•  Oñgeni Onombangi mba Siovaa vetyimona okuti ovipito evi vilingwa evi kavilingwa?

•  Okuti Onombangi mba Siovaa vehole umwe onombunga mbavo tyina vahakala navo povipito?

•  Okuti onombangi mba Siovaa vakuluminya vakwavo navo vakoye vala okulinga ovipito vimwe?

 Tyina Onombangi mba Siovaa veheneende kotyipito, nkhele vatala umwe nawa etyi Ombimbiliya ipopia. Nga vamona okuti otyipito tyimwe tyilipona netyi Ombimbiliya ipopia avahaende-ko. Mahi pena ovipito vimwe, munthu-na-munthu oe mwene usoka ine maiko ine kamaiko. Mahi una okulinga atyiho opo akale “nomutima wasukuka komaiho a Huku no komaiho ovanthu.” — Ovilinga 24:16.

  Tyina Onombangi mba Siovaa veheneende kotyipito tyimwe, nkhele velipula okuti: a

•   Motyipito omu muna tyimwe tyilingwa-mo tyilipona netyi Ombimbiliya ipopia?

   Etyi Ombimbiliya ipopia: Siovaa wati: “Tundei pokati kavo, hondovokei-po, yekei-po okukuata kovipuka viasila.” — 2 Ova Kolindu 6:15-17.

   Opo Onombangi mba Siovaa vayekepo ovipuka viasila, vina vilipona netyi Ombimbiliya ipopia, kavahinangela onofeliyatu ombu:

   Ofeliyatu yatuka kovanthu vokufenda ono huku mbomatutu. Sesusi wati: “Una okufenda Siovaa Huku yove, oe vala una okuumbila.” (Mateusi 4:10) Onombangi mba Siovaa vahanda umwe okulinga ngetyi tyipopia onondaka ombo, otyo vahalingila o Natale, no Pasikwa mokonda ovipito ovio, viatuka kono huku mbomatutu. Tupu kavahinangela onofeliyatu ombu:

  •  Kwanzaa. Omukanda umwe wapopia okuti ondaka Kwanzaa “yatunda melaka lyo suaíli, veiti matunda ya kwanzaa, ipopia okuti ‘ovinyango vyo tete.’ Ovipito ovio viatuka kovipito ankho vilingwa mo Afilika tyina vateya.” Ovanthu vamwe vasoka okuti ovipito ovio kaviatuki-ale kovanthu ankho vahafende Huku. Mahi omukanda umwe utiwa Enciclopédia de Religião Africana wapopia okuti: “Ovipito ovio ankho valinga pokuteya, ankho vevilingila ono Huku mbavo novakwaukulu vavo pala okuvepandula.” Tupu wapopia vali okuti: “Notyipito etyi tyitiwa Kwanzaa, vati vetyilinga opo vapandule ovakwaukulu vavo.”

  •  Otyipito Tyohanyi (Festival da Lua). Omukanda umwe upopia ovipito vilingwa mouye auho, wapopia okuti: otyipito otyo tyitiwa Festival da Lua ou Festival do Meio do Outono tyilingwa pala okunkhimaneka huku yohanyi. Pokutyilinga ovakepia vatwika konongolo avafende ko tyika-huku tyavo. Otyipuka otyo valinga, molusinesi tyitiwa kowtow [otyipito tyonthilo]”. — Religiões do Mundo — Enciclopédia Abrangente de Crenças e Práticas.

  •  Noruz (Nowruz). “Otyo otyipito tyimwe tyehimbikale okulingwa kohale novanthu vokapela kamwe katiwa, zoroastrismo; kuvo onthiki yofeliyatu oyo yelikalela umwe nononthiki ononkhwavo. . . . ankho vati pena otyipuka tyimwe tyitiwa Rapithwin, poutalala otyipuka tyatyo otyo ankho tyenda umwe nokohi-kohi pohi. Tyina tyiti poutokotwe atyikondoka vali kombanda. Pahe ankho valinga otyipito pala okuliepesa nawa otyipuka tyatyo otyo.” — Unesco.

