GUMA NOOREEBA!
Orutaro rwa Ukraine Rwongyeire aha Ibura ry’Eby’okurya omu Nsi Yoona
Okwakataano 19, 2022, abeebembezi b’amaani abarengire 75 bakagambira Akakiiko k’Amahanga Ageeteeraine ngu “eibura ry’eby’okurya eryareetsirweho ekigwererezi kya COVID-19 n’empinduka y’obwire, ryeyongyeire omu nsi yoona ahabw’orutaro omuri Ukraine.” Bwanyima y’ekyo, Ow’eby’obushuubuzi akagira ngu “abantu nyamwingi nibaza kwongyera kuburwa eby’okurya ahabw’orutaro oru.” Baibuli ekagamba kare ngu hakaba nihaija kubaho eibura ry’eby’okurya omu bwire obu, kwonka neetuha n’obuhwezi bw’okwemera oburemeezi obu.
Baibuli ekagamba kare aha ibura ry’eby’okurya
Yesu akagira ati: ‘Eihanga niriija kuteera erindi ihanga, n’obugabe buteere obundi bugabe, [kandi] nihaija kubaho enjara.’—Matayo 24:7.
Ekitabo ky’Okushuuruurwa nikigamba aha bavugi bana b’embaraasi ab’akamanyiso. Omwe aha bavugi b’embaraasi aba naajwekyera entaro. Ondiijo orikumukurata naajwekyera enjara, obwire obu eby’okurya byakubaire biri eby’okwerembaremba, kandi birikuguzibwa aha beeyi y’ahaiguru. “Naareeba embaraasi erikwiragura, kandi owaabaire agishutamiho akaba aine eminzaani omu ngaro ze. Naahurira nk’eiraka . . . nirigira riti: Endengo y’engano noija kuzigura omushaara gw’eizooba ryona! N’endengo ishatu za sayiri nazo ozigure omushaara gw’eizooba.”—Okushuuruurwa 6:5, 6, Baibuli eya Contemporary English.
Obunabi obu oburikukwata aha ibura ry’eby’okurya buriyo nibuhikiirira omu bwire obu Baibuli erikweta ‘ebiro by’emperu.’ (2 Timoseo 3:1) Kubaasa kwega ebirikukwata aha ‘biro by’emperu’ n’abavugi bana b’embaraasi abarikugambwaho omu Okushuuruurwa, reeba vidiyo Ensi Ekahinduka Kuruga 1914 kandi oshome n’ekicweka “Abavugi Bana n’Embaraasi Nibo Baahi?”
Oku Baibuli erikubaasa kuhwera
Baibuli erimu obuhabuzi oburikukora oburikubaasa kutuhwera kwemera embeera zigumire, otwariiremu okutemba kw’emihendo y’eby’okurya n’eibura ry’eby’okurya. Reeba eby’okureeberaho ebimwe omu kicweka “Oku Orikubaasa Kubaisibwaho Bikye.”
Kandi Baibuli neeha amatsiko ngu ebintu nibiija kutereera. Neeraganisa obwire obu harikwija kubaho “omweru mwingi omu nsi,” kandi buri omwe aine eby’okurya birikumara. (Zaaburi 72:16) Kubaasa kwega ebirikukwata aha matsiko ga Baibuli aga nyentsya n’enshonga ahabw’enki orikubaasa kwesiga eki Baibuli erikugamba, shoma ekicweka “Amatsiko Agaabuzima Aga Nyentsya Nungi.”
Noobaasa Kukunda n'Ebi
Russia Okutaahirira Ukraine—Nikihikiiriza Obunabi bwa Baibuli?
Ku kiraabe nikwo kiri, Baibuli neeshoboorora oku orutaro oru ruraahendere?
EBIBUUZO EBI BAIBULI ERIKUGARUKAMU
Akamanyiso ‘k’Ebiro by’Emperu’ Nari ‘Obwire bw’Emperu’ ni Kaahi?
Baibuli ekagamba kare aha bintu bingi byona hamwe ebyakworekire ngu turi omu biro by’emperu.
ENYEGYESA ZA BAIBULI ENKURU
Ahabw’enki Ruhanga Naareka Okubonabona Kukabaho?
Abantu baingi nibebuuza ahabw’enki ensi eijwiremu okubonabona n’obwangani. Baibuli neeha eby’okugarukamu ebirikuhuumuriza.
ENYEGYESA ZA BAIBULI
Gyezaho Omushomo Gwaitu gwa Baibuli
Yejumbe omu mushomo gw’okuhikaanisa ebiteekateeko ahari Baibuli oine orikukuhwera.
