Onthwe katulityilika okukala navana vokwayeka-po okwivisa nokwenda komaliongiyo. Onthwe tuveovola opo tuvekwatesako valinge vali ovilinga viavo ankho valingila Huku.

 Onthwe katutaata omunthu una walinga onkhali. Mahi, tyina omunthu umwe ombangi ya Siovaa wambatisalwa aliatela vala kovitumino otyo ehelivele, omunthu oo apolwa mewaneno ngokuti onthwe tulityilika okukala nomunthu oo. Mokonda Ombimbiliya yati: “Polei omunthu ondingavivi pokati kenyi.” — 1 Ova Kolindu 5:13.

 Mahi pahe ine omulume una omukai novana apolwa mewaneno? Namphila otyilinga tyae tyokukwatesako ombunga okupameka oupanga wavo na Huku tyapiluluka, mahi otyilinga tyae tyokutekula ombunga katyapilulukile. Okulitekula nawa nomukai wae novana vae meumbo tyitwalako.

 Omunthu wokwapolwa mewaneno upondola okwenda komaliongiyo. Atee ine wahanda ovakulu vewaneno vapondola okumukwatesako nonondongwa Mbombimbiliya. Etyi vahanda okukwatesako omunthu oo opo akondoke vali kokufenda Siovaa. Omunthu vokwapolwa mewaneno ine ayeka-po okulinga ovipuka ovivi aendela monondongwa Mbombiliya, ukala vali Ombangi ya Siovaa.