Ovohe ovanyingi Onombangi mba Siovaa velilongesa ononthele Otyipe mo JW opo vapameke ekolelo liovana vavo.

Omphange Fumiko Takehara, ina imwe ko Japão, ukahi nokulilongesa nomona wae Naoki, womanima 12 onthele Otyipe mo JW. Vaimpilimila omalutalatu ovakwatate nonomphange vekahi-mo aveemate motyimato. Fumiko wati: “Tyina tulikwambela tupopia omanyina avo momalikuambelo etu. Tyitupameka okunoñgonoka okuti Siovaa wavela ehambu ovanthu vae atee ankho vapakwa mokaleya. Tuete ovakwatate vetu vahambukwa. Ongeleka yavo yakwatesako omona wange okukala omukuatyili ku Siovaa tyina ekahi kosikola.”

Omukuatate Kilanko Zannou he yovana vevali ukala ko Costa de Marfim, wati: “Ononthiki ambuho ndyitala mo jw.org onthele Otyipe mo JW”. Omukwatate Kilanko apeho tyina valinga efendelo liombunga ukutikinya onthele ombo mefendelo liavo. Wati otyo tyikahi nokukwatesako ombunga yae, alo umwe Matias, omona wae womanima epandu vali, uhole okulilongesila unene kovakwatate vekahi nokukoleleya tyina vamoneswa ononkhumbi.

Matias ankho una ohonyi yokuivisa ku vana alongeswa navo. Kilanko wati: “Etyi tuamana okulinga efendelo lietu liombunga, Matias nehambu apopi okuti: ‘Pahe ndyitupu vali owoma wokupopila vana tulongeswa navo!’”

Omukwatate Holmes Simatupang, he umwe ko Indonesia, utangela ovana vae ononthele onombali mbulekesa ovana vamwe Onombangi mba Siovaa ko Indonesia watewa mosikola mokonda yokwanya okuhilivika epandela.

Omukwatate Simatupang wati: “Ovana vetu vevali vekahi nokulambela movitateka vielifwa novio kosikola yavo. Vekahi nokumoneswa ononkhumbi novalongesi vavo, na vana valongeswa navo, vevehongiliya okuhilivika epandela, nokulinga oviso ovikwavo viotyilongo, nokulipaka movilinga vionongeleya. Mokonda yotyo, pamwe ovana vetu vena owoma wokwenda kosikola.

Holmes tupu wati: “Etyi tuamana okulilongesa ononthele ombo onombali mefendelo lietu liombunga, pahe vetyivila okupopia tyihena owoma, omokonda yatyi vahapondola okuhilivika epandela. Pahe vetupu vali owoma wokuti hamwe mavatewa mosikola.”

Omphange Lady Nery Passos ukala mo Brasil, wati: “Etyi omona wetu, Pedro, ena vala omanima etano ine epandu, wakalele notyitateka tyokuhongiliyua okulipaka movipito viomanima kosikola.” Tyina omphange Passos ahanda okukwatesako omona wavo, usoka kovakwatate nonomphange ovanyingi vapopiwa mononthele Otyipe mo JW mbalingwa opo mbuvekwateseko tyina valambela movitateka. Wati: “Tulilongesa ononthele ombo mefendelo liombunga, opo mbukwatesako nawa omona wetu okutala etyi esukisa okulinga tyina ahindilwa okulinga ovipito viomanima kosikola.” Otyo tyakwatesako nawa Pedro okuyakulila etyi etavela.

Ononthele Otyipe mo JW mbutukwatesako okutala oñgeni Siovaa ekahi nokupameka nokutekula ovanthu vae ovakuatyili. Tuna onthumbi onene yokuti tyina tulambela movitateka matukala “tyeyula ononkhono mba Huku nehambu enene” opo tukoleleye. — Ovilinga 13:50-52.