Ekigombe ky’Amahanga Ageeteeraine kigizire ngu:

•   Kuruga Okwaikumi 7 kuhika Okwaikumi 23, 2023, orutaro rwa Gaza na Israeli rwitsire abantu 6,400 kandi 15,200 baahutaazibwa, kandi abarikukira obwingi n’aba butoosha abatari b’amahe. Kandi, enkumi n’enkumi z’abantu abandi bahungire.

•   Kuza kuhika Okwamwenda 24, 2023, orutaro rwa Russia na Ukraine rubaire rwaherize kufeeramu abantu abatari b’amahe 9,701, kandi 17,748 bahutaaziibwe omuri Ukraine.

 Abantu abarikubonabona ahabw’entaro Baibuli neebaha matsiko ki?

 Baibuli neegira ngu Ruhanga naija ‘kumaraho entaro omu nsi yoona.’ (Zaaburi 46:9) Omu mwanya gwa gavumenti z’abantu, naija kutamu gavumenti ye ey’omu iguru, nari obukama. (Danieli 2:44) Obukama bwa Ruhanga nibwija kuruhuura abantu.

 Yetegyereze eki Yesu Kristo Omugabe w’Obukama bwa Ruhanga araakore:

•   ‘Naija kujuna omukyene, ku araamutakire, n’omworo otaine kihwera. Naija kusaasira abooro n’abakyene, kandi amagara g’enshoberwa agajune. Naija kucungura amagara gaabo, agaihe omu kubonabonesibwa n’omu mwaga.’—Zaaburi 72:12-14.

 Ruhanga arikukoresa Obukama bwe, naija kumariraho kimwe obusaasi n’okubonabona ebirikureetwaho entaro n’obushaarizi.

•   ‘Naija kuragaza amarira goona aha maisho gaabo, tiharikwija kubaho kufa bundi, n’obu kwakuba okucura, nari okurira, nari obusaasi, ahakuba ebya ira nibiija kuba bihwaireho.’—Okushuuruurwa 21:4.

 Juba Obukama bwa Ruhanga nibwija kutaaha omu nshonga z’ensi kuzitereeza. Baibuli ekooreka kare ngu hakaba nihaija kubaho entaro n’amakuru agarikukwata aha ntaro, ebi turikureeba nibibaho hati. (Matayo 24:6) Ebi n’ebindi ebirikubaho nibyoreka ngu turi omu ‘biro by’emperu,’ eby’obutegyeki bw’abantu.—2 Timoseo 3:1.