Ombala yo Nombangi mba Jeova ouye auho ikahi nokulandulila popepi omukihi omupe coronavirus (ine COVID-19). Tutyii okuti Ombimbiliya yapopia-le okuti penyingilikilo liononthiki mbahulilila, mapakakala omukihi. (Luka 21:11) Tyina patumbuka ouvela umwe, otyiwa okuovola ononkhalelo mbokuyakulila onthue muene na vakuetu. — Provérbios 22:3.

Vamwe vapondola okulipula oñgeni ovakuatate vetu vekahi kovilongo kuna omukihi oo. Omukihi COVID-19 waeta ovitateka ovinene komawaneno Onombangi mba Siovaa nono Mbetele, ko Coreia do Sul, no ko Itália, no ko Japão, no kovilongo ovikuavo. Ono Mbetele mbumwe nkhele kambutambula vali ovaenda. Aloo umwe ovatumini availika omaliongiyo omanene, moluotyo ono filiyale movilongo ovio ambutokola okuhalingi vali ovionge. Tupu, konomphangu mbumwe omawaneno aapilulula onkhalelo yokuivisa no yomaliongiyo. Namphila ovakuatate vetu vekahi nokulambela movitateka ovio, vatualako okuliavela ondundo nokupameka ekolelo liavo. — Sunda 20, 21.

Ovakuatate vetu movilongo ovio, vavasa onondongwa mbuvekuatesako, mbuli pombuelo. Onondongwa ombo tupu mambukukuatesako, ove nombunga yove, inkha motyilongo ukala mutumbuka omukihi oo.

• Uhatumphuluke. Namphila otyiwa tulunguke komukihi nokuovola okuliyakulila, tyesukisa okupola pokati, katupondola okutumphuluka unene mokonda yowoma. — Provérbios 14:15; Isaías 30:15.

• Tavela Etyi Ovatumini Vapopia Netyi Vatuma. Pamwe ovatumini vapopia etyi tyina okulingwa, netyi tyihalingwa opo vayakulile ovanthu aveho. Otyiwa okunoñgonoka onondongwa ovatumini vaava, nokumbulandula. — Ova Loma 13:1.

• Kala Tyasukuka. Otyiwa okukoha pomavoko onoola ambuho nomeva nondyapau, nokuliseketa no alukole. Tupu otyiwa okusukukisa apeho pana ovanthu vayama unene, tyilinge monondyuo mbetu tyilinge Mondyuo Yomaliongiyo. Tupu onondotolo mbupopia okuti pokulikukunya hatyiwa okulikuatesa-po, mokonda tyipondola okuyandyanesa ouvela oo. Konthele yo coronavirus Eongano Liekongoko Mouye liavela ovanthu onondongwa ononkhuavo.

• Kala Nohole na Vakuenyi. Tutyii okuti tyesukisa unene okuenda komaliongiyo, no kovilinga viokuivisa, mahi inkha wavela, otyiwa ukale peumbo opo uhatambulise vakuenyi. Otyo tyilekesa okuti tyotyili tuhole vakuetu, tupu tyiyakulila ovakuatate vetu novanthu vehe Nombangi mba Siovaa. — Mateusi 22:39.

• Tavela Atyiho Ewaneno Liaonganeka. Povilongo patumbukwa omukihi umwe, Ombetele ipondola okutokola okuti nkhele kamakulingwa omaliongiyo, novionge, novilinga ovikuavo vieongano. Otyo tyalingwa kovilongo omukihi COVID-19 waeta ovitateka ovinene, ngo ko Coreia do Sul, no ko Itália, no ko Japão. Okutalela kovitateka vyo potyilongo notyilongo, ovakulu vewaneno vapondola okungalavala omaliongiyo opo ovaivisi vatalele momaumbo avo. Ovaivisi vapondola okuivisila konotelefone, nokutuma onomesasi, ine omikanda.

Pombuelo pena omikanda vina onondongwa mbutuyakulila komauvela.

• “Vença a guerra contra as doenças” mo Despertai! 6 yo 2016, pefo 4 aloo 6

• “Como ter uma saúde melhor” mo Despertai! ya Junho yo 2015, pefo 2 aloo 7

• “Você pode melhorar sua saúde: Ponto 4 — Proteja sua saúde” mo Despertai! ya Março yo 2011, pefo 7 March