Ebikaaka omu Nsi
Ekitebyo 8
Ebikaaka omu Nsi
OMUNTU ku yaakuba naakwizira kandi ari muraingwa munonga kuhika aha ntandaruha y’omu nju yaanyu, okaateekateeka ki? Omuntu ogwo naaba ari ekikaaka! Omu bunaku bumwe kare omu nsi buzima hakaba harimu ebikaaka. Baibuli neeyoreka ngu baishebo bakaba bari baamaraika kuruga omu iguru. Kwonka shi eki kikabaasika kita?
Ijuka, maraika omubi Sitaane akaba naayecurenga kureetaho emirabanamu. Kandi akaba naagyezaho n’okureetera baamaraika ba Ruhanga kuba babi. Bwanyima y’obwire kuhinguraho, bamwe ahari aba baamaraika bakatandika kuhurikiriza Sitaane. Baarekyera aho omurimo ogu Ruhanga yaabaire abahaire kukora omu iguru. Reero baashuuma omu nsi baajwara emibiri nk’ey’abantu. Noomanya ahabwaki?
Baibuli neegira ngu n’ahabw’okuba abaana ba Ruhanga aba bakareeba abakazi barungi omu nsi kandi baayenda kutuura nabo. N’ahabw’ekyo, bakaija omu nsi baashwera abakazi aba. Baibuli neegira ngu eki kikaba kiri kibi, ahakuba Ruhanga akahanga baamaraika kutuura omu iguru.
Baamaraika n’abakazi baabo ku baazaire abaana, abaana aba bakaba bari ab’omutaano. Omu kubanza bakaba batarikureebeka nk’ab’omutaano. Kwonka bakaguma nibakura barikuba bahango kandi barikweyongyera kugira amaani, okuhitsya obu baaba ebikaaka.
Ebikaaka ebi bikaba biri bibi. Kandi ahabw’okugira ngu bakaba bari bahango munonga kandi baine amaani maingi, bakaba babonabonesa abantu. Bakagyezaho kugyema buri omwe kuba mubi nkabo.
Enoka akaba yaafiire, kwonka hakaba hariho omushaija omwe omu nsi owaabaire ari murungi. Eiziina ry’ogu mushaija akaba ari Noa. Obutoosha akaba akora ebi Ruhanga yaabaire naayenda ngu akore.
Eizooba rimwe, Ruhanga akagambira Noa ngu obunaku Bwe bw’okuhwerekyereza abantu ababi boona bukaba buhikire. Kwonka Ruhanga akaba naaza kujuna Noa, eka ye hamwe n’enyamaishwa nyingi. Ka tureebe oku Ruhanga yaakozire eki.
