Okwamushanju 2022, habairemu ebikorwa by’ekyekango eby’obushaarizi bw’embundu omu nsi yoona:

•   “Okwitwa kw’ow’eby’obutegyeki orikumanywa munonga omuri Japan [owaabaireho enganzi y’eihanga Shinzo Abe] kuteganiise munonga eihanga ryona, kandi kwareeta ekyekango omu nsi yoona, n’obu Japan eraabe etarimu bushaarizi bwingi, kandi baine ebiragiro bigumire eby’okukoresa embundu.”—Okwamushanju 10, 2022, orupapura rw’amakuru The Japan Times.

•   “Denmark etungire ekyekango obu omunyambundu aitsire abantu bashatu omu duuka emwe omuri Copenhagen.”—Okwamushanju 4, 2022, orupapura rw’amakuru Reuters.

•   “Omuri South Africa, omunyambundu ataire amasasi abantu 15 baafa omu baara emwe omuri Soweto.”—Okwamushanju 10, 2022, orupapura rw’amakuru The Guardian.

•   “Omu U.S. abantu 220 baitsirwe omu bushaarizi bw’embundu omu wiikenda ey’Okwamushanju 4.”—Okwamushanju 5, 2022, amakuru aha CBS tiivi.

 Hariho amatsiko goona ngu obushaarizi nk’obu nibwija kuhwaho? Baibuli neegamba ki?

 Baibuli neegira ngu omu ‘biro by’emperu,’ abantu bakaba nibaija kutwaza omu muringo gw’obushaarizi, ogw’obuhaze, kandi ogw’obwinazi. (2 Timoseo 3:1, 3) Ebikorwa by’obushaarizi ebi nibireetera abantu kutuura omu mbeera y’okutiina. (Luka 21:11) Kwonka, Baibuli neeraganisa obwire obu obushaarizi buraahweho, kandi abantu ‘bakatuura omu nsi baine obusingye, bakaguma omu maju gaabo agahamire n’omu myanya y’okuhuumuriramu etuurize.’ (Isaaya 32:18) Obushaarizi nibwija kuhwaho buta?

 Ruhanga naija kwihaho ababi, kandi acwekyereze eby’okurwanisa.

•   “Ababi nibaija kumarwaho omu nsi.”—Enfumu 2:22.

•   ‘[Ruhanga naamaraho entaro] okuhika aha muheru gw’ensi, ahenda amata, amacumu agatemamu kabiri, n’ebigaari abyotsya n’omuriro.’—Zaaburi 46:9.

 Ruhanga naija kwihaho obukomooko bw’obushaarizi arikwegyesa abantu kutuura omu busingye.

•   ‘Ebyo byona tibirikwija kukora kubi, n’obu kwakuba okwita aha rushozi rwangye rwona orurikwera, ahabw’okuba okumanya [Yehova] nikwija kubuga ensi yoona, nk’oku amaizi garikubuga hoona omu nyanja.’—Isaaya 11:9.

•   Nangwa na hati, Ruhanga naayegyesa abantu omu nsi yoona kutaba enshaarizi n’okutakoresa eby’okurwanisa, kureka ‘zaarurara zaabo nibaija kuziheeshamu amafuka, n’amacumu gaabo bagaheeshemu empabyo.’—Miika 4:3.

 Kubaasa kwega ebirikukiraho aha ki Baibuli erikuraganisa aha nsi etarimu kutiina, shoma ekicweka, “Nikibaasika Okugira Obugabe bw’Okutatiina?”

 Kubaasa kwega ebirikukwata aha kumariraho kimwe obushaarizi, shoma ekicweka, “Ensi Neija Kurugaho Neebamu Obusingye!”