Oruteerane rwa 27 orw’Amahanga Ageeteeraine (COP27) orurikukwata aha mpinduka y’obwire, rukahendera aha Sande Okwaikumi-na-kumwe 20, 2022. N’obu baraabe baikirizaine kuha amahanga amooro sente z’okukora aha bihikiirizi ebirikureetwaho embeera mbi z’obwire, baingi bakeetegyereza ngu tibarikubaasa kugonjoora obukomooko bw’oburemeezi.

•   António Guterres, omuhandiiki omukuru ow’Ekibiina ky’Amahanga Ageeteeraine, Okwaikumi-na-kumwe 19, 2022, akagira ati: “Ninsiima ekiteekateeko ky’okutaho esente z’okuhwera amahanga agakozirwe kubi empinduka y’obwire. Kwonka eki tikirikumara . . . Ensi yaitu ekiri omu kabi k’amaani.”

•   “Ensi eri aha rutezyo rw’okuhikwaho empinduka y’obwire ey’akabi.”—Ebi bikagambwa Mary Robinson, owaabaireho omwebembezi wa Ireland n’Ekibiina ky’Amahanga Ageeteeraine eky’obugabe bw’abantu, Okwaikumi-na-kumwe 20, 2022.

 Eminyeeto nibo barikukirayo kwerarikirira aha bikwatiraine na nyentsya y’ensi yaitu. Kwonka shi amahanga nigabaasa kukwatanisa hamwe kuhikiiriza okuraganisa kwago okw’okutereeza empinduka y’obwire? Baibuli neegamba ki?

 Baibuli neeyoreka ngu n’obu abantu abarikufayo baakuteeraho munonga, tihaine kihango eki barikubaasa kukora kugonjoora embeera mbi y’obwire. Yetegyereze enshonga ibiri ahabw’enki:

•   “Ekikiikami tikirikubaasa kugororwa.”—Omubuurizi 1:15.

   Amakuru: Gavumenti ziine obugarukiro, ahakuba abantu tibarahangirwe kwetegyeka. (Yeremia 10:23) Nangwa n’obu amahanga gaakukwatanisa hamwe, tigarikubaasa kugonjoora oburemeezi bw’ensi egi, n’obu gaakuteeraho munonga gata.

•   ‘Ahakuba abantu nibaija kuba abarikwekunda, abakunzi b’empiiha, abatarikwenda kugarukana n’abandi.’—2 Timoseo 3:2, 3.

   Amakuru: Baibuli ekagamba kare ngu abantu baingi omu bwire obu bakaba nibaija kuba abarikweyendeza, kandi abatarikwenda kukorera hamwe kukora ebirungi ebirikugasira buri omwe.

 Kwonka, nyentsya y’ensi yaitu terikwegamira aha kuraganisa kwa gavumenti z’abantu. Ruhanga yaaherize kutaho Yesu Kristo, Omutegyeki orikwebaasa. Baibuli neemugambaho eti:

•   ‘Obutegyeki nibwija kuba aha mabega ge, n’eiziina rye naija kwetwa Omuhanuuzi Orikutangaaza, Ruhanga ow’Obushoboorozi, Tataitwe Otahwaho, Mukama w’Obusingye.’—Isaaya 9:6.

 Yesu n’Omugabe w’Obukama bwa Ruhanga, nari gavumenti ey’omu iguru. (Matayo 6:10) Aine amaani, obwengye, n’ekyetengo ky’okureeberera ensi yaitu, n’abarikugituuramu. (Zaaburi 72:12, 16) Yesu yaaba naayebembera gavumenti egi ey’omu iguru, naija kwihaho ‘abarikucwekyereza ensi,’ kandi agarure n’ensi yoona omu buteeka bwayo.—Okushuuruurwa 11:18; Isaaya 35:1, 7.

 Okwega ebirikukiraho oku oburemeezi bw’empinduka y’obwire buraagonjoorwe, shoma ekicweka “Empinduka y’Obwire na Nyentsya Yaitu—Eki Baibuli Erikugamba.”