  •  Otyipito tyitiwa Yalda (Shab-e Yalda). Omukanda umwe wapopia okuti, otyipito otyo tyitiwa Yalda tyilingwa poutalala, (pononthiki kuseta okutya). Tyelikwata umwe “nefendelo limwe litiwa Mitra,” o huku yotyitei. Tupu otyipito otyo tyelifwa netyi ankho tyilinga ova Loma nova Ngeleku pokufenda onohuku mbekumbi. b

  •  Onthiki Yokupandula (Dia de Ação de Graças). Otyipito otyo tyilingwa vala ngetyi tyilingwa otyipito Kwanzaa. Natyo tyatuka movipito ankho vilingwa pokuteya. Ovipito ovio ankho opala okunkhimaneka ono huku mbelikalaila. Etyi pakala pahe ovakilisitau navo avatokela mokulinga ovipito ovio. — Uma Grande e Divina Aventura — Os Peregrinos e a Lenda do Primeiro Dia de Ação de Graças.

   Onofeliyatu mbomatambu nomalao. Ombimbiliya yapopia okuti vana “vapakela omesa pala huku yelao” vekahi vala nga “vana vayekapo Huku.” (Isaías 65:11) Otyo Onombangi mba Siovaa vahalingila ovipito evi:

  •  Ivan Kupala. Omukanda umwe wapopia okuti “monthiki yotyipito otyo tyitiwa [Ivan Kupala], mouye mutunda otyipuka tyimwe tyina unene ononkhono, ovanthu vana vehena owoma, vena elao, ankho veliuvamo opo navo vakale nononkhono,”tyahonekwa momukanda utiwa The A to Z of Belarus. Mwene otyipito otyo ankho tyilingwa novanthu vahafende Huku, vetyilinga pokwenye (Pomuvo ekumbi liseta okunyingila). Omukanda utiwa Enciclopédia da Cultura Russa Contemporânea, wati “ovipito ovio ankho vilingwa vala novanthu vahafende Huku pahe avihimbika okulingwa motyipito tyonthiki yofeliyatu mokapela itiwa, [“dia do santo” João Batista].

  •  Ombowano yono Sinesi no mbowano yova Koreya (Ano Novo Chinês ou Ano Novo Coreano). Omukanda umwe utiwa Bolos da Lua e Espíritos Famintos: Festividades da China, wati “povipito opo, etyi onombunga nomapanga vesuka vali natyo, okukala nelao, nokunkhimaneka ovikahuku viavo novilulu, vaita umwe kovikahuku okuti enima eli tukale-vo nelao”. Tupu otyo tyilingwa potyipito tyo mbowano yova Koreya “vafenda vala kovakwaukulu vavo apalingwa oviso vimwe, vati opo ovilulu viehevelinge omapita, pahe avaiti vakale nelao enima elio, avapulu kovitapi ine enima liya mavakala nelao.” — Enciclopédia das Comemorações de Ano-Novo ao Redor do Mundo.

   Ofeliyatu yatunda mondongeso yokuti ohande kainkhi. Ombimbiliya ipopia umwe nawa okuti ohande inkhia. (Ezequiel 18:4) Otyo Onombangi mba Siovaa vahalingila ovipito vina vilekesa okuti ohande kainkhi. Ngevi viapopiwa apa:

  •  Onthiki yonohande (Onthiki Yovaye). Omukanda Nova Enciclopédia Católica wapopia okuti: Onthiki oyo, “oyokuhinangela ovanthu vokwanyima”. Tupu wapopia vali okuti “kohale ovanthu ankho vasoka okuti monthiki oyo ovanthu vana vokwanyima onohande mbavo mbuya ngatyina omamboto opo vamonese ononkhumbi vana ankho vevelinga onya etyi vena omwenyo.”

