GUMA MOOREEBA!
Abakristaayo n’Entaro—Baibuli Neegamba Ki?
Nk’oku emihondano omu Ukraine erikworeka, abeebembezi b’ediini Enkristaayo abaingi nibashagika orutaro orwo. Yetegyereze oku abeebembezi b’ediini barikushagika embaju zombi ezirikurwanagana:
“Nitusiima munonga kandi nituha ekitiinisa kingi abarwani baitu abarikurwanisa omuzigu w’eihanga ryabo Ukraine. . . Butoosha nitubashagika n’emitima yaitu, kandi nitubashabira.”—Metropolitan Epiphanius I omuri Kyiv, bikashohorezibwa omu rupapura rw’amakuru orwa Jerusalem Post, Okwakashatu 16, 2022.
“Omwebembezi w’ekanisa y’Abasodokusi omuri Russia akatebeekanisa okushaba aha Sande kushabira abaserukare ba Russia, kandi yaabashaba kurinda eihanga ryabo ‘nk’oku bashemereire kukora’ obwo Moscow erikugumizamu na kampeini yaayo omuri Ukraine.”—Orupapura rw’amakuru Reuters, Okwakana 3, 2022.
Abakristaayo shi bashemereire kwejumba omu rutaro? Baibuli neegamba ki?
Baibuli buzima neegamba ki?
Baibuli neeyoreka ngu abakuratsi ba Yesu abaabuzima tibarikwejumba omu ntaro.
“Garura rurara yaawe omu kyobati kyayo, ahakuba boona abatwara rurara, baryaitwa rurara.”—Matayo 26:52.
Omuntu orikushagika orutaro nari okurwana buzima naaba naayorobera ebigambo bya Yesu?
“Nimbaha ekiragiro kisya nti: Mukundane, nk’oku naabakunzire, naimwe mube nikwo mwakundana. Ku muriguma nimukundana, nibwo abantu boona baribamanya ku muri abeegi bangye.”—Yohaana 13:34, 35.
Mbwenu shi omuntu orikushagika entaro naaba naayoreka rukundo ei Yesu yaagizire ngu niyo eraataaniseho abeegi be nari abakuratsi be?
Kumanya ebirikukiraho, shoma ekicweka, “Obukristaayo Bwine Akakwate n’Entaro?”
Abakristaayo n’entaro hati
N’eky’oburyo shi Abakristaayo kwetantara okwejumba omu ntaro? Eego. Baibuli ekagamba kare aha bwire bwaitu, oburikwetwa ‘ebiro by’emperu’ ngu hakaba nihaija kubaho abantu abataragarukye ‘kwega eby’entaro obundi,’ kuhikaana n’enyegyesa za Yesu.—Isaaya 2:2, 4.
Kumanya bingi, shoma ebicweka by’Omunaara gw’Omurinzi ebikurataine ebiine omutwe “Ruhanga Aine Miteekateekyere ki aha Ntaro?”
Juba Yehova, a “Ruhanga ow’obusingye,” naaza kukoresa gavumenti ye ey’omu iguru kucungura abantu omu “kubonabonesibwa n’omu mwaga.”—Abafilipi 4:9; Zaaburi 72:14.
Kumanya oku araakikore, reeba vidiyo Obukama bwa Ruhanga Niki?
a Yehova n’eiziina rya Ruhanga—Zaaburi 83:18.
Noobaasa Kukunda n'Ebi
GUMA NOOREEBA!
Ediini n’Orutaro Omuri Ukraine—Baibuli Neegamba Ki?
Abeebembezi d’ediini ab’embaju zombi ezirikurwanagana nibakoresa obushoboorozi bwabo omu muringo ogurikutaana n’ebi Yesu yaayegyeise abakuratsi be kukora n’okutakora.
ENYEGYESA ZA BAIBULI ENKURU
Ahabw’enki Ruhanga Naareka Okubonabona Kukabaho?
Abantu baingi nibebuuza ahabw’enki ensi eijwiremu okubonabona n’obwangani. Baibuli neeha eby’okugarukamu ebirikuhuumuriza.
