Onombangi mba Siovaa kavelipake movilwa mokonda:

1.   Vetavela Huku. Ombimbiliya yapopia okuti ovanthu va Huku “omitunga viavo, mavekevinthila omatemo, nii kamavakalongeswa vali okulwa.” — Isaiya 2:4.

2.   Vetavela Sesusi. Petulu wapopililwe na Sesusi okuti: “kondola omutunga motyilalo, aveho vakwatela vakwavo omutunga, navo mavakankhia komutunga.” (Mateusi 26:52) Nonondaka ombo Sesusi walekesa umwe okuti ovalanduli vae kavelipake movilwa.

    Ovalongwa va Sesusi vetavelele umwe etyi evepopilile ‘avehelipake mouye,’ otyo okuti ankho kavelipake po viopulitika. (Swau 17:16) Kavahulile komutumini nawike ya tupu ankho kavatyiki vana vahanda okukala omafwalali.

3.   Vehole vakwavo. Sesusi wapopilile ovalongwa vae okuti: “Lilingei olwembia na vakwenyi.” (Swau 13:34, 35) Mokulinga ngootyo ankho mavakala ovanthu velikwata-po avehelilwisa. — 1 Swau 3:10-12.

4.   Etyi tyalingile Ovakwa-Kilisitu votete. Omukanda utiwa Enciclopédia da Religião e da Guerra (The Encyclopedia of Religion and War), wati: “Ovakwa-Kilisitu votete ankho kavelipake movilwa tupu ankho kavakala omafwalali. Ankho valinga ngootyo mokonda vetavela etyi Sesusi evepopilile okuti vena umwe okuhumba nonondyale mbavo.” Omukulu umwe (teólogo) utiwa Peter Meinhold wati: “Kohale ankho omunthu okuti oku omukilisitau oku otyo efwalali katyitavela.”

 Onombangi mba Siovaa ovanthu vekahi nawa, kavalingisa otyiho mokonda kavalingi ovipuka vinyona ombembwa yotyilongo. Valinga onthilo ovatumini, mokonda valandula etyi Ombimbiliya yati:

•   “Ovanthu aveho vetavele kovatumini.” — Ova Loma 13:1.

•   “Tya Sesale tyipei Sesale, etyi tya Huku, tyipei Huku.” — Mateusi 22:21.

 Onthwe tutavela ovitumino, tufeta omalilimu, tutavela ovipuka ovatumini valinga vakwateseko otyilongo.