Onombangi mba Siovaa vetei vala Ombimbiliya vatanga. Mahi tyina vena Ombimbiliya Tradução do Novo Mundo momalaka avo, haunene oyo vali vatanga. Veihole mokonda ina enyina lya Huku, ipopia umwe etyi Huku atumine tyihonekwe, iivala nawa.

•   Enyina lya Huku. Ovanthu vamwe vokulinga ono Mbimbiliya vetupu onthilo na muhekulu wokuatumine ihonekwe. Mo Mbimbiliya imwe, muna omanyina ovanthu vakatuuka 70 vokualingile Ombimbiliya oyo, mahi soka petupu apa uvasa-vo enyina lya Huku, Siovaa.

   Mo Tradução do Novo Mundo enyina Siovaa livasiwa umwe, apa muene Huku atumine lipakwe, mahi omanyina a ava vokueilingile kaapakelwe-mo.

•   Etyi Huku atumine tyihonekwe. Ono Mbimbiliya ha ambuho mbupopia umwe etyi Huku atumine tyihonekwe po tete. Ombimbiliya imwe, omukanda wa Mateusi 7:13, yati ñgaa: “Nyingililei mombundi yahita.” Mokonda onthanda nokuahandyuka etapalo lituala ko ifelunu.” Mahi Sesusi mokuapopia onondaka ombo, katile o ifelunu, ina watile ehanyauno. Mokutala omunthu wokualinga Ombimbiliya oyo, usoka okuti ovanthu vokulinga ovivi mavakamoneswa emone mo ifelunu, mahi ngwe Ombimbiliya hatyo-ko ipopia. Ombimbiliya Tradução do Novo Mundo, yapopia umwe etyi muene Sesusi apopile, yati: “Nyingililei mombundi yahita. Mokonda onthanda nokuahandyuka etapalo lituala kehanyauno.”

•   Iivala nawa. Ombimbiliya ikahi nawa, oyo ina ipopia umwe etyi Huku atumine tyihonekwe, mahi tupu onondaka mbatyo mbuna okuivala nawa. Momukanda Ova Loma 12:11, omu apositolu Paulu wapopia okuti omunthu wa Huku una “okuhiluka mokati.” Mahi okupopia ngotyo Molunyaneka, omunthu kanoñgonoka nawa etyi tyihandwa okupopiwa. Otyo o Tradução do Novo Mundo yatila, “muhakalei vokuananga,” mokonda otyo muene Paulu ankho ahanda okupopia.

 Tyehe ovipuka ovio vitatu tuapopiwa apa, Ombimbiliya Tradução do Novo Mundo, ovanthu veipewa vala otyali. Otyo tyikahi nawa mokonda ovanyingi vokuahepa unene, pahe vetyivila okutanga Ombimbiliya momalaka avo muene.