Baibuli Neegamba ki aha Ibura ry’Eby’okurya Eririho Hati?

TANDIKA

“Enjara kuhweraho kimwe.” Ebigambo ebi nibyoreka ekigyendererwa ky’abeebembezi b’amahanga eky’okumariraho kimwe oburemeezi bw’amaani oburikuteganisa abantu, reero buri omwe omu nsi akatunga eby’okurya. a Kwonka shi haine obu ensi erikwija kuba etarimu njara na kakye? Baibuli neegamba ki?

Baibuli ekagamba kare aha ibura ry’eby’okurya eririho hati

Baibuli ekagamba kare ngu hakaba nihaija kubaho eibura ry’eby’okurya omu bunaku obu, oburikwetwa ‘ebiro by’emperu.’ (2 Timoseo 3:1) Ruhanga tiwe arikujunaanwa ahabw’eibura ry’eby’okurya, kwonka akaturabura ngu eki kikaba nikiija kubaho. (Yakobo 1:13) Yetegyereze obunabi bwa Baibuli bubiri.

‘Nihaija kubaho enjara omu myanya mingi.’ (Matayo 24:7) Obunabi obu bukagamba kare ngu enjara ekaba neija kujanjaara omu myanya mingi. Kandi, ripoota eherize kushohozibwa abarikukuratiriza embariirira y’eby’okurya, neegira eti: “Ensi eriyo neegaruka enyima omu kuteeraho kwayo kuhezaho enjara, eby’okurya bibi, n’okukuuhura.” b Obukaikuru bw’abantu omu mahanga maingi, tibarikubaasa kutunga eby’okurya ebi barikwenda. Eky’obusaasi, baingi aharibo nibafa.

‘Nkareeba embaraasi erikwiragura, kandi owaabaire agishutamiho akaba aine eminzaani omu ngaro ze.’ (Okushuuruurwa 6:5) Omu bunabi obu, embaraasi y’akamanyiso neejwekyera enjara omu biro by’emperu. c Minzaani eziri omu ngaro z’omuvugi w’embaraasi n’ez’okupima eby’okurya by’okubaganisiza abantu. Omuvugi arikuvuga, eiraka niriranga ngu ebeeyi y’eby’okurya neija kutemba, kandi nirirabura n’abantu kubikwata gye. (Okushuuruurwa 6:6) Eki nikyoreka gye eibura ry’eby’okurya eririho hati, obu abantu nyamwingi batarikubaasa kutunga eby’okurya birungi, nari nibaremwa ahabw’emihendo yaabyo.

Oku eibura ry’eby’okurya rihweho

Abahangu nibagira ngu ensi yaitu neeyeza eby’okurya birikumara kuriisa buri omwe ogirimu. Mbwenu shi, ni buremeezi oburikureetaho eibura ry’eby’okurya? Kandi Baibuli neegira ngu Omuhangi waitu, Yehova, d naija kukora ki kugonjoora oburemeezi obu?

Oburemeezi: Gavumenti z’abantu tizirikubaasa kuhezaho obworo n’entaatsya etarikwingana erikureetera abantu kwitwa enjara.

Okugonjoora Oburemeezi: Omu mwanya gwa gavumenti z’abantu abatahikiriire, nihaija kuzamu gavumenti ehikiriire, nibwo Obukama bwa Ruhanga. (Danieli 2:44; Matayo 6:10) Ebiro ebi, abantu baingi abooro nibagumirwa kutunga eby’okurya, kwonka Obukama bwa Ruhanga bwaba nibutegyeka, eki nikiija kuhinduka. Baibuli neegamba ahari Yesu Kristo, Omugabe w’Obukama bwa Ruhanga, eti: ‘Naija kujuna omukyene, ku araamutakire, n’omworo otaine kihwera. Nihaija kubaho omweru mwingi omu nsi, n’omu misiri omu bibungo.’—Zaaburi 72:12, 16.

Oburemeezi: Entaro nizireetaho okucwekyerera n’entaatsya mbi, ebirikuteganisa abantu omu kutunga eby’okurya.

