Nikitebeerezibwa ngu abantu obuhumbi butaano nibo baraareebe empaka z’ekikopo ky’ensi yoona ezaatandikire Okwaikumi-na-kumwe 20, kandi ezirikuza kuhendera Okwaikumi-n’abari 18, 2022. Baingi nibateekateeka ngu emizaano nk’egi neekora ekirikukira aha kuhwera abaroreezi kuba hamwe kyonka.

•   “Emizaano eine amaani g’okuhindura ensi. Eine amaani g’okuteera omuhimbo. Eine amaani g’okugaita abantu kukira ekindi kyona.”—Bikagambwa Nelson Mandela, owaabaireho purezidenti wa South Africa

•   “Omupiira . . .  nigugaita omu matsiko, nigugaita omu kushemererwa, nigugaita omu kugira ekihika, nigugaita omu kukundana, niguhwera n’abantu kukunda ebirikushushana.”—Bikagambwa Gianni Infantino purezidenti wa FIFA. a

 Ekikopo ky’ensi yoona shi nari ogundi muzaano nigubaasa kuhikiiriza ebigyendererwa by’amaani ebi? Hariho amatsiko goona shi ngu emizaano neebaasa kureeta obusingye n’obumwe?

 Ekikopo ky’omupiira eky’ensi yoona eky’omwaka ogu kireeteire abantu kuteekateeka ekirikukira aha muzaano gw’omupiira. Kireeteire abantu kuhaajaana aha ntuura y’abantu n’eby’obutegyeki, otwariiremu n’obugabe bw’abantu, okushoroora, n’okutaingana omu by’entaatsya.

 N’obu kiraabe kiri kityo, baingi nibareeba emizaano, nk’ekikopo ky’ensi yoona, nk’ekintu eky’okweshemeza. Kwonka, emizaano egi terikubaasa kureeta obumwe bw’obutwire, n’obu abantu baraabe nikyo barikwenda. Kureka, neekira kworeka emiteekateekyere y’okwebaganisamu ei Baibuli yaagizire ngu ni kamwe aha bumanyiso ‘bw’ebiro by’emperu.’—2 Timoseo 3:1-5

 Baibuli erimu amatsiko agaabuzima ag’okwija kugira obumwe omu nsi yoona. Neeraganisa ngu abantu boona omu nsi nibaija kugira obumwe baaba nibategyekwa gavumenti erikwetwa “Obukama bwa Ruhanga.”—Luka 4:43; Matayo 6:10.

 Omugabe w’Obukama obwo, Yesu Kristo, naija kuhamya ngu haabaho obusingye omu nsi yoona. Baibuli neegira eti:

•   ‘Abahikiriire nibaija kugogyeera, bagire obusingye bwingi.’—Zaaburi 72:7.

•   ‘Naija kujuna omukyene, orikumutakira. Naija kumwiha omu kubonabonesibwa n’omu mwaga.’—Zaaburi 72:12, 14

 Nangwa na hati, enyegyesa za Yesu zaaherize kugaita obukaikuru bw’abantu omu mahanga 239. Beegire kweihamu rwango. Kumanya ebirikukiraho, shoma ebicweka ebikurataine ebiine omutwe “Okuzibira Rwango Kugumizamu.”