Omu nsi yoona, abantu baingi nibeeyongyera kwikiriza emiteekateekyere y’okukoresa ebimera byonka.

•   “Abaine emiteekateekyere egi nibateeraho nk’oku kirikubaasika kwetantara kukora kubi enyamaishwa batarikuzikoresa nk’eby’okurya, kwihamu eby’okujwara, nari ogundi mugasho gwona.”—The Vegan Society.

 Abamwe baine emiteekateekyere egi ahabw’okwenda kurinda obuhangwa, kugira amagara marungi, nari ahabw’enshonga z’ediini, oyihireho okufayo aha nyamaishwa kyonka.

•   “Okukoresa ebimera byonka nikutaana aha kwetantara eby’okurya ebimwe, ahakuba abantu nibakureeba nk’enyikiriza, entwaza, nari nk’ekigyendererwa kya buri omwe kuhindura ensi ekaba nungi.”—Britannica Academic.

 Okukoresa ebimera byonka nigwo muringo gw’okureetaho nyentsya nungi y’ensi? Baibuli neegamba ki?

 Baibuli neeyoreka ngu Omuhangi waitu, Yehova Ruhanga, a naatwara abantu nk’abarikukira enyamaishwa, kandi akaha abantu obushoboorozi bw’okuzitegyeka. (Okutandika 1:27, 28) Bwanyima, Ruhanga akaikiriza abantu kukoresa enyamaishwa nk’eby’okurya. (Okutandika 9:3) Kwonka, tarikushwekyerera omuze gw’okutwariza kubi enyamaishwa.—Enfumu 12:10.

 Kurugiirira ahari Baibuli, okurya enyama n’eky’omuntu kwecweramu. b Eki turikucwamu aha nshonga egi tikyo kirikutuhindura barungi omu maisho ga Ruhanga. (1 Abakorinso 8:8) Tihaine oshemereire kucwera mugyenzi we orubanja aha bikwatiraine n’eki arikucwamu kurya.—Abarooma 14:3.

 Baibuli neeyoreka ngu oku turikucwamu kutwaza tikwo kuraagonjoore oburemeezi bw’ensi. Oburemeezi obwingi nibureetwaho eby’obutegyeki, entuura y’abantu, n’eby’entaatsya by’ensi egi, ebirengire okubaasa kw’abantu. Baibuli neegira eti:

•   “Ekikiikami tikirikubaasa kugororwa.”—Omubuurizi 1:15.

 Omuhangi waitu niwe araagonjoore oburemeezi bwaitu. Omu muringo gw’akamanyiso, Baibuli neeshoboorora eki araakore.

•   “Bwanyima naareeba eiguru erisya n’ensi ensya, ahakuba eiguru ery’okubanza n’ensi ey’okubanza bikaba bihwaireho, n’enyanja etakiriho.”—Okushuuruurwa 21:1.

 Omu mwanya gwa gavumenti z’abantu, nari “eiguru ery’okubanza”, Ruhanga naija kutamu “eiguru erisya,” gavumenti ye ey’Obukama bw’omu iguru. Obukama bwe nibwija kwihaho ‘ensi ey’okubanza,’ nari abantu ababi, reero butegyeke ‘ensi ensya,’ nari abarikworobera Obukama obwo beekundiire.

 Ahansi y’obutegyeki bw’Obukama bwa Ruhanga nibwo abantu baraayegye kutuura n’enyamaishwa omu busingye, n’okukwata gye ebihangirwe byona.—Isaaya 11:6-9.