Okugonjoora Oburemeezi: ‘[Yehova] naamaraho [entaro] okuhika aha muheru gw’ensi, ahenda amata, amacumu agatemamu kabiri, n’ebigaari abyotsya n’omuriro.’ (Zaaburi 46:9) Ruhanga naija kucwekyereza eby’okurwanisa by’entaro n’abarikureetaho entaro ezo. N’ekiraarugyemu, buri omwe naija kuba naayoroberwa kutunga eby’okurya birungi. Baibuli neeraganisa eti: ‘Abahikiriire naija kugogyeera, bagire obusingye bwingi.’—Zaaburi 72:7.

Oburemeezi: Embeera mbi y’obwire n’ebihikiirizi nibishiisha ebihingwa, kandi nibyita n’amatungo.

Okugonjoora Oburemeezi: Ruhanga naija kutegyeka maani g’obuhangwa, ateho embeera ezirikubaasisa eby’okurya kwera gye. Baibuli neegira eti: ‘[Yehova] naacureea eihunga, ebingonzi bituuza. Kandi naahindura eihamba ebiyanja by’amaizi, n’eitaka eryomire arifumuramu enshuro. Omwo nimwo arikutuuza abaine enjara. Babibe embibo omu misiri babyare emizaabibu, beetungire emyaka eyezire munonga.’—Zaaburi 107:29, 35-37.

Oburemeezi: Abanyamururu n’abashomankuzi nibashohoza eby’okurya bibi, nari nibaremesa eby’okurya kuhika abashemereire kubitunga.

Okugonjoora Oburemeezi: Obukama bwa Ruhanga nibwija kwihaho abantu boona abatari b’amazima kandi abashomankuzi. (Zaaburi 37:10, 11; Isaaya 61:8) Baibuli neegamba ahari Yehova Ruhanga nk’ogwo ‘orikucwera abarikubonabonesibwa emanja [z’oburingaaniza], orikuha abaine enjara eby’okurya.’—Zaaburi 146:7.

Oburemeezi: Kimwe kya kashatu eky’eby’okurya nibisiisikara nari nibibura buri mwaka.

Okugonjoora Oburemeezi: Obukama bwa Ruhanga ku buraabe nibutegyeka, eby’okurya nibiija kukwatwa gye. Obu Yesu yaabaire ari omu nsi, akaba naayegyendesereza kutashiisha eby’okurya. Nk’eky’okureeberaho, eizooba rimwe omu muringo gw’eky’okutangaaza akariisa abantu abarikurenga 5,000. Bwanyima akagambira abeegi be ati: “Mutorotoore oburagarika obwatsigaraho, hatagira [akaashiishwa].”—Yohaana 6:5-13.

Ahabw’okugira ngu Obukama bwa Ruhanga nibwija kwihaho byona ebirikureeta enjara, abantu boona nibaija kutunga eby’okurya birikumara, kandi eby’ekiriisa. (Isaaya 25:6) Kubaasa kumanya obu Obukama bwa Ruhanga buraahikiirize eki, reeba ekicweka, “Obukama bwa Ruhanga Nibwija Kutegyeka Ensi Ryari?”

a Engyenderwaho eya 2030 ey’Entunguuka Erikubaasika, eyaatandikirweho Amahanga Ageeteeraine omu 2015.

b Ripoota y’amakwatane eyakozirwe Ekitongore ky’Eby’okurya n’Eby’obuhingi eky’Amahanga Ageeteeraine, Ekibiina ky’Esente z’Okutunguura Eby’obuhingi omu Nsi Yoona, Ekibiina ky’Esente z’Abaana b’Amahanga Ageeteeraine, Ekibiina ky’Eby’okurya eky’Ensi Yoona, n’Ekitongore ky’Eby’amagara omu Nsi Yoona.

c Okwega ebirikukiraho ebirikukwata aha bavugi bana b’embaraasi abarikugambwaho omu kitabo ky’Okushuuruurwa, reeba ekicweka, “The Four Horsemen—Who Are They?”

d Yehova n’eiziina rya Ruhanga. (Zaaburi 83:18) Reeba ekicweka, “Yehova n’Oha?”