Monthiki 8 ya Junho yo 2020, Ombonge Yepunda-umbo lyo Pskov maipopi onalupi omphela yomukuatate Gennady Shpakovskiy womanima 61 maipopi. Wahungwa okuti ukahi nokulinga ovipuka “vihalingwa” mokonda ankho ukahi nokulingila eliongiyo meumbo liae. Ombonge yapopia okuti omukuatate Shpakovskiy una okupakwa mokaleya akalamo omanima epandu-vali notyihupe.

Konthyimbi yo 2018, Ombonge Youtumini Wokuyunga Otyilongo itiwa (FSB mo Ingelesi) yapakele ovikamala meumbo liomukuatate Shpakovskiy nokutehelela atyiho ekahi nokulinga monohanyi epandu. Monthiki 3 ya Junho yo 2018, ko 12:45, ombonge FSB nomatolopa amaneka avateye epito liondyuo yomukuatate avanyingila, puetyi ankho ekahi nokulinga eliongiyo, avaovola atyiho tyikahi meumbo liae mo noola epandu.

Ovatumini vo FSB avapolo meumbo liae ono telefone nono tablet avatyindi ovakuatate avevetuala kombonge opo vakakoyeswe. Etyi vekahi nokupulwa, avahimbika okupenya ovakuatate avapopi okuti mavapolwa movilinga iya akuhonekwa omikanda vipopia okuti onomphuki. Omukuatate Shpakovskiy wakalele nokukoyeswa aloo kounthiki 22:00.

Monthiki 19 ya Março yo 2019, omukuatate Shpakovskiy wahungilwe okuti ukahi meongano limwe lilinga ovilinga “vihalingwa.” Konyima yonohanyi ononthano, ahungwa vali okuti ukahi “nokufeta onombongo keongano lilinga ovilinga vihalingwa” ahonekelwa omikanda vilekesa okuti omphuki.

Mokonda onthiki omphela yae maipopi ikahi nokuhikapo, tulikuambela iya tuna onthumbi yokuti Siovaa makuatesako omukuatate Shpakovskiy nombunga yae opo vatualeko nomutima wakola, nokunoñgonoka okuti Siovaa mayambe oukuatyili wavo. — 2 Crônicas 15:7.