  •  Festival Qingming (Ching Ming) Otyipito tyonondele. Omukanda umwe wapopia okuti: Ovipito ovio vilingwa pala okunkhimaneka ovakwaukulu. Motyipito tyatyo omo tyitiwa Qingming, ovanthu “vateleka okulia, avaeta ovikunwa avaeta onombongo, vati opo vana vokwanyinma vahaliwe nondyala, nohunga, tupu vahakale tyihena onombongo.” Tupu omukanda watyo oo wapopia vali okuti “Mohanyi yatyo omo haunene umwe [tyina ohanyi yaviala] ovanthu vasoka okuti opo vokwankhia no vokuna omwenyo velikwatapo vali, valinga vali omapanga omanene, otyo valingila umwe ovipuka ovio aviho monthiki oyo, vakale nombembwa, tupu opo vahilivike ovakwaukulu vavo”.

  •  Chuseok. Omukanda umwe utiwa Tradição Coreana de Religião, Sociedade e Ética wapopia okuti: “Motyipito otyo ovanthu vaeta okulia nokunwa avaavela onohande”. Valinga ngotyo mokonda vasoka okuti “omunthu nga ankhia molutu lwae pena etyi tyitundamo tyisala nomwenyo.”

   Ofeliyatu yovatali novimbanda. Ombimbiliya yapopia okuti: “Pokati kenyi pahakale nawike uyoka omona wae womulume ine omukai motupia, na una utapesa, notyimbanda nomphule ine onganga. Ine omunthu uyumba vakuavo owanga, ine o umwe ukapula kotyitapi, ine omutali wovipuka mavikamoneka, ine omunthu ukapula ko vokuankhia. . . Mokonda, omunthu ulinga ovipuka viatyo ovio ku Siovaa utoyesa”. (Deuteronômio 18:10-12) Pahe opo Onombangi mba Siovaa vehelipake mokutapesa, nokutalela kononthungululu, kavalingi otyipito tyimwe tyitiwa Halloween novikwavo vali matupopi apa:

  •  Ano-Novo Tamil e Cingalês. “Ovanthu valinga ovipito ovio, vati opo vaete elao.” — Enciclopédia do Sri Lanka.

  •  Songkran (Ombowano yo Tailandia). Otyipito otyo tyilingwa ko Asia enyina liatyo liapolwa mondaka sânscrita ipopia ‘okwenda’ ine ‘okulamba,’ otyipito otyo] tyilingwa tyina ekumbi likalambela pononthungululu mbumwe mbutiwa zodiacal de Áries”. — Comida, Banquetes e Fé — Enciclopédia de Cultura Alimentar nas Religiões do Mundo.

   Ovipito ankho vilingwa Movitumino viapelwe Moisesi, vianyimwa-ko notyilikutila tya Sesusi. Ombimbiliya yati: “Kilisitu oe onthyulilo Yovitumino.” (Ova Loma 10:4) Etyi tyipopia ovitumino viapelwe ova Isilayeli na hono nkhele tyikwatesako ovalanduli va Sesusi. Mahi ovipito viatyo viapopiwa movitumino ovio kavevilingi, haunene umwe vina ankho vilekesa okuti Mesiya meya. Mokonda Mesiya weyale. Tupu Ombimbiliya yapopia okuti: “Ovipuka ovio ankho okahi kovipuka maviya, mahi olutu lueeta okahi oko, o Kilisitu.” (Ova Kolosu 2:17) Mokonda yotyo, ovalanduli va Kilisitu kavalingi ovipito ovio. Tupu movipito ovio pahe mwapakwa vali ovipito ovikwavo vilipona netyi tyipopia ombimbiliya. Tyihe-otyo vala ovipito vili pombuelo apa Onombangi kavevilingi:

  •  Hanuká. Otyipito etyi ovanthu vetyilinga opo vahinangela ondyuo yokufendela yova Sundeu mo Selusalei. Mahi Ombimbiliya ipopia okuti etyi Sesusi Kilisitu akala omunene-nakwa wavilapo “wanyingila mekaka enene nokuavilapo vali lihalingilwe nomavoko, ine lihatungilwe pano pohi.” (Ova Hebeleu 9:11) Kovalanduli va Kilisitu, ekaka olio Sesusi anyingila lianyimapo ondyuo yokufendela yoko Selusalei.

