Onthwe Nombangi mba Siovaa tutavela vala etyi Ombimbiliya ipopia. Otyo onthwe pamwe tupilululila ovipuka tutavela tyina twamanoñgonoka vali nawa Ombimbiliya. a

 Otyipuka otyo tulinga, tyelikwata umwe nawa neetyi Ombimbiliya ipopia momukanda Omihe 4:18, yati: “Ondyila yovaviukisi, ongotyitei tyekumbi tyina kutya, ongotyitei tyivialuka katutu-katutu atee kwaandyuluka umwe nawa.” Tyina ekumbi lihimbika okutunda ovipuka tuvimona vali nawa. Na Siovaa utukwatesako okunoñgonoka ovipuka katutu-katutu, momuvo watyo umwe. (1 Petulu 1:10-12) Ya ngeetyi Ombimbiliya ipopia, otyipuka otyo uli nokutyilinga haunene umwe ‘kononthiki mbono mbokuhulila.’— Ndaniyele 12:4.

 Tyina ovipuka tutavela vipilululwa onthwe katyituhuvisa atusoyo. Novafendi va Huku vokohale navo ankho vena umwe ovipuka vetavela viehekahi nawa, avesukisa umwe okupilulula omalusoke avo.

•   Mwisesi ankho usoka okuti wafwapo pala okuyovola ova Isilayeli. Mahi Siovaa wemuyeka vala alinge otyipuka otyo, etyi palamba omanima 40. — Ovilinga 7:23-25, 30, 35.

•   Ovatumwa kavanoñgonokele eulo lipopia ononkhia mba Mesiya, netutilo liae. — Isaiya 53:8-12; Mateusi 16:21-23.

•   Vamwe povakilisitau vokohale, ankho vena omalusoke apenga ayemba ‘konthiki ya Siovaa.’ — 2 Ova Tesalonika 2:1, 2.

 Etyi pakala pahe Huku eveviyula. Noonthwe hono tulikwambela opo etuviyule tyina tyesukisa. — Tiaku 1:5.