Okwakataano 23, 2023, ow’eby’amagara omuri the United States akarabura abantu ngu emikura y’empurizana n’ey’akabi aha bato baingi.

•   “N’obu emikura y’empurizana eraabe neebaasa kuba ey’omugasho aha baana abamwe n’abakuru, hariho bingi ebirikworeka ngu neebaasa kushiisha obwongo bw’abaana n’emishogoyo, nangwa n’amagara gaabo okutwarira hamwe.”​—omu kihandiiko Social Media and Youth Mental Health: The U.S. Surgeon General’s Advisory, 2023.

 Okucondooza okurikworeka ahabw’enki twine kwerarikirira.

•   Emishogoyo kuruga aha myaka 12 kuhika ahari 15 “abarikumara eshaaha ezirengire 3 buri izooba aha mikura y’empurizana, orutezyo oru bariho orw’okutunga endwara z’emitwe otwariiremu okugira amaganya n’okwerarikirira, nirubazamu kabiri.”

•   Ab’emyaka 14, “ku baakoreise munonga emikura y’empurizana, bakaburwa oturo, baarahurwa aha mikura egyo, bakatamwa endeebeka yaabo, baayereeba nk’abataine mugasho, kandi baagira amaganya na munonga abaishiki kukira aboojo.”

 Abazaire nibabaasa kurinda bata abaana baabo akabi aka? Baibuli neeha obuhabuzi oburikukora.

 Taaha omu nshonga. Omuzaire, manya akabi akarikubaasa kurugamu, reero ocwemu yaaba omwana waawe araakorese emikura y’empurizana nari kutagikoresa.

•   Omusingye gwa Baibuli: “Manyiiza omwana omuhanda ogu ashemereire kutoora.”​—Enfumu 22:6.

•   Okwega ebirikukiraho, shoma ekicweka, “Should My Child Use Social Media?”

 Waikiriza omwana waawe kukoresa emikura y’empurizana, manya akabi akarikubaasa kurugamu, kandi guma nooshwijuma ebi arikukorera aha mikura. Ota?

 Rinda omwana waawe ebirikubaasa kuba eby’akabi. Tendeka omwana waawe kumanya eby’aha mukura eby’akabi n’oku arikubaasa kubyerinda.

•   Omusingye gwa Baibuli: ‘Obushambani, n’ekihagaro kyona, n’okwetenga kwona, bitarigambwaho omuriimwe. [N’obu byakuba] ebirikwitsa enshoni, n’eby’obushema, n’eby’okushetsya ebitahikire.’—Abaefeso 5:3, 4.

•   Okureeba eki orikubaasa kukora, shoma ekicweka, “Teaching Your Teenager Social Media Safety.”

 Taho obugarukiro. Nk’eky’okureeberaho, taho eby’okukuratira ebirikworeka obu aine kukoresa omukura gw’empurizana n’obwire obu aine kumaraho.

•   Omusingye gwa Baibuli: ‘Mwerinde, mumanye oku murikugyenda, mugyende nk’abanyabwengye, [mukorese gye obwire bwanyu].’—Abaefeso 5:15, 16.

•   Koresa vidiyo y’ebishushani bya katuuni Koresa gye Emikura kuhwera omwana waawe kwetegyereza ahabw’enki obugarukiro nibwetengyesa.