Oviimbo otyipuka tyimwe otyiwa tuapewa na Siovaa. Oviimbo vituhika umwe komutima natyina tuanumana atuhambukwa umwe, vitukalesa nawa. Otyo umwe tukala tyina tutehela oviimbo vyo Broadcasting. Ngwe tyili oviimbo ovio kavituhiki vala komutima, mahi vitufueneka vali ku Siovaa.

 Okuhimbikila mo 2014, oviimbo vyo Broadcasting tualinga vilamba po 70, vimwe poviimbo ovio, vili-ale momalaka alamba po 500! Mahi pahe upondola okulipula oti, ‘ovalie valinga oviimbo viatyo ovio, vilingwa ñgeni?’

 Oviimbo vyo Broadcasting vilingwa no vokulinga onovindiu (Audio/Video Services) valulikwa Nokomisau Yokulongesa Yononkhalamutwe Mbonombangi. Ovanthu ovo vokulinga oviimbo vena 13, pati novalume novakai, ovo umwe vati avahoneka otyiimbo tyatyo avetyiviukisa nawa, nokulinga ovikuavo vali. Tupu Vokomisau Yokulongesa vetavela ovanthu vamwe vaundape motyilinga otyo kovilongo ovikwavo mouye auho, tyati ava vaimba ava vahoneka vamwe vahika. Ovanthu ovo aveho vaundapa-mo veliola omutima kavaovola okunkhimanena-po.

 Oñgeni oviimbo ovio vilingwa? Tete, Vokomisau Yokulongesa ovo vatala o monotesitu patyi Mbombimbiliya matyipolwa, oityi matyipopi, oñgeni matyiimbwa. Pahe voviimbo viatyo avaovola ava mavetyihoneka, nava mavetyiviukaisa nawa. Pahe avetyingalavala. Vokomisau Yokulongesa avetyitehelela, avapopi ine tyesukisa vali okuviukiswa. Ine pena apa pesukisa okuviukiswa atyiviukiswa, avetyingalava vali. Oviimbo ovio vingalavalelwa konomphangu mbelikalaila pamwe o mono Mbetele pamwe o momaumbo.

 Pala okungalavala oviimbo vyo Broadcasting, nokuviviukisa nawa, vena okukala natyiho tyesukisa mono kombutatole mbavo, vetyivile okuhonyeka nawa onondaka mbatyo notyiimbo tyokwahikwa, tupu vesukisa onomikolofene, nomakuluna, nono amplificandor. Omikolofone ike ipondola okulanda onondolale 100 (tyikehika monomili 42 kono Kwanza) pamwe mbupondola okulamba ponondolale 1000. Mo 2020, tuelipolele onondolale 116.000 tulande evi viesukisa pokungalavala.

 ityi tyili nokulingwa pala okuahamanena-po unene onombongo? Tuasoka okuti hahe vali okukala novanthu ovanyingi vetukuatesako veli kondye, tyipona okueeta ovanthu ovanyingi mo Mbetele vaundape koviimbo. Tupu katuongiya ovanthu ovanyingi vakale vala peke vangalavale, mahi okuviukisa oviimbo nokuviimba pamwe vetyilingila vala apa veli mono kombutatole.

 Ovanthu va Huku vetyihole unene tyokutehelela oviimbo vyo Broadcasting. Umwe utiwa o Tara ukala ko Alemanha wati: “Oviimbo vinthulisa omutima tyina nalinga otyiho. Okuvitehelela umwe melaka liange, ndyilitehela ngatyina uti Siovaa weya andyumbakana.” Umwe ukala ko Cazaquistão utiwa o Dmitry wati: “Ame ndyityihole tyokutehelela oviimbo ovio, mokonda hilingi-ale vali otyiho tyokuti hamwe vina vali etyi vipopia otyikuavo, ndyityii vala okuti vipopia etyi tyili Mombimbiliya. Mahi tupu, oviimbo ovio vinkhuatesako okusoka vala kovipuka vipameka oupanga wange na Huku.”

 Delia ukala ko África do Sul wapopia oñgeni oviimbo ovio vimukalesa wati: “Oviimbo ovio tyina ndyivitala vikahi ngatyina uti epoha linkhutila mu Huku. Tyina namelitehela okuti nasoya, hamwe pamwe pena otyitateka ndyina-tyo, apeho ndyivasa otyiimbo tyimphameka umwe nawa-nawa. Pamwe okutehela vala okuahikwa kwatyo, kwapwa, ndyilitehela umwe ndyikahi nawa!”

 Oviimbo vimwe vialinga umwe oviimbo vamwe vehole vali. Lerato nae ukala ko África do Sul wati: “Otyiimbo tyokwati ‘Komutwe Wange’ no tyokwati ‘Ouye Omupe Mauya’ vinthyokesa komutwe wandyila tyina tuamekelivasa vali na mee yange. Apeho tyina namatehela oviimbo ovio, ndyilinga ngatyina uti ndyiete mee uli nokuya no kuame wahanda okundyumbakana.”

 Otyiimbo tyimwe tyo Broadcasting, tyakuatesileko unene omona umwe ukala ko Sri Lanka. Omona oo wati: “Omulongesi wange kosikola wamphopile unene omapita mokonda vala Ndyimbangi ya Siovaa, mahi amphopila umwe pokati ka vakwetu. Ndyilitehela ñgaa natila owoma, netyi ndyipopia ndyitupu. Etyi nehika keumbo, mee anthi nkhele tehelela otyiimbo tyokwati ‘O Estudo me Faz Bem’ (Okulilongesa Tyikalesa Nawa). Etyi natehela otyiimbo otyo andyityimono okuti nesukisa okuovolola ndyiketyivile okupopia. Tyina tyiti onthiki onkhuavo ankhapopia nomulongesi wange. Anthehelela umwe nawa, atee nkhele apandula ovipuka onthwe Onombangi mba Siovaa tutavela. Ndyipandula unene eongano lya Siovaa lituavela oviimbo ngo ovio vitupameka.”

 Onombongo mbokulinga ovilinga ovio aviho tumbupola-pi? Tumbupola moviawa vilingwa vikwateseko ovilinga vya Huku mouye auho, ovanyingi vaavela mo donate.pr418.com. Tumupandula unene otyali muna-tyo.