Abantu omu nsi yoona bariyo nibagumisiriza omushana oguhenzire ebyafaayo n’ezindi mbeera mbi z’obwire ezirengyesereize. Yetegyereze ripoota ezi:

•   “Omu nsi yoona Okwamukaaga nikwo kukizireyo kwotsya munonga omu myaka 174 kuruga obu abantu batandika kupima obutagatsi.”—Ekitongore ky’Eby’obushuubuzi Ekirikureeberera Enyanja n’Eby’omu Mwanya Ekya U.S. Okwamushanju 13, 2023.

•   “Amahanga nka Italy, Spain, France, Germany na Poland goona garimu omushana ogurikwotsya ekirenga, kandi obutagatsi nibuteeberezibwa kutemba kuhika ahari diguri 48°C, aha kirwa kya Sicily na Sardinia. Ogu nigubaasa kuba nigwo mushana ogurikwotsya munonga ogurabaireho omuri Europe.”—Ekitongore ky’Eby’omu Mwanya Ekya Europe, Okwamushanju 13, 2023.

•   “Ensi ku erikwongyera kwotsya munonga, nikimanyisa ngu nihaija kubaho enjura nyingi, erikugwa emirundi mingi, eri mbi munonga, ekiraarugyemu emyegyemure y’akabi munonga.”—Stefan Uhlenbrook, orikukurira eby’amaizi n’embeera y’obwire omu Kitongore ky’Embeera y’Obwire omu Nsi Yoona, Okwamushanju 17, 2023.

 Okukanya kw’amakuru agarikukwata aha mbeera mbi y’obwire nikukwerarikiriza? Yetegyereze eki Baibuli erikugamba aha nshonga nkuru egi.

 Eego. Omushana ogurikwotsya ekirenga n’embeera mbi z’obwire ezindi, nibihikaana n’ebi Baibuli yaagambire ngu bikaba nibiija kubaho hati. Nk’eky’okureeberaho, Yesu akagira ngu tukaba nitwija kureeba “ebirikutiinisa,” nari “ebitarikwetegyerezibwa n’ebirikuteera obwoba.” (Luka 21:11; Envunuura ya Good News) Okutemba kw’obutagatsi kureeteire baingi kutiina ngu abantu nibaija kucwekyereza ensi.

 Ngaaha. Ruhanga akahanga ensi kuba eka yaitu ey’obutwire, tarikwija kwikiriza abantu kugicwekyereza. (Zaaburi 115:16; Omubuurizi 1:4) Nangwa, araganiise ‘kucwekyereza abarikucwekyereza ensi’—Okushuuruurwa 11:18.

 Baibuli neeyoreka ngu Ruhanga naabaasa kurinda ensi ebihikiirizi, kandi buzima naija kugirinda.

•   ‘[Ruhanga] naacureeza eihunga, ebingonzi byayo bituuza.’ (Zaaburi 107:29) Ruhanga aine amaani g’okutegyeka eby’obuhangwa. Aine okubaasa kw’okutereeza oburemeezi bw’ensi egi oburikureetaho embeera mbi y’obwire.

•   Naija kureeberera ensi, agihindure erikweza munonga, kandi erimu buri kimwe. (Zaaburi 65:9) Ahabw’emigisha ya Ruhanga, ensi neija kuba paradiso.

 Okwega ebirikukiraho aha kiraganiso kya Baibuli eky’okugarura ensi busya, reeba ekicweka, “N’oha Oraacungure Ensi?”