Amahanga maingi omu nsi yoona gabaganisiibwemu eby’obutegyeki. Kurugiirira aha kucondooza kwa Pew Research Center 2022, “abantu bakuru ebicweka 65 ahari igana omu mahanga 19 agaacondooziibweho, nibagira ngu amahanga gaabo abantu abari omu bigombe by’obutegyeki ebitarikushushana nibaba baine obutaikirizana bw’amaani.”

 Ei orikutuura oyetegyereize ngu eby’obutegyeki nibyongyera kubaganisamu abantu? Ahabw’enki kiri kityo? Hariho ekirikubaasa kugonjoora enshonga egi? Yetegyereze eki Baibuli erikugamba.

 Baibuli ekagamba aha bwire obu oburikwetwa ‘ebiro by’emperu,’ ngu abantu bakaba nibaija kuba baine emiteekateekyere erikuremesa obumwe kubaho.

•   ‘Omu biro by’emperu, nihaija kubaho ebiro by’akabi kaingi, ahakuba abantu nibaija kuba abarikwekunda, abatarikwenda kugarukana n’abandi.’—2 Timoseo 3:1-3.

 N’obu abantu baingi baraabe nibateeraho munonga kutereeza gavumenti, kwonka nabwo tizirikukora gye. Abantu abaine emiteekateekyere erikutaana nikibagumira kukora hamwe kugonjoora oburemeezi, nangwa n’okubaasika tikirikubaasika. Ebirugiremu nibihamya eki Baibuli yaagambire ira.

•   “Omuntu naayekuriza ahari mugyenzi we kumukora kubi.”—Omubuurizi 8:9.

 Kwonka, Baibuli neegamba aha kiraagonjoore oburemeezi obu, niyo gavumenti erikutegyekwa omuntu orikwija kwihaho ebirikubonabonesa abantu.

 Baibuli neegamba aha mwebembezi oine okubaasa kw’omutaano, Yesu Kristo. Aine amaani, obushoboorozi, n’ekyetengo ky’okureetera abantu boona obumwe n’obusingye.

•   ‘Omu biro bye abahikiriire nibaija kugogyeera, bagire obusingye bwingi.’—Zaaburi 72:7.

•   ‘Amahanga goona nigaija kumuheereza.’—Zaaburi 72:11.

 Yesu n’omwebembezi ohikire ahakuba naafayo aha bantu, na munonga abarikutwarizibwa kubi, kandi naayenda kubahwera.

•   ‘Naija kujuna omukyene, ku araamutakire, n’omworo otaine kihwera. Naija kusaasira abooro n’abakyene, kandi amagara g’enshoberwa agajune. Naija kucungura amagara gaabo, agaihe omu kubonabonesibwa n’omu mwaga.’—Zaaburi 72:12-14.

 Yega ebirikukiraho aha Bukama bwa Ruhanga, gavumenti y’omu iguru ei Yesu arikutegyeka. Yetegyereze oku orikubaasa kugasirwa omu butegyeki bwayo n’oku orikubaasa kugishagika.

•   Reeba vidiyo, Obukama bwa Ruhanga Niki?

•   Reeba ekicweka, “Obukama bwa Ruhanga—Ni Gavumenti Etarimu Nguzi.”