  •  Rosh Hashaná (Ombawano yava Sundeu). Onthiki yotete yenima lyo va Sundeu. Kohale ovanthu ankho valinga otyipito otyo opo valingile ovilukutila Huku. (Números 29:1-6) Mahi etyi Sesusi Kilisitu akala Mesiya, “wamanako ovilikutila noviawa”. Otyo Huku ehetavelela vali ovilikutila ovio. — Daniel 9:26, 27.

•   Okuti ofeliyatu omo omalongeso ahonyena?

   Etyi Ombimbiliya ipopia: “Oityi omutaveli ena tyelifwa nou uhetavela? Oityi ovikahuku viomatutu vilinga mondyuo ya Huku?” — 2 Ova Kolindu 6:15-17.

   Onombangi mba Siovaa velikwatehila umwe opo vakale nombembwa na vakwavo, vena onthilo novipuka valinga tupu kavakuluminya vakwavo okulinga etyi vahanda. Mahi Onombangi mba Siovaa kavelihonyeka kumwe na novanthu vomovikapela ovikwavo opo vafendele kumwe Huku. Nii kavalingi ovipito evi:

   Ovipito viokunkhimaneka omunthu omunene wongeleya no viokuhonyeka ovanthu vonongeleya ambuho. Etyi ova Isilayeli vatunda ko Isitu avaende kotyilongo otyikwavo. Mokonda motyilongo omo vaya namo ovanthu ankho vafenda ovikahuku, Siovaa evepopila okuti: “Mwahalingei omphango navo nii ono huku mbavo. . . . ine mufenda ono huku mbavo matyimweetela.” (Êxodo 23:32, 33) Otyo Onombangi mba Siovaa vahalingila ovipito evi:

  •  Loi Krathong. Otyipito otyo tyilingwa ñgaa: “Ovanthu vakwata omafo aveetungu aakala ngatyina omalonga, avatemesa onovela, pahe avembuyumbu momaande. Valinga ngotyo opo vati vakale nelao. Otyipito otyo tyilingwa opo vahinangele oviso ankho vilingwa pokufenda omunthu umwe utiwa o Buda.” — Enciclopédia do Budismo.

  •  Dia Nacional do Arrependimento (Onthiki Yokulivela). Omukulu umwe ukala ko Papua-Nova Guiné wapopia okuti: Ovanthu valinga otyipito “ovo vana vena onthumbi.” Wapopia vali okuti onthiki oyo itiwa onthiki yovanthu vokwelivela, ikwatesako ovanthu “okuyandyanesa ovitumino vya Huku motyilongo.”

  •  Vesak. “Vati onthiki oyo, onthiki umwe yelikalela no nonthiki ambuho mokonda onthiki Buda atyitwa. Tupu monthiki oyo vahinangela ovipuka alingaile, nononkhia mbae.” — Dicionário de Feriados, Festivais e Celebrações do Mundo.

   Ovipito Vionongeleya Viehelikwatele Neetyi Ombimbiliya Ilongesa. Sesusi wapopile ovanthu vonongeleya okuti: “Ngotyo, ondaka ya Huku onwe mueipola esilivilo mokonda yoviso vienyi.” Evepopila vali okuti efendelo liavo kalisilivila mokonda “valongesa vala ovitumino viovanthu.” (Mateusi 15:6, 9) Mokonda Onombangi mba Siovaa vahanda umwe okulinga ngetyi tyipopia onondaka ombo kavalingi ovipito vionongeleya, ngeevi matupopi apa:

  •  Onthiki Yovitapi Vitatu. (Three Kings’ Day, Timkat , or Los Reyes Magos ). Ovanthu vati otyipito otyo opala okuhinangela vana vokutalela kononthungululu nombatisimu ya Sesusi. Omukanda Enciclopédia do Natal wati: “Ovipito ovio ankho vilingwa novanthu vahafende Huku, ovanthu ovo ankho vafenda huku yomaande aenda, nonondongi”. Otyipito otyo tyikahi nga tyimwe tyitiwa Timkat, “tyatuka umwe vala moviso.” — Enciclopédia da Sociedade e da Cultura do Mundo Antigo.

