Onombangi mba Siovaa vehole unene vakwavo vafenda navo mouye auho. (1 Petulu 2:17) Ovanyingi ponthwe tukala ngeetyi tyapopia omphange Tannis, Ukala ko Quênia wati: “Ndyityihole tyokwiva oñgeni vakwetu vekahi mouye auho.” Oñgeni Tannis Nonombangi ovakwavo ovanyingi-nyingi veiva oñgeni vakwavo vekahi mouye auho? Okuhimbila mo 2013 mo site yetu jw.org, pena pamwe tupaka etyi tyili nokumonekela vakwetu mouye, pokwati vili nokumoneka mouye.

 Pokwati vili nokumoneka mouye papopia vala Onombangi mba Siovaa neevi veli nokulinga mouye auho, Onombimbiliya mbuli nokupitiywa momalaka-nomalaka, novilinga viokukwatesako vana vatumbukilwa novihuna, novilinga viokutunga novipuka ovikwavo vali. Opo yatyo papopia vakwetu vekahi nokupakwa movikaleya mokonda yokufenda Huku. Tupu papopia evi vitupameka viyemba kovilinga viokwiivisa Nokehinangelo Liononkhia mba Kilisitu. Olie ukaovolola aviho eviete? Ovilinga patyi vilingwa-po?

 Vapaka ovipuka apa pati Evi Vili Nokumoneka Mouye o Voseketa Yokupopila Ounyingi (OYO). Oseketa oyo ikala Kombala Yonombangi ilulikwa no Vokomisau Yononkhalamutwe. Moseketa oyo muna ovanthu valamba po 100 ovalume novakai — ovanyingi vaundapela kovilongo viavo mwene, vamwe ovokuhoneka, vamwe ovokwovolola, ovakwavo ovokupola onofoto, ava vamwe ovokupitiya. Vamwe vapopia novatumini, ava vamwe vapopia na ava vokwatanga unene, ovakwavo vapopia na vana vokuundapa konolaliu no konotelevisau. Oseketa oyo yuundapa nonoseketa mbuna 80 monombetele mouye auho.

 Onoseketa ombo mbuundapela kumwe ambuho, opo mbupopie evi veli nokumoneka mouye. Tyina veiva otyipuka tyipondola okukwatesako ovanthu, nkhele vaovolola umwe nawa avatale ine tyiyumbwa umwe onthumbi. Pamwe vapula ku vana vokwatanga unene. Aviho-aviho veiva avevihoneka momukanda, pahe avatale umwe nawa ine etyi tyahonekwa tyelikwata umwe neetyi veiva, avapake-po nomalutalatu elikwata umwe neetyi vapopia, atyitumwa Kokomisau Yononkhalamutwe opo vetyitale ine tyikahi nawa avetyitavela.

 Oñgeni vakwetu vakala tyina vatala pana pokwati Evi Vili Nokumoneka Mouye? Omufikwena umwe ukala ko Filipinas utiwa o Cheryl, wati: “Komuhuka ndyiti vala pinduke-po andyitale pana pokwati evi vili nokumoneka mouye, ndyitale etyi eongano lya Siovaa lili nokulinga neetyi tyili nokumonekela ovanthu vae mouye auho.”

 Ovanyingi vetyimona okuti evi tupopia mo jw.org. pana pokwati Evi Vili Nokumoneka Mouye, vielikalela unene neevi vipopiwa molaliu nomo televisau. Umwe utiwa o Tatiana, ukala ko Cazaquistão wati: “Ame etyi tyinthyambukiswa okuti evi vipopiwa mo jw.org. viyumbwa umwe onthumbi, viati umwe ovio viyumbwa onthumbi tupu ovio viehelisetaseta-le.” Omufikwena umwe ukala ko México utiwa o Alma wati: “Evi twiiva mo televisau nomolaliu vitutilisa owoma, mahi evi tuvasa mo jw.org. vetupamenaka unene.”

 Evi tuvasa pana pakwati, Evi Vili Nokumoneka Mouye tyehekuyumbwa vala onthumbi, tupu vipameka umwe onthumbi yetu. Bernard ukala ko Quênia wati: “Evi ndyivasa pana pokwati, Evi Vili Nokumoneka Mouye, vinkhwatesa-ko okutala okuti ovakwatate nonomphenge mouye auho tumbunga katyitei oku vakala. Momalikwambelo ange ndyitumbula-mo omanyina avo novitateka viavo.” Tupu omphange omukwavo utiwa o Bybron ukala ko Quênia, wati: “Ndyihambukwa unene tyina ndyitala Onombimbiliya mbukahi nokwaawa momalaka omakwavo! Ononthele ombo mbunkhwatesako okunoñgonoka okuti Siovaa utupu okapungulula.”

 Na vina umwe vipopiwa viyemba kovakwatate vetu veyelwe novatumini navio vipameka unene.” Jackline nae ukala ko Quênia wati: “Onkhalelo vakola omutima nonthumbi venayo vimphameka unene, apeho ndyitehelela nawa ovipuka vivekwatesako okukoleleya. Nanoñgonoka okuti ovipuka vina ‘ovipii’ ngeetyi okulikwambela — nokutanga Ombimbiliya nokwiimba, ovipuka vivekwatesako okukala tyapama.”

 Omphange umwe ukala ko Costa Rica utiwa o Beatriz, wati, usuka unene nokutehelela ovinimawe vikahi nokweenda mouye. Wati: “Okwenda pana pokwati, Evi Vili Nokumoneka Mouye, ndyityimona oñgeni eongano likahi nokukwatesako liwa-liwa ovakwatate nolwembia olunene. Otyo tyinkhalesa ononthumbi yokuti eli eongano umwe lya Siovaa.”

 Tupandula unene mokonda tukahi nokunoñgonoka etyi tyikahi nokupita novakwatate vetu mouya auho! Ine haviawa ulinga opo ukwateseko eongano, otyo ñgeno katyevililwe, oviawa ovinyingi vilingilwa mo site yetu donate.pr418.com Tupandula unene otyali tyove.