhimbikila mo 2017, mupakwa umwe onovindiu mbomakala atyo aeho onompholo. Vakwetu vokupopia omalaka onompholo mouye auho, otyipuka otyo atyivehambukiswa unene. Umwe ukala ko Brasil utiwa o Juscelino wati: ‘Tyina ndyityitala ngoti ankho onondyoi vala hatyili-ko-ale! Pahe ankho ndyisoka umwe unene okuti naina Ononkhalamutwe mbo Nombangi vetuhole unene onthwe onompholo no vokwahapopi, tupu vahanda umwe tukule motyili ngeetyi tyili nokulinga vokupopia. Tyotyili tyanthyambukisilwe unene, pahe atyimphe okulilongesa vali unene Ombimbiliya.’

 Pehepano, onovindiu momalaka aeho onompholo, mbulingwa, ambupakwa mo site yetu, nomo JW Library Sign Language. Otyo pahe tyili nokutukwatesako okupitiya omikanda momalaka onompholo, nokuvingalavala, nokuviaava mononthiki vala mbehehi, katyikala vali onohanyi, hamwe omanima. Soka pahe, momalaka omanyingi onompholo omikanda viatyo viila umwe vala kumwe nomikwavo.

 Tale etyi vamwe vokweheivi-ko, novihita-mulungu vapopia-popia. Omuhikwena umwe utiwa o Klízia wati: “Okuti kuna umwe vali eongano ekwavo ngeeli lisuka umwe ñgaa nonompholo novihita-mulungu, livepa umwe okulia kuvepameka moupanga wavo na Huku, mahi atyivepepukila ñgaa? Petupu otyipuka natyike mouye tweeleka neetyi eongano lya Siovaa lili nokutulingila.” Umwe utiwa o Vladimir wati: “Onovindiu melaka lionompholo mbundekesa umwe nawa okuti Siovaa usuka nonompholo novihita-mulungu ngeetyi vala esuka novanthu ovakwavo.”

 Onovindiu tulinga momalaka onompholo, pamwe tyina mbuhimbika mbuti: “Ovindiu ei kailandeswa, yalingilwa ovilinga viokulongesa ovanthu Ombimbiliya mouye auho vikwateswako nonombongo mbwaawa novanthu votyali.” Onthwe tupandula umwe unene oviawa mulinga, ovanyingi muli nokulingila mo donate.pr418.com. Oviawa ovio vili nokutukwatesako okulinga Onombimbiliya, nomikanda omikwavo vikwatesako ovanthu aveho okunoñgonoka Ombimbiliya, atee umwe momalaka onompholo.