  •  Onthiki Me Apita Keulu. Otyipito otyo vetyilinga opo vahinangele onthiki vapopia okuti oyo Maliya mee ya Sesusi apita keulu. Omukanda umwe utiwa Religião e Sociedade – Enciclopédia do Fundamentalismo wapopia okuti: “Ovipito ovio Ovakilisitau ankho kavevii no Mbimbiliya kaivipopi-ale.”

  •  Otyipito Tyonthiki Me Maliya Atyitwa. Omukanda umwe utiwa Enciclopédia Nova Católica wati: ‘Otyipito otyo Ombimbiliya nii vala kayetyipopile. Tyahindwa umwe vala novanthu vovikapela.”

  •  Onthiki yokuundwa etwe (Quaresma). Omukanda umwe utiwa Enciclopédia Nova Católica wati: Otyipito otyo tyahindwa apa tyahimbika palambale omanima 200 okupolelela apa Ombimbiliya yapwa Okuhonekwa. Tupu omukanda watyo oo, wapopia vali okuti: ‘Pena onkhiki itiwa onthiki yomutatu (Quarta-feira de Cinzas). Mouye auho ovanthu valinga otyipito otyo. Tyahimbika okulingwa menima lyo 1091.’

  •  Meskel. Omukanda umwe wati: Otyipito otyo tyatuka ko Etiopia, vati vetyilinga opo “vahinangele onthiki vavasa ekulusu (ekulusu liatyo omu mwapapelelwe Sesusi). Tyina vetyilinga vanthiaka otupia pahe otyo vanyana okulise-seta nekundungala liotupia.” Mahi Onombangi mba Siovaa kavafende kekulusu.

•   Okuti onofeliandu mbunkhimaneka ovanthu, novilongo?

   Etyi Ombimbiliya ipopia: “Siovaa wati: “Wahamakakala nawa omunthu una uyumba onthumbi movanthu, nokwapamena vala mononkhono mbovanthu vakwavo, una womutima wayapuka ku Siovaa.” — Jeremias 17:5.

   Onombangi mba Siovaa vehole umwe vakwavo, atee veveitila-ko momalikwambelo avo. Mahi kavalingi ovipito evi:

   Ovipito vinkhimaneka ovatumini novanthu ovakwavo. Ombimbiliya yati: “Pala ouwa wenyi yekei-po okuyumba onthumbi movanthu, vekahi vala ngatyina omwenyo womomayulu enyi. Oityi muvenkhimanekela?” (Isaías 2:22) Otyo Onombangi mba Siovaa vahalingila ovipito tyina Onohamba mbamatuukisa omanima.

   Otyipito Tyokutulika Epandela. Onombangi mba Siovaa kavalingi otyipito tyokutulika epandela. Mokonda yatyi? Mokonda Ombimbiliya yati: “Liyungei kovikahuku.” (1 Suau 5:21) Ovanthu vamwe vasoka vala okuti epandela hatyikahuku-ko. Natyina umwe valinga otyipito pokulitulika kavasoko okuti ngotyo olio vekahi nokufenda. Mahi omukulu umwe utiwa o Carlton J. H. wahoneka okuti movilongo aviho, “Otyipuka tyimwe ovanthu valinga tyilekesa umwe okuti vena onthumbi mu Huku, okufenda epandela.”

   Ovipito vyo nosandu. Oityi Petulu apopilile omulume umwe una onthilo na Huku, etyi eya ponthele yae aikila konongolo? Ombimbiliya yati: “Petulu emukatula iya ati: ‘Katuka; Ame na ame ndyimunthu vala.” (Ovilinga 10:25, 26) Nga Petulu nono apositolu ononkhwavo vehetavelele okufendwa, Onombangi mba Siovaa navo kavaende kovipito vilingilwa onosandu. Ngeevi matupopi apa:

  •  Onthiki yonosandu ambuho (Dia de Todos os Santos). “Otyipito tyimwe tyilingwa ovanthu vati, tyatiwa onosandu. . . apa tyatuka kapeiwa-le nawa.” — Nova Enciclopédia Católica.

