Ekitebyo 1

Ruhanga Okutandika Kuhanga Ebintu

EBINTU byona ebirungi ebi twine nibiruga ahari Ruhanga. Akahanga eizooba kutuheereza ekyererezi nyomushana, na n’okwezi n’enyonyoozi tutyo tubaase kuhweeza nyekiro. Kandi Ruhanga akatuhangira ensi kugituuramu.

Kwonka eizooba, okwezi, n’enyonyoozi tibyo Ruhanga yaabandize kuhanga. Noomanya ebyabandize kuhangwa? Ruhanga akabanza kuhanga abantu abari nka we. Titukaabaasa kureeba abantu aba, nk’oku tutarikubaasa kureeba Ruhanga. Omu Baibuli, abantu aba nibeetwa baamaraika. Ruhanga akahanga baamaraika kutuura nawe omu iguru.

Maraika w’okubanza ou Ruhanga yaahangire akaba ari ow’omutaano munonga. Akaba ari Omwana we ow’omujigaijo, kandi akakora n’Ishe. Akahwera Ruhanga okuhanga ebindi bintu byona. Akahwera Ruhanga omu kuhanga eizooba, okwezi, enyonyoozi hamwe n’ensi yaitu.

Obwire obwo, ensi ekaba neeshusha ki? Omu kutandika, tihaine n’omwe owaabaire naabaasa kutuura omu nsi. Tihaine ekyabaire kirimu okwihaho enyanja emwe mpango eyaabaire eshwekire ahansi hoona. Kwonka Ruhanga akaba naayenda abantu kutuura omu nsi. N’ahabw’ekyo akatandika kututebeekanisiza ebintu. Niki eki yaakozire?

Eky’okubanza, ensi ekaba neyetenga ekyererezi. Nikwo Ruhanga kureeta omushana kuruga omu izooba okwakira ensi. Akahanga eizooba ngu habeho nyekiro na nyomushana. Bwanyima Ruhanga yaatunguura eitaka kuruga omu maizi g’enyanja.

Omu kubanza tihaine na kimwe ekyabaire kiri omu nsi. Ekaba neeshusha nk’oku orikureeba aha kishushani eki. Hakaba hatarimu bimuri, nari emiti nari enyamaishwa. Kandi omu nyanja hakaba hatarimu n’obu byakuba eby’enyanja. Ruhanga akaba akyaine bingi by’okukora okuboneza ensi kuba omwanya murungi gw’enyamaishwa n’abantu kutuuramu.

Yeremia 10:12; Abakolosai 1:15-17; Okutandika 1:1-10.