Onombangi mba Siovaa mokonda vehole Huku novanthu, vapopia novanthu aveho etyi Ombimbiliya ipopia. Povanthu ovo, pati umwe na vana vapopia okuti ame hesukile neetyi mulongesa. (Mateusi 22:37-39) Mokonda tuhole Huku, otyo tyitutwala umwe kokutavela etyi Sesusi apopia okuti “tuvepe oumbangi waoya,” otyo okuti tuna okulongesa ovanthu vatyo aveho. (Ovilinga 10:42; 1 Swau 5:3) Opo tutyivile okulinga otyipuka otyo, pokupopia nomunthu evi viayemba k’Ombimbiliya, katupopi vala nae onthiki ike, mahi tumukondaukila umwe ngeetyi ankho tyilinga ovauli vokohale. (Selemiya 25:4) Mokonda onthwe tuhole ovanthu, otyo onthwe tupopila “oviwa ovipe Viouhamba” ovanthu vatyo aveho, na vana umwe vehesukile navio. Tulinga ngootyo mokonda tutyii okuti etyi tulongesa tyiyovola omwenyo wavo. — Mateusi 24:14.

 Pamwe momaumbo twatotolele, okukondoka-mo vali tupondola okuvasamo ovanthu vesuka nokulongeswa, mahi potete ankho vahahande. Tyienda ngootyo mokonda yovipuka evi vitatu:

•   Ovanthu vailauka.

•   Ovanthu ovakwavo vomeumbo vapondola okusuka nokulongeswa.

•   Ovipuka ovanthu vasoka vipilauluka. Ovipuka vimoneka mouye, neevi mwene omunthu akondya navio, vipondola okumusokesa umwe ‘okuti utei Huku,’ otyo atyimutwala umwe kokusuka nokulongeswa Ombimbiliya. (Mateusi 5:3) Novanthu vana vehetavela evi tulongesa vapondola umwe okupiluluka, avetavela, ngeetyi tyaendele nomutumwa Paulu. — 1 Timotiu 1:13.

 Mahi onthwe katukuluminya ovanthu vetavele etyi tulongesa. (1 Petulu 3:15) Tutyii umwe okuti munthu na munthu, oe mwene una okukoya ongeleya ahanda okukala. — Epalukununo 30:19, 20.