  •  Otyipito tyilingwa pala okunkhimaneka otyilolo tyimwe (Festa de Nossa Senhora de Guadalupe). Otyipito otyo tyilingwa pala “okunkhimaneka otyilolo tyimwe tyo ko México.” Otyilolo otyo ovanthu vati, o Maliya mee ya Sesusi. Vati tyamonekelele omunthu umwe ankho uli mepia menima lyo 1531. — Enciclopédia Greenwood da Literatura Latina.

  •  Onthiki yenyina (Dia do Nome ou Dia Onomástico). Omukanda umwe wati: “Onthiki oyo, onthiki vahinangela omunthu umwe osandu, ine monthiki oyo pena omunthu umbatisalwa ulukwa enyina liomunthu.” Omukanda wapopia vali okuti: “Pena otyipuka tyimwe tyilingwa movikapela tyelikwata umwe nonthiki oyo.”

   Ovipito vilingwa novanthu vopolitika (Celebrações de movimentos políticos ou sociais). Ombimbiliya yati: “Hahe vali okuholama mu Huku tyipona okuyumba onthumbi momunthu.” (Salmo 118:8, 9) Kuna vali ovipito ovikwavo Onombangi mba Siovaa vahalingi vitiwa onthiki yovakai, nonthiki yovakwendye (Dia da Mulher e do Dia da Juventude). Mokonda ovipito ovio, oviovanthu vopulitika. Movipito ovio Ovanthu valinga ovikambanya, vahanda okuviukisa ovitateka viovanthu. Mahi Onombangi mba Siovaa kavalingi ovipuka ovio, mokonda vetyii okuti meya vala okumanako ovitateka aviho viovanthu o Huku. Tupu otyo Onombangi mba Siovaa vahalingila ovipito viokuhinangela onthiki ovanthu vayovoka koupika vitiwa: Dia da Abolição da Escravidão, mokonda vetyii umwe okuti Huku, oe vala meya okumanako okapungulula, akuhakakala vali omunthu nawike ukala omupika. — Ova Loma 2:11; 8:21.

•   Okuti ovipito ovanthu valinga vihole okutombesisa vakwavo?

   Etyi Ombimbiliya ipopia: “Huku utupu okapungulula, mahi momalongo aeho omunthu una onthilo nae nokulinga etyi tyaviuka umutavela.” — Ovilinga 10:34, 35.

   Onombangi mba Siovaa vehole umwe ovilongo viavo, mahi kavalingi ovipito viokunkhimaneka otyilongo ngevi viapopiwa pombwelo apa.

   Ovipito viokunkhimaneka omafwalali (Eventos que honram as forças armadaz). Sesusi wapopilile ovalongwa vae okuti: “Tualeiko okukala nohole nonondyale mbenyi nokulikuambelela-ko vana vemumonesa ononkhumbi.” (Mateusi 5:44) Otyo Onombangi mba Siovaa vahalingila ovipito viokunkhimaneka omafwalali ngevi matupopi pombwelo apa:

  •  Onthiki ya Anzac (Dia de Anzac). “Ondaka oyo ‘Anzac’ ipopia omafwalali oko Austrália noko Nova Zelândia.” Mahi pehepano onthiki vahinangela omafwalali okwankhila movilwa”. — Dicionário Histórico da Austrália.

  •  Otyipito tyo vokwali movilwa (Dia dos Veteranos de Guerra ou Dia da Lembrança). Ovipito ovio opala okupandula “vana vokwali movilwa no vokwankhililile-mo. — Enciclopédia Britânica.

