Ensi etungire ekyekango ahabw’obushaarizi bwingi oburikubaho omu by’obutegyeki.

•    Omu bwire bw’oburuuru omuri Mexico 2023-2024, abaabaire beetsimbireho 39 bakaitwa haabaho n’obundi bushaarizi bwingi omu by’obutegyeki.

•    Omu myaka egi omuri Europe habairemu ebikorwa bingi by’obushaarizi omu by’obutegyeki, otwariiremu okugyezaho kwita enganzi y’eihanga rya Slovakia omu Kwakataano 15, 2024.

•    United States etungire ekyekango Okwamwenda 15, 2024, obu bateireho omurundi gwa kabiri kwita Donald Trump owaabaireho omwebembezi w’eihanga eryo.

 Ahabw’enki hariho obushaarizi bwingi omu by’obutegyeki? Nibwija kuhitsya obwire nibuhwaho? Baibuli neegamba ki?

 Baibuli ekagira ngu omu bwire bwaitu, oburikwetwa ‘ebiro by’emperu,’ abantu baingi bakaba nibaija kugira emitwarize erikurugamu obushaarizi n’obutaikirizana.

•    ‘Omu biro by’emperu, nihaija kubaho ebiro by’akabi kaingi. Ahakuba abantu nibaija kuba entasiima, abagomi, abatarikwenda kugarukana n’abandi, enshaarizi, abarikureebyana, engangaazi, abarikwekuza.’—2 Timoseo 3:1-4.

 Kandi Baibuli ekagira ngu omu bwire bw’emperu hakaba nihaija kubaho okujagarara, okurikutwariramu okweshariinga n’obutabanguko omu by’obutegyeki. (Luka 21:9) Kwonka, obushaarizi omu by’obutegyeki tiburikwija kugumaho ebiro byona.

 Baibuli neegira ngu omu mwanya gwa gavumenti z’abantu, Ruhanga naija kutamu gavumenti ye ey’omu iguru.

•    ‘Ruhanga w’omu iguru naija kutaho obundi bugabe, nibwija kwatagura obugabe bwona [obundi bubumareho, kandi bwo nibwija kugumaho ebiro byona].’—Danieli 2:44.

 Obukama bwa Ruhanga buzima nibwija kugaita abantu, kandi bureeteho n’obusingye omu nsi yoona.

•    Omutegyeki w’Obukama bwa Ruhanga Yesu Kristo, naayetwa “Mukama w’Obusingye,” kandi naija kuhamya ngu ‘obusingye tibwagira bugarukiro.’—Isaaya 9:6, 7.

•    Nangwa na hati, abarikutegyekwa Obukama bwa Ruhanga nibeega oku baine kutuura omu busingye. N’ahabw’ekyo Baibuli neegira eti: ‘Zaarurara zaabo nibaija kuziheeshamu amafuka, n’amacumu gaabo bagaheeshemu empabyo, eihanga tiririkwija kubangira rindi rurara, kandi tibarikwija kugaruka kwega [eby’entaro].’—Isaaya 2:3, 4.

 Okwega ebirikukiraho, shoma ekicweka “Obukama bwa Ruhanga Nibwija Kukorera ki Abantu?” oreebe na vidiyo Obukama bwa Ruhanga Niki?