Ekitebyo 116

Oku Twakubaasa Kugumaho Ebiro Byona

NOOMANYA eki ogu mwishiki muto na banywani be barikushoma? Eego, nikyo kitabo eki, eki orikushoma—Ekitabo Kyangye eky’Ebitebyo by’Omu Baibuli. Haza bariyo nibashoma eki kitebyo eki orikushoma—“Oku Twakubaasa Kugumaho Ebiro Byona.”

Noomanya eki bariyo nibeega? Eky’okubanza, ngu nitwetenga kumanya ebirikukwata ahari Yehova n’Omwana we Yesu ku turaabe turi ab’okugumaho ebiro byona. Baibuli neegira eti: ‘Ogu nigwo muhanda gw’okugumaho ebiro byona. Yega ebirikukwata ahari Ruhanga omwe ow’amazima, n’Omwana we ou yaatumire omu nsi, Yesu Kristo.’

Nitubaasa tuta okwega ebirikukwata ahari Ruhanga n’Omwana we Yesu? Omuringo gumwe n’okushoma Ekitabo Kyangye eky’Ebitebyo by’Omu Baibuli kuruga aha kutandika okuhika aha muheru. Nikigamba aha bintu bingi ebirikukwata ahari Yehova na Yesu, tikwo kiri? Kandi nikigamba aha bintu bingi ebi bakozire hamwe n’aha bi bari haihi kukora. Beitu nitwetenga kukora ekirikukira aha kushoma ekitabo eki kwonka.

Nooreeba ekindi kitabo ekyo ekiri ahansi? Ni Baibuli. Reka hagire owaakushomera ebicweka bimwe kuruga omu Baibuli omu ebitebyo by’omu kitabo eki birugire. Baibuli netuheereza amakuru agaijwire agu turikwetenga kugira ngu twena twaheereza Yehova omu muringo oguhikire kandi twabaasa kutunga amagara agatahwaho. N’ahabw’ekyo tushemereire kukihindura omucwe okwega Baibuli obutoosha.

Beitu okwega kwonka aha birikukwata ahari Yehova Ruhanga na Yesu Kristo tikirikumara. Nitubaasa kutunga okumanya kwingi munonga okurikubakwataho n’aha nyegyesa zaabo, kwonka turemwe kutunga amagara agatahwaho. Noomanya ekindi ekirikwetengwa?

Nitwetenga kuta omu bikorwa ebi turikwega. Noijuka Yuda Iskaryota? Akaba ari omwe ahari 12 abu Yesu yaatoraine kuba entumwa ze. Yuda akaba naamanya bingi ahari Yehova na Yesu. Kwonka shi n’enki ekyamubaireho? Bwanyima y’omwanya mukye, akahinduka orikwekunda, kandi atyo yaareebya Yesu omu bazigu be ahabw’ebicweka by’efeeza 30. N’ahabw’ekyo Yuda taritunga magara agatahwaho.

Noijuka Gehazi, omushaija ou twayegireho omu Kitebyo 69? Akaba naayenda kutunga ebijwaro n’empiiha ebyabaire bitari bye. N’ahabw’ekyo akabeiha ngu atungye ebintu ebi. Kwonka Yehova akamufubira. Kandi naitwe naija kutufubira ku turaabe tutoorobeire ebiragiro bye.

Kwonka hariho abantu barungi baingi abaagumire nibaheereza Yehova n’obwesigwa. Nitwenda kuba nkabo, tikwo? Samueli omuto n’eky’okureeberaho kirungi eky’okukuratira. Ijuka, nk’oku twarebire omu Kitebyo 55, akaba aine emyaka nk’ena nari etaano yonka obu yaatandika kuheereza Yehova omu ihema rye. N’ahabw’ekyo tikiine nshonga oba noingana ki obuto, t’ori muto munonga obutaheereza Yehova.

N’eky’amazima, omuntu ou twena turikwenda kukuratira ni Yesu Kristo. Hoona n’obu yaabaire ari omwojo muto, nk’oku kirikworekwa omu Kitebyo 87, akaba ari omuri hekalu naagambira abandi ebirikukwata ahari Ishe ow’omu iguru. Ka tukuratire eky’okureeberaho kye. Ka tugambire abantu boona nk’oku turikubaasa ebirikukwata ahari Yehova Ruhanga waitu ow’okutangaaza hamwe n’Omwana we, Yesu Kristo. Ku turaakore ebintu ebi, obwo niitwija kubaasa kugumaho ebiro byona omu kibanja kya Ruhanga ekisya omu nsi.

Yohaana 17:3; Zaaburi 145:1-21.