   Onthiki yokuhinangela evi vialingailwe motyilongo, nonthiki otyilongo tyayoka. Sesusi wapopilile ovalanduli vae okuti: “Kavalingi onthele youye, ngetyi ame nahalingi onthele youye.” (Suau 17:16) Namphila Onombangi mba Siovaa vehole umwe okulilongesa ovipuka vialingailwe motyilongo tyavo, mahi kavalingi ovipito evi:

  •  Onthiki yo Austrália (Dia da Austrália). Ngetyi tyipopia o Enciclopédia Worldmark de Culturas e Cotidiano, otyipito otyo tyilingwa pala okuhinangela “enima lyo 1788, pweetyi o Inglaterra yahimbika okukolonyeka o Austrália.”

  •  Onthiki ya Guy Fawkes (Dia de Guy Fawkes). Motyipito omo “vahinangela onthiki imwe omukulu umwe utiwa o Guy Fawkes novanthu ovakwavo vo katolika vahandele okwiipaa Ohamba Jaime I novatumini ovakwavo ko Inglaterra menima 1605.” — Dicionário do Folclore Inglês.

  •  Onthiki otyilongo tyayovoka (Dia da Independência). Kovilongo ovinyingi ovanthu vahinangela onthiki otyilongo tyavo tyayovoka koupita. Onthiki otyilongo tyayeka-po okukolonyekwa. — Merriam-Webster’s Unabridged Dictionary.

•   Okuti movipito ovio tuli nokupopia mulingwa vala ovipuka ovivi?

   Etyi Ombimbiliya ipopia: “Omuvo muapesela watuuka puetyi ankho mulinga ehando liovanthu vomalongo, novituwa vikundisa, nepeleyo enene liokulihanda, nokunwa unene, novipito ovivi, nomaunkholwa, nokufenda ovikahuku.” — 1 Petulu 4:3.

   Onombangi mba Siovaa kavaende movipito vina munuwa unene omo ovanthu veheliyungu. Mahi vetyihole umwe tyokukala nomapanga avo, pamwe atee valinga umwe ovipito. Mahi mwene ovo vetyii ine mavanu ine kamavanu. Apeho velikwatehila pala okwendela mu etyi tyipopia Ombimbiliya: “Tyilinge mulia, munwa, ine mulinga otyipuka otyikuavo, lingei ovipuka aviho pala okunkhimaneka Huku.” — 1 Ova Kolindu 10:31.

   Onombangi mba Siovaa kavaende ko kalunavale mokonda mulingwa ovipuka vimwe Ombimbiliya yailika. Kohale ova Sundeu ankho valinga otyipito tyimwe tyitiwa Purim vahinangele onthiki vayovoka kovanthu ankho vahanda okuveipaa. Omukanda umwe wapopia okuti ‘ovipuka hono vilingwa motyipito otyo vielifwa vala nevi vilingwa motyipito tyitiwa Mardi Gras no mo Kalunavale. Motyipito omo mulingwa vala ovipuka ovivi, ovalume vavala ovikutu vyo vakai, vanyana vala omapita, munuwa unene, otyo vaviela vala unene.’

 Yoo. Ombimbiliya ipopia okuti tuna okuhumba onombunga mbetu, nokuvelinga onthilo, tyihatalela mokapela ekahi. (1 Petulu 3:1, 2, 7) Tyina omunthu umwe amakala Ombangi ya Siovaa uyekapo okweenda kovipito vimwe, iya vamwe mombunga yae vapondola umwe okunumana unene avati etyi ekahi nokulinga katyaviukile. Otyo vamwe tyina vamakala Onombangi mba Siovaa vapopila umwe onombunga mbavo okuti vevehole, avevehangununina umwe nawa omokonda yatyi vahamalingaila vali ovipito vimwe, nokuvepopila okuti apeho maveya okuvetalailapo mononthiki mbumwe.

 Au. Vetyii umwe okuti munthu na munthu oe mwene una okukoya etyi ahanda okulinga. (Josué 24:15) Onombangi mba Siovaa ‘vahumba ovanthu vatyo aveho’, tyihatalela mokapela ekahi. — 1 Petulu 2:17.